1 Ke isua duopenañ ama ekebe ami mma mfiak ñka Jerusalem ye Banabas, mma ñnyuñ nda Taitọs asaña ye ñnyin. 2 Ami ñkaka koro Abasi akayarade ọnọ mi nte ke ana ami ñka. Ke ndibe mbono ye mme adausuñ, ami mma nnam Eti Mbuk emi ñkwọrọde nnọ mme mmọ emi midighe mme Ju añwaña mmọ. Ami ñkoyomke utom emi ami ñkanamde ke edem mme emi ami ñkade iso ndinam idahaemi ewọrọ ikpuikpu. 3 Okposukedi emi Taitọs emi edide nsaña mi ekedide eyen Krik, owo ikenyikke enye ana mbobi.

4 Mme ndusuk owo emi ekebiañade ete ke mmimọ idi nditọ ete enyuñ ebuaha ke otu ñnyin, ema eyom ndinim enye mbobi. Mme mmọ emi ekededip idem eduk nte mbio uyep ndiyarade ndiọñọ uwọrọufin emi ñnyin inyenede ke edidiana ñnyin kiet ye Kraist Jisọs. Mmọ ekeyom ndida ñnyin nsin ufin. 5 Ñnyin ikenyimeke inọ mmọ ndomo esisit, man ikeme ndimum Eti Mbuk emi nnim nte ọfọnde ama nnọ mbufo.

6 Edi mme mmọ emi eketiede nte mme adaiso, se mmọ ekedide ikenyeneke ñkpọ ndinam ye ami, Abasi ibiereke itiene nte ñnyin itiede ke enyọñ idem, mme adaiso emi ikadianke baba obufa ñkpọ kiet ke etop mi. 7 Edi mmọ ema ekut ete ke Abasi ama ọnọ mi ubiọñ edikwọrọ Eti Mbuk emi nnọ mme mmọ emi midighe Ju, kpa nte Enye ọkọnọde Pita ubiọñ edikwọrọ Eti mbuk emi nnọ mme Ju. 8 Koro ekedi ke odudu Abasi ke ekenam mi isuñutom Abasi enọ mme mmọ emi midighe Ju kpa nte ekenamde Pita isuñutom Abasi enọ mme Ju. 9 Jems, Pita, ye Jọn emi ekedide mme adaha, ema enyime ete ke Abasi ama ọnọ mi asaña asaña utom emi, ke ntre mmọ ema eda Banabas ye ami nte mme asañautom kiet, ñnyin ima inyime ite ke ñnyin iyenam utom ñnyin ke otu mme mmọ emi midighe Ju ndien mmọ ñko ke otu mme Ju. 10 Kpukpru se mmọ ekebeñede ekedi, yak ñnyin iti mme mbon unana ke otu mmọ, emi ekedi ukem ukem ñkpọ emi ami ñkenyenede udọñ ndinam.

11 Ke ini emi Pita ekedide ke Antiọk, ami ma nneni ye enye añwa añwa, koro enye ama eneñede edue. 12 Mbemiso ndusuk mme mmọ emi Jems ọkọdọñde edisim do, Pita ama esidia udia ye mme nditọ ete emi midighe Ju. Edi ke mme mmọ emi ema ekedisim, enye ama afiak edem, inyimeke ndidia aba udia ye mmọ koro enye akabakde mme mmọ oro ekeyirede ete yak enim mmọ emi midighe Ju emi ekenimde ke akpanikọ mbobi. 13 Mme nditọ ete eken emi ekedide mme Ju ema etọñọ ndinam ñkpọ nte mbio mbubik nte Pita tutu esim idem Banabas, ido mbubik ama otuk enye ñko. 14 Ke ini ami ñkokutde nte ke mmọ ikasañake ke nnen nnen afañ nte asañade ekekem ye akpanikọ Eti Mbuk, ami ma ndọhọ Pita ke iso kpukpru owo emi ekedude nte, "Afo edi Ju, edi afo aka iso ndidu uwem nte owo emi midighe Ju. Didie ndien ke afo ekeme ndinyik mme mmọ emi midighe Ju edu uwem nte mme Ju?" 15 Ke akpanikọ, ñnyin idi mme Ju ke emana, ñnyin idighe mme mmọ emi midighe Ju "mme anam idiọkñkpọ." 16 Edi ñnyin imọdiọñọ ite ke enam owo enen ye Abasi oto ke mbuọtidem ikpọñ ikpọñ ke Jisọs Kraist, idighe ke edinam se ibet etemede. Ñnyin ñko, imọbuọt idem ye Kraist Jisọs man inen ke iso Abasi oto ke mbuọtidem ñnyin ke Kraist, idighe ke edinam se ibet etemede, koro owo baba kiet inenke ke iso Abasi ito ke edinam se ibet etemede.

17 Edieke ñnyin ndien iñwanade ndinen ye Abasi oto ke edidiana ñnyin ye Kraist, ndien eyarade efiọk ete ke ñnyin idi mme anam idiọkñkpọ ukem ukem nte mmọ emi midighe Ju enamde, nte emi owut ete ke Kraist oduk nsaña ye idiọkñkpọ? Idighe ntre ke ndomo ntak kiet. 18 Edieke ami ntọñọde ntak ndibọp se ami ñkewuride, oro owut ete ke ami ndi abiat ibet. 19 Ke se ededi emi otukde ibet ami mma ñkpa ñwọrọ ke esit, edi idem ibet okowot mi, man otodo ami ndu uwem nnọ Abasi. Ema ewot mi ye Kraist ke Krọs Esie.

20 Ke ntre, idighe ami aba ndu uwem emi, edi Kraist odu uwem ke ami. Uwem emi ami ndude idaha emi, ami ndu ke mbuọtidem ke Eyen Abasi, emi akamade mi ndien ayak uwem esie ọnọ mi. 21 Ami nsinke mfọn Abasi. Edieke owo okutde unen ke iso Abasi oto ke edinim ibet, oro ọwọrọ ete ke Kraist akakpa ke ikpuikpu!