1 Akilisito akatupekea uhulu, akapala tuigalile tukotokubhee ubhanda. Bahi, nyemange ndandali wala nkotokondanga kabhele kubhee akaabhanda. 2 Nnyoanikiange! nenga Apaulo ganagalobhola namwangota! Handa nkonditiinge kuhinwanga, Akilisito apakubhonekana ngabha chilebhe kwaachinunji. 3 Nongela kabhele pandaa, Kila mundu jwaakonda kuhinwa ipalikwa kukamula malagilo goha. 4 Handa ntendakulolekeanga kutendwa kubhee bhandu bha kuutongamanika kwa ndela ja malagilo, bahi, ntekuchibhekanga kutali na Annoongo. 5 Kwa upande gwitu, twenga tutendakulolea kupanganwa kubhee bhandu bhammbone nnoongi ja Annoongo kwa ndela ja kuhobhalela na kwa ndela ja machili ga Mboomo jwa Annoongo, tutendakulendela chikubho hecho. 6 Maana ikibha tutekulondana na Akilichito Yechu, kunhinanga au pangali kuhinwa kwanga maana. Nambo chichibhii chammbone nga kuhobhalela kukutandaikwa na kupalana. 7 Mkibhanga ntendakupangana hikubho yammbome mu kutama kwinu, bholi nga aganiki jwaakannekanila ili nkotokugujeketela ukweli. 8 Jwaatendite henela nga Annoongo jwaatekunkemanga. 9 Gangani majigano ga unami galandana na ngedule kachoko jijitutumua ukobha nnyingi. 10 Kubhokana na kulondekana kwitu na Hangwana, ndendakulupalila muno tupakulandana mu kuganikia kwitu. Kabhele mundu joajola jwapakunhangalana apakupotekwa. 11 Na kwa upande gwangu, akanung'una bhangu, handa tangu ndendakutangacha yakubhee ipalikwa kuhinwa, kwa niki bahi, tangu mbotekwe na Bhayahudi? Handa ikabhile henela, gandendakuntangachianga kwa ngani ja Akilisito gakaletiteopo honi joha jela. 12 Mbaya bhenebho bhabhankulumikinga nhinangwe! bhakachiina akaachina bhenenji. 13 Mwangota akanung'una, nkakemwanga na Annoongo ili nnekanilwe kubhoka ku ubhanda. Nambo kulekenilwa kwitu kulokolila kwinunji, ila ntumikilanange kwa upaliho. 14 Maana malagilo goha gakwela mu kukamula amuli jenjeni jimo jijilobhola, "Mwapale handami ajinu handa chinchipala mwabhene." 15 Nambo ikibha ntendakulumananga na kutaunana handa hinyama yakalipa ya kumanayahi, nchilolekeange ili nkotokoamananga mwakaachinabhene.

16 Bahi, nongela henela, kutama kwiununji kutandaikwe na Mboomo jwa Annoongo, na mwangota nkotokukagulanga kulokolilwa kwa mimele jinu kuntekubhelekwa nako. 17 Maana, kuhilokolila hikubho ya pachilambo hintenda kupangana yeniyela hitendakulekanila na genigala gabhapala Annoongo, na genigala gabhapala Mboomo jwa Annoongo gantenda kulekenilana na kulokolila kwa mmele kuntekubhelekwa nako. Yene hikubho hibhle hitendakukanana ligongo helyo ngakombolanga kupangana gampalanga mwaachinabhene. 18 Nambo handa ntendakulongolelwa na Mboomo jwa Annoongo, bahi ngalongolelwa kabhele na malagilo. 19 Bahi, hikubho hiibhokana nakulokolilwa kubohu kwa mmele nga, ngongola, ulolohi, uhakwa, 20 kuchalila hidimu, uhabhi, upwati, bhulwa, bwihu, lilaka, hilema, mataukano, mpwato 21 lilaka, kolelwa, kulyee muno na hikubho yengi handa yeneyo. Ndendakunyamukanga handa chindekulongolela kunnyamukanga, bhandu bhabhatendanga hikubho heyo ngapatanga umwenye gwa Annoongo gubhee gwabhenji. 22 Nambo mundu jwaatandaikwa na Mboomo jwa Annoongo abhii na Upalio, kuhachuka, kuhengwa, kuhimbalila, umbone, ntima gwa kujangatila bhangi, na kuaminika, 23 Kuchitimalika na kuchiibhila kupangana mabohu. Gakwa malagilo gagakombola kukana hikubho heyo. 24 Bhenibhala bhabhabhilinge bhandu bha Akilisito bhatekubhamba kulokolila kwabhennji kwa mimele jabhenji pamo na kuganikila kwabhenji kubohu. 25 Tutaamite kwa kujangatilwa na Mboomo jwa Annoongo, na tukagule na kutandaikwa kwabhenji. 26 Bahi, tukotokuchipuna, tukotokuandamulananga wala kubhonelananga bwihu.