1 Mbufo ndisime mbon Kalesia! Anie eda odudu efen etimede mbufo? Ke iso mbufo nnen nnen ke ekenam ñkpa Jisọs Kraist ke Krọs eneñede añwaña mbufo. 2 Etiñ ñkpọ kiet emi enọ mi: nte mbufo ekebọ Spirit Abasi ke edinam se ibet etemede, mme ekedi ke edikop ye ke edinim Eti Mbuk ke akpanikọ? 3 Mbufo esime didie ndien ntem? Mbufo eketọñọ ke Spirit Abasi; nte mbufo eyom ndien ndiketre ke odudu idem mbufo? 4 Nte kpukpru mme ifiọk emi mbufo ema ekenyene ọwọrọ ikpuikpu? Ke akpanikọ ewọrọ ñkpọ.

5 Nte Abasi ọnọ mbufo Spirit Esie onyuñ anam mme utibe ñkpọ ke otu mbufo oto ke emi mbufo ekenamde se ibet etemede, mme ekedi koro mbufo ekekopde enyuñ enim Eti Mbuk ke akpanikọ?

6 Edi kere baña Ebraham, nte ñwed Abasi etiñde ete, "Enye ama enim Abasi ke akpanikọ, ndien ama oto ke mbuọtidem esie Abasi ama enyime enye nte edinen owo." 7 Mbufo enyene nditim mfiọk emi, ndien, ete ke mme mmọ emi enyenede mbuọtidem edi mme ata nditọ Ebraham.

8 Ñwed Abasi ama etetiñ enim nte ke Abasi eyenam mme mmọ emi midighe Ju enen ke iso Esie oto ke mbuọtidem. Ke ntre ñwed Abasi ama ọkwọrọ Eti Mbuk ọnọ Ebraham mbemiso esim ini emi ete, "Eyeto ke afo Abasi ọyọdiọñ kpukpru ubon owo ke iso isọñ". 9 Ebraham ama enim ke akpanikọ ndien ema ediọñ enye; kpa ntre, kpukpru mme mmọ emi enimde ke akpanikọ ediọñ mmọ kpa nte ekediọñde enye.

10 Mme mmọ emi eberide idem ke se ibet Moses etemede edu uwem ke idak isuñi. Koro ñwed Abasi ọdọhọde ete, "Owo ekededi emi minamke kpukpru ini, kpukpru se ewetde ke ñwed ibet odu ke idak isuñi Abasi". 11 Ke emi, etim añwaña nte owo baba kiet inenke ye Abasi ke edinim ibet Moses, koro ñwed Abasi ọdọhọde ete, "Edinen owo edidu uwem ke mbuọtidem." 12 Edi ibet Moses inyeneke ñkpọ ndinam ye mbuọtidem, nte ñwed Abasi ọdọhọde, ete, "Owo emi anamde kpukpru se ibet etemede eyedu uwem ke mmọ." 13 Edi Kraist ama afak ñnyin osio ke isuñi emi asañade ye ibet Moses, ke emi enye akakabarede edi isuñi ọnọ ñnyin, koro ñwed Abasi ọdọhọ ete, "Owo ekededi emi eyirede ke eto odu ke idak isuñi Abasi."

14 Kraist akanam emi man edidiọñ emi Abasi ọkọñwọñọde ọnọ Ebraham ekpebe esim mme mmọ emi midighe Ju, oto ke Kraist Jisọs, man ñnyin ikeme ndibọ Spirit emi Abasi ọkọñwọñọde oto ke mbuọtidem. 15 Nditọ ete, ami ñyom ndida uwutñkpọ kpukpru usen ñwut: Ke ini owo iba edukde ediomi ebaña ñkpọ enyuñ esinde ubọk ke ñwed ediomi, owo ndomokiet ikemeke ndibiat ediomi oro mme ndidian ñkpọ ke esit.

16 Ke emi, Abasi akanam eñwọñọ Esie ọnọ Ebraham ye oruk esie. Ñwed Abasi idọhọke ite, "ye mme oruk fo," emi ọwọrọde ediwak owo, edi Enye ọdọhọ ete, "ye oruk fo," emi ọwọrọde owo kiet kpọt kpọt, emi edide Kraist. 17 Se ami ntiñde edi ntem, Abasi amanam ediomi ye Ebraham onyuñ ọñwọñọ ndinim ediomi emi. Ibet Moses ekenọde ke isua ikie inañ ye edip ye duop ama ekebe, ikemeke ndibiat ediomi oro ñnyuñ mmen eñwọñọ Abasi mfep. 18 Koro edieke se Abasi ọnọde ọkọñọde ke ibet Moses, ke ntre ikemeke aba ndikọñọ ke eñwọñọ Esie. Nte ededi, ekedi ke ntak eñwọñọ Esie akanam Abasi ọnọ Ebraham enọ oro.

19 Nso ikedi ntak ibet Moses ndien? Ekedian man owut se idiọkñkpọ edide, ndien akana enye ada tutu ubon Ebraham oro edi, emi ekenamde eñwọñọ oro enọ. Ekenọ ibet eto ubọk mme enjel, ye owo nte esine ufọt. 20 Owo iyomke esine ufọt, kadaña ini nte edide owo kiet odu, ndien Abasi edi kiet.

21 Nte emi ọwọrọ ete ke ibet Moses akatuaha ye mme eñwọñọ Abasi? Baba o! Koro edieke ubon owo ọkpọbọde ibet emi ekemede ndinọ uwem, kpukpru owo ekpekeme ndinen iso ye Abasi oto ke edisuk ibuot nnọ utọ ibet oro. 22 Edi ñwed Abasi ọdọhọ ete ke ofuri ererimbot esine ke idak ukara idiọkñkpọ, ke ntre enọ emi ekeñwọñọde ndinọ owo nto ke edibuọt idem ye Jisọs Kraist emenọ mme mmọ emi enimde ke akpanikọ.

23 Mbemiso mbuọtidem edidi, ibet ekesin ñnyin ke ufin nte mbio ñkpọkọbi, tutu eyarade mbuọtidem.

24 Ke ntre ibet akakara ñnyin tutu Kraist edidi; man oto do enam ñnyin inen ye Abasi oto ke mbuọtidem. 25 Idahaemi ini mbuọtidem ama ekesim, ibet ikarake aba ñnyin. 26 Oto ke mbuọtidem ke kpukpru mbufo ekabade edi nditọ Abasi emi enyenede ebuana ye Kraist Jisọs. 27 Mbufo ekena babtisim ediana kiet ye Kraist, ndien kemi ema emen nti uwem Kraist ke idem esie esine mbufo nte ewura. 28 Ke ntem, ukpuhọde iduhọ ke ufọt mme Ju ye mme mmọ emi midighe Ju, ke ufọt ifin ye eyen, ke ufọt iren ye iban, mbufo kpukpru edi kiet ke ebuana ye Kraist Jisọs. 29 Edieke afo edide eke Kraist, afo oto ke ubon Ebraham, ndien afo eyenyuñ ọbọ se Abasi ọkọñwọñọde.