1 Uwọrọ ufin edi se ñnyin inyenede, Kraist osio ñnyin ke ufin! Esọñọ eda nte mme mmọ emi ema ekewọrọ ufin, ekuyak idem mbufo efiak esin ke ufin. 2 Ekpañ utọñ! Ami Pọl ntiñ emi nnọ mbufo nte edieke eyakde enim mbufo mbobi, oro ọwọrọ ete ke Kraist inyeneke ufọn inọ kpukpru mbufo. 3 Inikiet efen ke ami nduri owo kiet ekededi utọñ, emi ediyakde idem esie inọ enim enye mbobi nte ke ana enye enim kpukpru ibet. 4 Mbufo oro eñwanade ndinen ke iso Abasi nto ke edinim ibet emesibe idem mbufo ekpọñ Kraist. Mbufo emewọrọ ekpọñ mfọn Abasi.

5 Edi ama edi ñnyin, idorenyin edi ke Abasi eyenam ñnyin inen ke iso Esie; ndien emi edi se ñnyin isuk ibetde ke odudu Spirit Abasi emi adade mbuọtidem ñnyin esin ke edinam. 6 Koro ke ini ñnyin idianade kiet ye Kraist Jisọs, edina mbobi mme unana edina mbobi inamke ukpuhọde ndomokiet, ke usuñ ndomokiet; edi se idide akpan ñkpọ do edi mbuọtidem emi asañade ye ima anam utom.

7 Mbufo ema enam ọfọn. Anie enam mbufo etre ndisuk ibuot nnọ akpanikọ? Didie ke enye akatap mbufo? 8 Ikedighe Abasi emi okotde mbufo akanam. 9 Mme owo etiñ ete, "Ekpri esisit ibọk unam uyo anam ofuri ndom unam uyo emi ema ekebuak ọtọt".

10 Edi ami ke ñyenyene idorenyin ke idem mbufo. Ebuana ñnyin ke Ọbọñ anam mi nnim ke akpanikọ nte ke mbufo idinyeneke ekikere efen, ndien owo emi añwanade nditimede mbufo, se enye ekpededi, eyebọ utib edinam esie.

11 Edi ama edi ami, nditọ ete, ntak ukọbọ osuk ọkọbọde mi edieke ami ñkade iso ndikwọrọ nte ke ana mbufo ena mbobi? Edieke oro ekpedide akpanikọ, edikwọrọ mbaña Krọs Kraist ikpedaha mfina ndomokiet idi. 12 Edi udọñ mi nte mme mmọ oro etimerede mbufo ekpekam enam ewut ofuri ofuri ke edinam idem mmọ itọ. 13 Ama edi mbufo nditọ ete mi; ekekot mbufo esioño ke ufin. Edi ekuyak Uwọrọ ufin emi edi ntak emi mbufo edade idem mbufo enam se idọñde obukidem mbufo itọñ. Utu ke oro, eyak ima anam mbufo enam ñkpọ enọ kiet eken. 14 Koro efut ofuri mme ibet esin ke ewuhọ kiet: "Ma mbọhọiduñ fo nte afo amade idem fo". 15 Edi, edieke mbufo enamde ñkpọ nte mme unam ikọt enamde kiet eken ñkpọ ubiak, enyuñ enọ kiet eken unan, ekpeme, ke midighe ntre mbufo eyesobo idem mbufo.

16 Se ami ñketiñde edi ntem: eyak Spirit ada mbufo usuñ ke uwem emi, ndien mbufo idinuhọke inọ itọñ obukidem mbufo. 17 Koro se obukidem ñnyin oyomde atuaha ye se Spirit oyomde, ndien se Spirit oyomde atuaha ye se obukidem oyomde. Mbiba edi mbon usua, emi ọwọrọde ete ke mbufo ikemeke ndinam se mbufo ekpemade ndinam emi edide eti. 18 Edieke Spirit adade mbufo usuñ mbufo iduhọ ke idak ibet Moses.

19 Se obukidem idiọkñkpọ anamde ana añwa añwa. Enye ọwọrọ owut idem esie ke use, efibe, mbubiam ido, obukpo ido, 20 edikpono ndem ye ifọt. Usua ye kiet eken, eñwan, idiọk ufup, obom obom esit, utọk, ndomo idem, ubahade, ntiense edem, etabi, ye editiñ ntime ntime ikọ mbaña Abasi ye utom esie ye edisiak isio ñka. 21 Udu, uwot owo, ukpammin, mme mbubiam ñka inemesit, ye mme ñkpọ eken eke ebietde mme mmọ emi. Ami moduri mbufo utọñ nte mma ñkododuri akpa nte, mme mmọ emi enamde mme ñkpọ emi idinyeneke udeme ke obio ubọñ Abasi.

22 Edi mme mfri Spirit edi ima, idara, emem, ime, mfọnido, eti ido, edinam akpanikọ, 23 nsuhọde idem, mfarakeidem. Ibet ndomokiet ituahake ye mme oruk nti mfri ntem.

24 Ndien mme mmọ emi edide eke Kraist Jisọs ema ewot obukidem ye kpukpru mme idiọk udọñ esie.

25 Spirit ama ọnọ ñnyin uwem, enye ñko enyene ndikara uwem ñnyin. 26 Ñnyin inyeneke ndidi mbon ntañidem, mme ndiyat kiet eken esit, mme ndifube kiet eken.