1 Ke ndika iso, eyen emi edidiade akpa ete esie esikama enye ukem nte ofin kini enye edide ekpri eyen okposuk edi nte edide enye enyene kpukpru ñkpọ oro. 2 Ke ini enye edide eyenọwọñ mme owo edu emi ekamade enye enyuñ ese enyin ke mme ñkpọ esie tutu ini ete esie okodoride ekem.

3 Ke ukem usuñ oro, ñnyin ñko ikedi ifin inọ mme spirit emi akakarade enyọñ ye isọñ, mbemiso ñnyin ikesim idaha nsọñidem ke ñkpọ Spirit. 4 Edi ke ñkem ñkem ini, Abasi ama osio Eyen Esie ọdọñ. Enye ekedi nte eyen emi eka obukidem amande, onyuñ odu uwem ke idak ibet mme Ju, 5 man Enye afak mme mmọ emi ekedude ke idak ibet, man ñnyin idi nditọ Abasi. 6 Man owut nte ke mbufo edi mme nditọ Esie, Abasi ama ọdọñ Spirit Eyen Esie ediduk ke esit ñnyin, Spirit emi ofioride ete "Ete, Ete mi." 7 Ke ntre afo udighe aba ofin, edidi eyen. Ndien sia afo edide eyen Esie, Abasi eyenọ fi kpukpru se enye enyenede ọnọ nditọ Esie.

8 Ke ini emi ekebede mbufo ikọdiọñọke Abasi, ndien ke ntre mbufo ekedi ifin enọ mme ñkpri abasi emi midighe Abasi. 9 Edi ke emi mbufo ema ekediọñọ Abasi, ñkpakam ndọhọ nte, idahaemi Abasi ama ọkọdiọñọ mbufo, didie ndien ke mbufo eyom ndifiak ñwọñọde ntiene mme mmeme ye mme mbiara spirit ukara? Ntaha mbufo eyomde nditọñọ ntak ndi ifin mmọ-o? 10 Mbufo eka iso ndikpeme mme asaña asaña usen, ye ọfiọñ, ye ini, ye isua. 11 Ami mokop mfina eti eti kabaña mbufo! Nte emi ọwọrọ ete ke kpukpru utom mi ke otu mbufo ọwọrọ ikpuikpu?

12 Ami mekpe mbufo ubọk, nditọ ete mi, etie nte ami. Ke editim ntiñ ami ntie nte mbufo. Mbufo inamke mi ndomo idiọkñkpọ kiet. 13 Mbufo emeti ntak emi ami ñkọkwọrọde Eti Mbuk emi nnọ mbufo ke akpa ini; ekedi koro ami ñkọdọñọde. 14 Edi mbufo ikesinke mi ke ndek ikinyuñ isinke mi, okposuk edi nte ikpọkidem mi ekedide akamba ñkpọ idomo ọnọ mbufo. Edi mbufo ema edara mi nte mbufo ekpedarade Enjel Abasi. Ema edara mi kpa nte ekpedarade Kraist.

15 Mbufo ema ekop inemesit! Nso itibe ye mbufo idahaemi? Ami ke idem mi mekeme nditiñ nte, ke mbufo ema ebeñe idem ndisio ñkpasip enyin mbufo, edieke mbufo ekpekemede, ndien emen mmọ enọ mi.

16 Nte ami makabade ndi owo usua mbufo ke editiñ akpanikọ nnọ mbufo?

17 Mme mmọ eken oro eñwana ndinam nte ke imikere ibaña mbufo eti eti, edi uduak mmọ ye mbufo ifọnke. Kpukpru se mmọ eyomde edi ndidiañade mbufo ye ami, man oto do mbufo enyene mbubehe ye mmọ kpa nte mmọ enyenede ye mbufo. 18 Ke emi, ọfọn ndinyene ekikere mbaña owo ke eti ntak, ye ndinyuñ nnam ntre kpukpru ini, idighe ke ini emi ami ndude mi ye mbufo ikpọñ. 19 Mme ndima nditọ mi, ini kiet efen, kpa nte eka odude ke ubiak uman, ami ñkop ukem ubiak oro kabaña mbufo, tutu edu uwem Kraist ọbọrọ ke esit mbufo. 20 Ọdọñ mi nte ñkpodude ye mbufo ke emi, man oto do ami ñkpuhọde edu mi kabaña mbufo. Ami mokop mfina eti eti kabaña mbufo.

21 Eyak mbup mbufo oro eyomde ndidu ke idak ibet Moses: nte mbufo ikopke se ibet ọdọhọde? 22 Ibet ọdọhọ ete ke Ebraham ekenyene nditọ iren iba, ekenyene kiet oto ñwan ofin, enye eken enye ekenyene oto amana isọñ. 23 Eyen emi enye ekenyenede oto ñwan ofin akamana nte kpukpru owo esimanade, edi eyen emi enye ekenyenede oto amana isọñ añwan akamana oto eñwọñọ Abasi.

24 Ekeme ndida emi nte uwutñkpọ: iban iba emi eda enọ mme ediomi iba. Enye emi nditọ esie emanade ke ufin edi Haga, ndien enye ada ọnọ ediomi emi ekenamde ke obot Sainai. 25 Haga ada ọnọ akwa obot Sainai ke idut Arabia, ndien enye edi uwutñkpọ akwa obio Jerusalem idahaemi, emi odude ke ufin ye kpukpru ikọt esie. 26 Edi Jerusalem enye emi otode enyọñ iduhọ ke ufin, ndien enye edi eka ñnyin.

27 Koro ñwed Abasi ọdọhọ, ete, "Du ke idara, afo ada añwan, sio ñkpo idara afo emi akananam mukopke ubiak uman! Koro eyenañwan emi ekesinde eyenyene nditọ awak akan ñwan emi akananam ebe esie mikpọñke enye."

28 Ke emi nditọ ete mi, mbufo edi nditọ Abasi oto ke eñwọñọ Esie, kpa nte Aisik ekedide. 29 Ke ini oro eyen emi akamanade nte kpukpru owo emanade ama ọkọbọ enye emi akamanade oto Spirit Abasi; ndien edi kpa ntre ke emi.

30 Edi ñwed Abasi ọdọhọ didie? Enye ọdọhọ, ete, "Bin eyenañwan ofin ye eyen esie, koro eyen añwan ofin ikemeke ndibuana unen udeme ke ñkpọ ete ye enyemi amanaisọñ añwan amande". 31 Ke ntre nditọ ete mi, ñnyin idighe nditọ añwan ofin, edi, idi eke amanaisọñ añwan.