1 Mme nditọ ete mi, edieke emumde owo ndomokiet ke idiọkñkpọ, mbufo emi esọñde idem ke Spirit eneñede enye enim; edi enyene ndinam emi ke ifure ifure usuñ. Ndien ekpeme idem mbufo, man idomo edidomo mbufo ñko. 2 Eñwam ndibiom mbiomo kiet eken, ndien ke usuñ emi ke mbufo edinam se ibet Kraist oyomde. 3 Edieke owo ndomokiet ekerede ete ke imọ idi ñkpọ, ke ini enye midighe ñkpọ ndomokiet, ke akpanikọ, enye ada idem esie anam ndisime. 4 Owo kiet kiet enyene ndiduñọde edinam esie nse. Edieke ọfọnde, do ndien ke enye ekeme ndien nditaña ase ke se enye ke idem esie ama akanam, idighe ndimen ñkodomo ye se owo efen ama akanam. 5 Koro owo kiet kiet enyene ndibiom mbiomo esie.

6 Owo emi ọbọde ukpepñkpọ oto ikọ Abasi, enyene ndibuana kpukpru nti ñkpọ emi enye enyenede ye andikpep esie.

7 Kubiaña idem fo: koro owo baba kiet ikemeke ndida Abasi nnam ndisime. Owo edidọk ukem ukem se enye ọkọtọde. 8 Edieke enye ọkọtọde ke iñwañ inemesit idem esie, enye eyedọk idọk ñkpa oto ke esit, edi edieke enye ọtọde ke iñwañ Spirit, enye eyedọk idọk nsinsi uwem oto ke Spirit. 9 Do, ekuyak ñnyin ikpa mba ke edinam nti ñkpọ; koro edieke ñnyin mikpaha mba, ini eyedi emi ñnyin ididọkde idọk esie. 10 Ke ntre, adaña nte ñnyin inyenyene ifet, eyak ñnyin inam eti ñkpọ inọ owo kiet ekededi, akpanakpan ye mme mmọ emi edide kiet ye ñnyin ke ekpuk mbuọtidem.

11 Ese ikpọ ubọk ñwed emi ami ndade ñwet ñwed emi ke idem mi nnọ esọk mbufo. 12 Mme mmọ oro eyomde ndiwut idem ñnyuñ ñkpọ inua mbaña mme enyọñ enyọñ ñkpọ edi mme mmọ oro eñwanade ndinyik mbufo ena mbobi. Mmọ enam emi man otodo ukọbọ okusim mmọ kabaña Krọs Kraist. 13 Kpa ye idem mme mmọ oro enade mbobi isukke ibuot inọ ibet; mmọ eyom mbufo ena mbobi man mmọ eda etaña ase nte ke mbufo ema esuk ibuot enọ edinam obukidem emi.

14 Ama edi ami, ke usuñ kiet ekededi, ami ndibure mbure ke ntak Krọs Ọbọñ Jisọs Kraist ikpọñ ikpọñ, koro edi ke ntak Krọs Esie, ererimbot ama akpa ọnọ mi, ami ñko ñnyuñ ñkpa nnọ ererimbot. 15 Edina mbobi ye editre ndina mbobi iwọrọke ñkpọ ndomokiet; se idide akpan ñkpọ do edi, ndikabade ndi obufa obot. 16 Yak emem ye mbọm etiene kpukpru mme mmọ emi etienede mme item emi ke uwem mmọ ye kpukpru mme ikọt Abasi. 17 Ke akpatre: Yak owo baba kiet okufina mi aba, koro mme nde inia unan emi ñnyenede ke idem mi owut ete ke ami ndi ofin Jisọs.

18 Yak mfọn Ọbọñ ñnyin Jisọs Kraist odu ye Spirit mbufo kpukpru nditọ ete mi.