1 Bahi, nongela henela, nnekelwa, akibha tangu mwana, ngalekanila na mmanda handa hibhile hilebhe yoa nga yabhe. 2 Wakati gonogwe goha habhile pahi ja bhandu bhabhalela na kujemela hiilebhe yabhe mpaka guhike muuda gugubhekitwe na Atati bhabhe. 3 Henela na twenga patukibha tangu twangagumanya ukweli, tukibha twakaabhanda bha mahoka bha bhabhatabhala bha pachilambo. 4 Nambo muuda gola gugupalikwa pagupakuhika, Annoongo bhakantuma Mwana jwabhee jwabhelikwe na haikege, akatama kwa kutandaikwa na malagilo, 5 akombole kwaakomboa bhenibhala bhabhalongolelwa na malagilo ili twenga tutendekwe bhana bha Annoongo. 6 Kwa henela nangocheni mwangota nga bhanabhabhee, Annoongo atekuntuma Mbooomo jwa Annoongo mu mitima jinunji, Mboomo yakubhee atendakuguta, "Aba" Yakubhee maana gakwe nga "Atati" 7 Bahi, mwenga ngabha akabhanda kabhele, bali amwana. Na chikibha nga mwana, bahi, mwenga mpakupokela goha Annoongo hibhammekilinge bhana bhabhe.

8 Lolo mwangaamanga Annoongo na henela nkatumikilanga minnoongo yakubhee ngabha Annoongo jwa kweli. 9 Nambo nangocheni, kwa hela ntendakwaamnya Annoongo, au tulobhole ntendakumanyikana na Annoongo, kwaniki ntendakugabhujila kabhele maigano ga kandahi gagabhii gaahocho na gagatekupongokelwa? 10 Tangu ntekukuchihabhuanganga muno kwa kukombokela muno machobha, mihehi na yaaka! 11 Ndendakujogopa yakubhee labuda lihengo lindendite ligongo linunji litakuhobha hiyoyo! 12 Mwakaang'una, nanyamukanga mme handa nenga, kwa hela hata nenga ndekubhee handa mwangota. Mwangandendelanga ubou goha hola. 13 Ntendakuimanga yakubhee chitamwa changu helo chimbekihe napachi ja kuntangachianga Ngani jammbone kwa mala ja kujemeka. 14 Hata henela, wakati gonigola mwangameluanga wala kungananga ligongo lya chitamwa changu chibhii chingandenda kupangana henela, nambo nkambokelanga handa na antumichi bha Annnoongo, handa hela ngabhile Akilisito Yesu. 15 Nkibhanga na kuhangalala, nangocheni chibhokile chiniki? Ngombola kulongela ukweli kubhee handa ikakaomboeka nkagabhoa miho ginunji na kumbekeha nenga. 16 Bholi, nangocheni ndekubhee apwaati bhinunjiligongo kunnobholelanga kweli? 17 Habhobho bhandu bhangi bhatendakumpupulikia mwangota, nambo nia jabhenji nga jammbone. Bhapalanga kunnekania nanenga ili mwangota mwaapapatilikie bhena bhandu. 18 Kwakweli nga chikubho cha mmbone machobha goha kwapupulikila bhangi mu hikubho ya mmbone, na ngabha tu wakati nena mile pamo namwangota. 19 Bhana bhangu, handa hela haikege bhakweti chitumbo chibhalaga wakati gwa kubheleka, nenga ndendakulaga kabhele kwa ajili jinunji mpaka penapo hali jabhee Akilichito pajipakuhalakikwa nkati jinunji. 20 Ndendakulokolila handa nakibha pamo na mwangota nangocheni, labuda nakatentenbhuka lilobhe lyangu. kwa maana ndendekubhee na lipamba pamo namwangota nangocheni, maana ngapatite nchimamo gwa kupaa nnani jinunji! Ndekubhee na lipamba muno mwangota!

21 Nnobholelenge mwangota bhampalanga kuhukumulikwa na malagilo, bholi, ntekujoanga chiilongelekwa malagilo? 22 Jijaandikwe mu Majaandiko ga Annnoongo yakubhee Ablahamu akibha na bhana bhabhele, jumo kwa haikege abhanda, na jwa bhele haikege bhanga abhanda. 23 Joni jola jwa mwikege mmanda akabhelekwa kwa mmele, nambo jonijola jwa haikege bhanga habhanda akabhelekwa kubhokana Annoongo chibhakalobhola. 24 Hikubho heyo yakibha nnandanikio, hakaikege habho bhabhele nga kulandanikia kwa malagano mabhele, lya kwanja nga lyenilela lilikatendeka ku litombi ku Chinai, mwakilichi jwabhe nga Ahagali, na bhana bhabhee bhabhabhelikwe ku ubhanda. 25 Ahagali atendakuhakilicha litombi lya Chinai gugubhile ku Alabhia, na nga kulandanikia gwa chilambo cha ku Yeluchalemu cha nangocheni, kwa maana chenecho chibhile mu chilambo cha ubhanda pamo na bhandu bhabhatamanga monomwe. 26 Nambo ku Yeluchalemu ja kunani kwa Annoongo nga chilambo chichibhile hulu, na chene nga amma jwitu. 27 Maana itekujaandikwa, "Nhangalale, mwenga mwangabhee ntonga, nkwehe lilobhe mwenga mwangapata kubheleka mwana, maana bhana bha jonijola jwaabhteulekana na analome nga bhajingi kupunda bha ahikege jwabhile na analome." 28 Nangocheni, bahi, akanung'una bhangu, mwangota nga bhana bha Annoongo kubhokana naahadi ja Annoongo handa jenijela ja Aisaka. 29 Nambo handa yela machobha gala jonijola mwana jwaabhelikwe kwa ndela ja mmele, akalaagia jonijola jwaabhelikwe kwa uwecho gwa Mboomo jwa Annoongo, hela hela nga chiibhile mpaka nangocheni. 30 Nambo Majaandiko ga Annoongo galongela bholi? Bhalobhola, "Mwabhenge haikege abhanda pamo na mwana jwaabhe, maana mwana mmanda jwapakupokelaopo kulandana na mwaana jwa ahikege jonojwe" 31 Henela bahi, twenga ngabha bhana bha habhanda ila twenga nga bhana bha haikege jwaabhii hulu.