28 Jisọs ama ọfiọk ete ke kpukpru ñkpọ ema eda ke itie mmọ ọyọhọ ọyọhọ, ndien man osu nte ekewetde ke ñwed Abasi, Enye ama ọdọhọ ete, "ltọñ Asat Mi." 29 Otu mmin emi ekotde finika ama ana do, do mmọ ema eda ndọbọ edebi ke esit emen ekọñ ke enyene mfa eto emi ekotde Aisọb, ndien emenede edian Enye ke ñkpọkinua.

30 Ke Jisọs ama ọkọñwọñ finika oro ama, Enye ama ọdọhọ ete, "Okure," ndien Enye osuk ibuot Esie onyuñ ayak uwem Esie ke ñkpa.

23 Ke ini mme mbon ekọñ ema ekekọñ Jisọs ke etoñkpa ekure, mmọ ema emen ọfọñidem Esie, esiak ke mbak inañ, ubak kiet ke owo kiet. Ọfọñ idakidem Esie ikenyeneke ibuñ, ekedọk enye nte ọfọñ kiet ọtọñọde ke itọñ tutu esim mben. 24 Mmọ ema etiñ kiet ye eken ete, "Eyak ñnyin ikuwak enye emi. Eyak isin afia man idiọñọ owo emi anade ada ọfọñ enye emi." Emi eketibe man ikọ Abasi osu emi ọkọdọhọde ete, "Mmọ ema edeme mme ọfọñ Mi enọ idem mmọ, ndien esin afia ke abaña ewura Mi." Ke ntre mme mbon ekọñ oro ema esin afia. 25 Mmọ emi ekedade ekpere etoñkpa Jisọs ekedi Eka Esie, eyeneka eka Esie Meri, ñwan Klopas, ye Meri Makdalin. 26 Ke ini Jisọs okokutde Eka Esie do ye mbet emi Enye akamade nte edade, Enye ama ọdọhọ eka Esie ete, "Enye edi eyen fo."

27 Ndien onyuñ ọdọhọ mbet Esie ete, "Enye edi Eka fo". Ọtọñọde ke usen oro, mbet Esie oro ama ada eka Jisọs ọnyọñ ufọk esie.

33 Ke ini emi mmọ ekesimde ebiet emi mmọ esikotde "Ñkpọkpọrọ," do ke mmọ ekekọñ Jisọs ke krọs ye mme oburobut owo iba oro, kiet ke ubọk nnasia Esie, eken ke ubọk ufien Esie.

34 Jisọs ama ọdọhọ ete, "Ete, fen nọ mmọ koro mmọ mifiọkke se mmọ enamde." Ndien mmọ ema edeme mme ọfọñ Esie ke edisin afia. 35 Mme owo ema eda do ke ekpeme, ndien mme akara ukara eda Enye etọ ndọk. Mmọ ema edọhọ ete, "Enye akanyaña mme mmọ efen; yak Enye anyaña idem Esie edieke Enye edide Andinyaña eke Abasi, Enye emi Abasi ekemekde."

36 Mbon ekọñ ema esak Enye ñko, enyuñ enọ Enye mmin emi ekotde Finika ete ọñwọñ. 37 Ndien mmọ edọhọ Enye ete, "Edieke Afo edide Edidem mme Ju, nyaña idem Fo naña?"

38 Ke ekekpọñde ibuot Esie esisit ema ewet mme ikọ emi:

"Emi edi Edidem mme Ju."

39 Owo kiet ke otu mme oburobut owo iba emi ekekọñde ke eto ediana Enye ama ọtọñọ ndisuñi Jisọs ete, "Nte Afo udighe Kraist Andinyaña? Nyaña idem Fo nyuñ nyaña ñnyin nde-e."

40 Edi oburobut owo eken ama asua ọnọ Enye, ete, "Nte afo ubakke Abasi? Ñnyin kpukpru idu ke idak ubiomikpe kiet? 41 Eke ñnyin nte ededi enen, koro ñnyin ibọde ufen emi ñnyin idotde ndibọ ke se ñnyin ikanamde. Edi Enye iduehe ñkpọ ndomokiet." 42 Ndien enye ọdọhọ Jisọs ete, "Ọbọñ, ti mi ke ini Afo edidide ke ubọñ Fo."

43 Jisọs ama ọbọrọ enye ete, "Ami ntiñ akpanikọ nnọ fi nte, mfin emi afo eyedu ye Ami ke Paradais."

33 Ekem ke ñkpọ nte ufọt uwemeyo, ekim ama ofuk ofuri iso isọñ, ndien ebighi tutu osim ñkanika ita uwemeyo.

34 Ke ñkanika ita, Jisọs ama ofiori ke ọkpọsọñ uyo ete, "Elai, Elai, Lema Sabaktani?" Emi ọwọrọde "Abasi Mi, Abasi Mi, nsinam Afo ọkpọñde Mi?"

