1 Ñwed emi oto Pọl emi ikot esie ndidi isuñutom ikotoho ke owo, ikonyuñ ibehe ke ubọk owo, edi okoto Jisọs Kraist, ye Abasi Ete, emi ekemenerede enye osio ke ñkpa. 2 Kpukpru mme nditọ ete emi edude mi ye ami edian uyo ke ndinọ ekọm esọk ufọk Abasi ke Kalesia. 3 Yak Abasi Ete ñnyin ye Ọbọñ Jisọs Kraist ọnọ mbufo mfọn ye emem. 4 Man ekeme ndifak ñnyin nsio ke oburobut emana emi, Kraist ama ayak uwem esie ọnọ ke ibuot mme idiọkñkpọ ñnyin ke ndisuk ibuot nnọ uduak Abasi ye Ete ñnyin. 5 Ubọñ enyene Abasi ke nsinsi nsinsi Amen.

6 Idem akpa mi ye mbufo, nte ibighike bighi, mbufo emedadiañade nsaña ye enyemi okokotde mbufo oto ke mfọn Kraist, ndien ebine uduot ukwọrọ ikọ efen. 7 Ke editim ntiñ, uduot Eti Mbuk efen iduhọ, edi ami ntiñ emi, koro mme ndusuk owo edu emi eñwanade nditimede mbufo man ekpuhọrede eti etop Kraist.

8 Ekpededi ñnyin mme mme enjel eto enyọñ edikwọrọ eti etop emi ọkpuhọrede ọkpọñ enye emi ñnyin ikọkwọrọde inọ mbufo, yak emia enye ufen ke nsinsi ke ikañ ndutuhọ. 9 Ñnyin ima itetiñ akpa, ami mfiak ntọñọ ntak ntiñ, nte edieke owo baba kiet ọkwọrọde mbuk efen emi ọkpuhọrede ọkpọñ eti mbuk emi mbufo ekenyimede enyuñ ebọde eto ñnyin, yak emia enye ufen ke ikañ ndutuhọ.

10 Nte emi owut nte ami ññwana ndibọ edinyime nto owo? Baba! Ami ñyom unyime Abasi. Nte ami ññwana nte mme owo ediọñọde mi? Edieke ami ñkpakade iso ndinam ntre, ami ñkpedighe isuñutom Kraist.

11 Yak ami ntiñ nnọ mbufo, nditọ ete mi, nte, ke Eti Mbuk emi ami ñkọkwọrọde idighe ñkpọ emi ubọk owo akanamde. 12 Ami ñkọbọhọ nto baba owo ndomokiet, inyuñ inyeneke nte owo baba kiet ekekpepde mi. Ekedi Jisọs Kraist ke idem esie akayarade ọnọ mi.

13 Ema etiñ enọ mbufo ebaña usuñ emi ñkodude uwem kini emi ami ñkanamde akpanikọ ye ido ukpono mme Ju, nte ami ñkọkọbọde ufọk Abasi Kraist, ñkekopke mbọm, ñkenyuñ nnamde kpukpru se ñkekekeme ndibiat enye nsio. 14 Ami ñkedi adaiso ke otu ubọk ñka mi, emi edide Ju, ke edinam ñkpọ nnọ ido ukpono mme Ju. Ami mma nsin ifik eti eti ke edinam mme ido emana mme ete ete ñnyin.

15 Edi Abasi, ke akwa mfọn Esie, ama emek mi mbemiso ami mmana onyuñ okot mi ndinam ñkpọ nnọ Enye, ndien Enye ama ebiere 16 ndiyarade Eyen esie nnọ mi, man oto do ami ñkwọrọ Eti Mbuk emi abañade Enye nnọ mme mmọ emi midighe ubon mme Ju, ami ñkakaha ebiet ndomokiet ñkọbọ item.

17 Mme ami ndika Jerusalem ñkekut mme mmọ oro ekebemde mi iso edi mme mbet, edi ami mma ndaha inikiet ñka ke obio Arabia ebiet emi ami ñkotode mfiak ndi obio Damaskọs. 18 Ekedi ke ñkpọ nte isua ita ama ekebe ke ami ñkeka Jerusalem ndibọ item nto Pita, ndien ami ñkodu ye enye ke ñkpọ nte urua iba. 19 Ami ñkekwe mbet ndomokiet efen ke ebede Jems, eyen eka Ọbọñ. 20 Ami ntiñ emi ke iso Abasi nnọ mbufo nte se ami ñwetde emi idighe nsu. 21 Ekem, ami mma ñka ke mme ebiet ke obio Siria ye ke Silisia. 22 Ke ini oro, mme mbon ufọk Abasi Kraist ke Judia ikediọñọke mi. 23 Mmọ ekekop etop emi ekedọhọde ete, "owo oro ọkọkọbọde ñnyin ke ọkwọrọ mbuọtidem emi enye akañwanade ndibiat idaha emi." 24 Ndien, mmọ ema etoro Abasi ke ntak mi.