1 Pahikapeta yaaka komi na ncheche, nakajaula kabhele ku Yelusalemu pamo na Abanaba, hela hela nakajaula pamo na Atito ili abhee pamo na nenga. 2 Nakajaula konokwe kwa kubhee Annoongo akahunukulila nyaule konokwe, ili nakaalobholelele kwa kuchiiya bhenibhala akanachilongola, jenijela Ngani Jammbone jindendakujitangacha kwa bhandu bhanga Bhayahudi. Nakatenda henela kwa kujogopa jikotokubhonekana handa ndendakubhutuka au nakabhutuka hiyoyo. 3 Bhakakondekana na nenga, hata handa Atito jwangabhee Agiliki, jwangaakulumikia kuhinwa, 4 hela hela kukibha na bhandu bhangi bhabhakachitenda bhaahobhalela Akilisito bhabhakapalanga ahinwe. Bhena bhandu bhakachijingia kwa kupenya na kulolea ngani yitu ya kubhee kwitu hulu kutukibha nako kwa kulondekana na Akilisito, ili bhakombolange kututenda twaakaabhanda bha Malagilo ga Amusa. 5 Twenga twangakondana nabho hata kachoko ili ukweli gwa Ngani Jammbone jiigalile kwa mwangota machobha goa pangali kupela.

6 Nambo bhena akanachilongola bhabhakondekwa muno bhangabhee na chilebhe chiyono cha kunobholela. Kweli bhakaatopeanga muno, nambo kwangu nenga chenecho ngabha chilebhe kwa kubhee Annoongo nganpendelea mundu. 7 Badala jakwe, bhakamanyanga kubhee nakapekewa lihengo lya kutangacha Ngani Jammbone kwa bhandu bhanga Bhayahudi, handa henela chibhakaahobhalela Apetulo kwa lihengo lya kutangacha Ngani Jammbone kwa Bhayahudi. 8 Annoongo jwaakaatenda Apetulo kubhee andundame kwa Bhayahudi nga jojojo jwaakandenda nanenga kubhee andundame kwa bhandu bhanga Bhayahudi. 9 Bahi, Ayakobo na Apetulo na Ayohana, bhabhakabhonekanga kubhee akanachilongola akaakolo, bhakaimanyanga kubhee Annoongo akambekea umbone gonogwe, bhakatukamula twenga mabhoko, Abanaba na nenga, chibhee chilolelo cha chikukulu. Twenga tukakondananga kupangana lihengo kwa bhandu bhanga Bhayahudi, na bhenaangota bhajaulanga kwa Bhayahudi. 10 Nambo bhakatujopanga chilebhe chimo, twaakombokelange akahocho bhabhabhilinge mu chibhoga cha bhandu bhabhaahobhalela Akilisito, nanenga nakachimmila kupangana chikubho chenecho.

11 Apetulo pabhakaika ku chilambo cha Antiokia nakaakana palundwanje maana akibha alemwite. 12 Kandahi tangu ja bhandu bhangi kuhika kubhoka kwa Ayakobo, Apetulo akibha alyehe pamo na bhandu bhanga Bhayahudi. Nambo bhena bhandu pabhakahikanga akajemeka kuchibhoa na kuchibheka kutali na bhandu bhanga Bhayahudi, kwa kubhee akaajogopanga libhoga lya bhandu bhabhakulumikianga bhandu bhainangwe. 13 Kabhele Bhayahudi bhangi bhabhakahobhalela Akilisito bhakalondekana na Apetulo mu chikubho hecho cha undendemundu, na hata Abanaba jono akalondekana na undendemundu gwabhenji. 14 Bahi, panakabhona kubhee hikubho yabhenji ngalandana na ukweli gwa Ngani Jammbone, nakaalobholela Apetulo nnoongi ja bhandu bhoa, "Hata handa mwenga nga Anyahudi, na mwenga ntama handa ngabha Anyahudi. Hikomboleka bholi mwenga kwaakulumikianga bhandu bhanga Bhayahudi kutama handa Bhayahudi?"

15 Kweli, twenga nga Bhayahudi kwa kubhelekwa, ngabha handa bhandu bha hilambo yengi yakubhee bhayahudi bhabhaakemanga bhapanga mabohu. 16 Nambo, tutendakuimanya kweli kubhee mundu ngakombola kondeekwa nnoongi ja Annoongo kwa kujeketela malagilo, ila kwa kwahobhalela Ayesu Kilisito. Twenga Bhayahudi kabhele tutekwahobhalela Ayesu Kilisito ili tukombole kondekwa nnoongi ja Annoongo kupetela kwahobhalela Ayesu Kilisito, na ngabha kwa kujeketela malagilo. Kwa kubhee jwaakwa mundu joajola jwaapakondeka nnoongi ja Annoongo kwa kujeketela Malagilo. 17 Handa tupala tukoondekwe na Annoongo kwa kulondekana na Akilsito, twenga tupakubhonekana handa akaabohu, bholi chikubho heche chilangia kubhee Akilisito ajangatila kupangana mabohu? Hata kachoko! 18 Handa mbakuleka kukagula Malagilo ili ngombole kondekwa nnongi ja Annoongo, ngapena kabhele nakajemeka kukagula Malagilo penapo nga mbakubhee mbangine mabohu. 19 Kwa maana, nenga kwa kupetela malagilo, ndekugajomokea malagilo ili ngombole kutama ligongo lya kwaatumikila Annoongo. Nenga ndekujimoka pamo na Akilisito panchalaba, 20 nangocheni ndendakutama, nambo ngabha nenga kabhele, ila Akilisito jwaatama nkati jangu, kutama chindendakutama nangocheni ndama kwa kuhobhalela, kuhobhalela kwangu kukubhokana na Mwana jwa Annoongo jwambalite, mpaka akagubhoa umomi gwabhe ligongo lyangu. 21 Ngapala kugukana umbone gwa Annoongo. Handa mundu atekutendwa kondekwa nnoongi ja Annoongo kwa kukamuala malagilo, bahi kujomoka kwa Ayesu kwanga maana.