1 Ñwed emi oto Pọl emi edide mbet Jisọs Kraist oto ke uduak Abasi. Ewet enọ ikọt Abasi emi edude ke Efisọs, mme mmọ emi enamde akpanikọ ke uwem mmọ ke Kraist Jisọs. 2 Abasi Ete ñnyin ye Ọbọñ Jisọs Kraist akpakam ọnọ mbufo mfọn ye emem. 3 Eyak ñnyin inọ Abasi ye Ete Ọbọñ ñnyin Jisọs Kraist ekọm! Koro Enye ọmọdiọñ ñnyin ke ebuana ñnyin ye Kraist, ke edinọ ñnyin kpukpru mme enọ Spirit emi edude ke enyọñ.

4 Mbemiso ekenanam ererimbot, Abasi ama ememek ñnyin ndidi Esie ke Kraist, man otodo ñnyin ikpedi edisana inyuñ inana ndo ke iso Esie ke ntak ima Esie. 5 Abasi ama ebebiere ete ke eyeto ke Jisọs Kraist, iyeda ñnyin inọ idem Esie nte mme nditọ Esie, emi ekedi uduak ye inemesit Esie.

6 Eyak ñnyin itoro Abasi ke utibe mfọn Esie, kabaña enọ mfọn emi Enye ọkọnọde ñnyin ke ntak edima Eyen Esie! 7 Oto ke ñkpa Kraist ekpọk ñnyin eyak, oro edi, efen mme idiọkñkpọ ñnyin, nte asañade ekekem ye uwak mfọn Abasi, 8 emi Enye ọkọnọde ñnyin utọ akwa udomo oro, ke kpukpru ifiọk ye ọniọñ Esie.

9 Abasi ama anam se Enye akaduakde, onyuñ anam idiọñọ mme ndedibe uduak emi Enye ama ekebebiere ndinam ọfọn ama ke Kraist. 10 Uduak Abasi emi enye edinamde ọfọn ama ke ini ama ekem, edi nditañ kpukpru se enye okobotde mbok ebiet kiet, kpukpru ñkpọ, ke enyọñ ye ke isọñ ndien enye onim Kraist nte ibuot. 11 Enam kpukpru ñkpọ esaña nte ubonñkpọ ye uduak Abasi edide; ndien Abasi emek ñnyin ndidi ikọt Esie ke edidiana kiet ye Kraist ke ntak uduak Esie, emi asañade ekekem ye se Enye ama ekebebiere toto ke editọñọ. 12 Eyak ñnyin ndien, emi ikebemde iso inyene idorenyin ke Kraist, itoro ubọñ Abasi!

13 Ndien kpa ntre ke ekedi ye mbufo ñko, ke ini emi mbufo ekekopde etop emi edide akpanikọ, Eti Etop emi akadade edinyaña ọsọk mbufo, mbufo ema enim Kraist ke akpanikọ ndien Abasi ama efik mbufo ufikñkpọ inyene Esie ke edinọ mbufo Edisana Spirit emi Enye ọkọñwọñọde. 14 Spirit etie ubiọñ ọnọ ñnyin ndibọ se Abasi ọkọñwọñọde ọnọ ikọt Esie, onyuñ ọsọñ ñnyin esit nte ke Abasi mme mmọ emi edide Esie ọyọhọ uwọrọ ufin. Eyak ñnyin itoro ubọñ Esie!

15 Ke ntak emi, ọtọñọ nte ami ñkokop mbaña mbuọtidem mbufo ke Ọbọñ Jisọs, ye ima emi mbufo enyenede enọ ofuri ikọt Abasi, 16 ami ñketreke ndinọ Abasi ekọm kabaña mbufo. Ami nteti mbufo ke akam mi. 17 Ñnyuñ mbeñe Abasi Ete, Ọbọñ ñnyin Jisọs Kraist, utibe Ete, ndinọ mbufo Spirit emi edinamde mbufo efiọk ñkpọ, onyuñ ayarade Abasi ọnọ mbufo man mbufo ediọñọ Enye. 18 Ami mbeñe nte esit mbufo akpakam eberede ndikut uñwana Esie, man otodo mbufo ekpediọñọ se idide idorenyin emi Enye okokotde mbufo esin ke esit, ye nte mme utibe edidiọñ awakde emi enye ọñwọñọde ọnọ ikọt Esie, 19 ye nte ọkpọsọñ odudu esie akade iso ndinam utom ke idem ñnyin emi inimde ke akpanikọ. Odudu emi odude ke ñnyin etie ukem ukem nte ọkpọsọñ odudu, 20 emi enye akadade anam Kraist eset ke ñkpa, ndien etem Enye ke ubọk nnasia Esie ke Obio ubọñ Abasi, 21 Kraist okoñ do akan kpukpru mme odudu, ukara ke enyọñ, mme odudu, mme ukara, ye mme mbọñ, Enye okoñ akan kpukpru se ekpekokot odudu ke ererimbot emi ye ke ererimbot enye emi edidide. 22 Abasi ada kpukpru ñkpọ esin ke idak ikpat Kraist, onyuñ emen Enye ọnọ ufọk Abasi nte ñkoññkan Ọbọñ emi akarade kpukpru ñkpọ. 23 Ufọk Abasi edi ikpọkidem Kraist uyọhọ Esie, emi Enye ke idem Esie ọyọhọde kpukpru ñkpọ ke kpukpru usuñ.