51 Ke ndo ndo oro, ikpehe Edisana itie uwa ama asiaha ke mbak iba ọtọñọde ke enyọñ tutu osim isọñ, ndien isọñ enyek, mme itiat enyuñ esiaha, 52 mme udi ekubọrede ndien mme ediwak ikọt Abasi emi ekekpañade ema etọñọ ntak eset ke ñkpa edu uwem. 53 Mmọ kpukpru ewọñọ ke mme udi, ndien ke Jisọs ama ekeset mmọ ema eduk ke edisana obio (Jerusalem) enyuñ ekewut mme ediwak owo idem mmọ.

54 Ke ini etubom ekọñ ye mme mmọ emi ekedude ye enye ekpeme Jisọs ekekutde unyekisọñ ye kpukpru se iketibede, ndik ama anam mmọ eti eti, ndien mmọ ema efiori ete, "Ke akpanikọ Enye ekedi Eyen Abasi!"

13 Owo ndomokiet inyeneke ima emi okponde akan ima enye emi anamde ufan ayak uwem esie ọnọ ke ntak mme ufan esie.

16 Koro Abasi akamama ererimbot, oro akanam Enye osio ikpọñ ikpọñ Eyen Esie ọdọñ, ete owo ekededi emi ọbuọtde idem ye Enye okutak, edi enyene nsinsi uwem.

10 Ñnyin ikedi mme asua Abasi, edi enye ama anam ñnyin idi mme ufan Esie oto ke ñkpa Eyen Esie. Ke emi ñnyin ima ikedi mme ufan Esie, ñnyin imenyene idorenyin edinyaña oto ke uwem Eyen Esie.

16 Ñnyin ida emi idiọñọ ima oto ke uwutñkpọ emi Kraist okowutde ke Enye ndikpa nnọ ñnyin. Ndien ntre ñnyin ñko ikpenyene ndiyak uwem ñnyin nduọk nnọ nditọ ete ñnyin.

2 Enye edi uwa emi emende mme idiọkñkpọ ñnyin efep. Inyuñ idighe idiọkñkpọ ñnyin ikpọñ, edi idiọkñkpọ ofuri ererimbot.

8 Enye ama ọsuhọde idem Esie; onyuñ asaña ke afañ ñkop item tutu ọkọsuñọ ke ñkpa, kpa ñkpa Esie ke etoñkpa.

9 Koro ñnyin imọfiọk ite ke Kraist ama eset ke ñkpa, Enye idikpaha aba, ñkpa inyeneke odudu aba ke idem Esie. 10 Koro ñkpa emi Enye akakpade, Enye akakpa ọnọ idiọkñkpọ, okonyuñ edi ini kiet kpọt, uwem emi Enye odude idahaemi, Enye odu ọnọ Abasi.

3 Koro ke akpanikọ mbufo emefiọk emi ete, ke ini ñnyin ikanade babtisim iduk ke ebuana ye Kraist Jisọs, ñnyin ikana babtisim iduk ke ebuana ñkpa Esie. 4 Ke edina babtisim ema ebuk ñnyin ye Enye, ndien ñnyin ima ibuana ke ñkpa Esie, man otodo, kpa nte ekemenerede Kraist esio ke ñkpa oto ke utibe odudu Ete, kpa ntre ñko ñnyin ikpodu obufa uwem.

27 Kpukpru owo enyene ndikpa ini kiet, ndien ke enye ama akakpa Abasi eyekpe ikpe esie. 28 Ke ukem usuñ emi, ekewa Kraist nte uwa ini kiet ndimen idiọkñkpọ ediwak owo mfep.

Enye eyetọñọ ntak edi ọyọhọ ikaba, ididighe ndinyene mbubehe ndomokiet ye idiọkñkpọ, edi ndinyaña mme mmọ emi etiede ebet Enye.

22 "Mbufo nditọ Isrel, ekpañ utọñ enọ ikọ emi: Jisọs eyen Nasaret ekedi Enyemi Abasi akayararede owut mbufo oto ke mme utibe ñkpọ, mme ñkpọ ñkpaidem ye mme idiọñọ emi Abasi ekebede ke Enye anam. Mbufo ke idem mbufo emefiọk emi, koro mme ñkpọ emi ekedade itie mi ke otu mbufo. 23 Ekeyak owo emi enọ mbufo kpa nte Abasi okobonde ke ubonñkpọ Esie, ndien mbufo ediana ye mme oburobut owo ewot Enye ke edikọñ Enye ke etoñkpa. 24 Edi Abasi ama emenede Enye osio ke ñkpa, ọkpọk Enye ayak ke ubiak ñkpa, koro ñkpa minyeneke ukeme ndimum Enye ñkama."

11 Ami ndi Eti ekpeme-erọñ. Eti ekpeme-erọñ ebeñe idem ndikpa ke ntak mme erọñ.

26 Koro kpukpru ini emi mbufo etade uyo emi enyuñ eñwọñde ke kọb emi mbufo eyeka iso ndikwọrọ etop ñkpa Ọbọñ, nte Enye akakpade ọnọ mbufo. Enam emi tutu Enye afiak edi.