1 Ke ntak emi, ami Pọl, owo ñkpọkọbi Kraist Jisọs, mbọñ akam nnọ Abasi mbaña mbufo emi midighe ubon mme Ju. 2 Eyighe iduhọ ke se mbufo ekekopde ete ke Abasi ke mfọn Esie, ọnọ mi utom emi, ndinam ke ufọn mbufo. 3 Abasi amayarade ndedibe uduak Esie; onyuñ anam mi ndiọñọ mmọ. Ami mma ñwet ibio ibio ñkpọ mbaña ñkpọ emi. 4 Ndien edieke mbufo edikotde se ami ñkewetde, mbufo eyediọñọ nte mme ndibe ñkpọ Abasi akañwañade mi. 5 Ke mme ini emi ekebede iketiñke ndibe ñkpọ emi inọ mme owo, edi Abasi ayarade enye idahaemi oto ke Spirit Esie ọnọ mme ndisana Mbet ye mme ndisana mme Asiak uduak Esie.

6 Ndibe ñkpọ oro edi emi: Ke ntak Eti Etop emi, mme mmọ emi midighe ubon mme Ju, enyene udeme ye mme Ju ke mme edidiọñ Abasi; mmọ edi kiet ke ikpọkidem kiet emi, enyuñ ebuana ke mme eñwọñọ emi Abasi akanamde ke Kraist Jisọs. 7 Ekenam mi ndi asañautom Eti Etop emi oto ke asaña asaña enọ Abasi, emi Enye ọkọnọde mi oto ke utom emi odudu Esie akanamde ke idem mi.

8 Ami ñkpri ñkan enye emi ọsuhọrede akan ke otu ikọt Abasi, kpa ye oro, Abasi ama ọnọ mi ifet emi, ndimen Eti Mbuk emi nsọk mme mmọ emi midighe mme Ju, emi otukde anana mbiet inyene emi odude ke Kraist, 9 ye ndinam kpukpru owo ekut nte enyenede ndida mme ndibe uduak Abasi nsin ke edinam. Abasi emi edide Andibot kpukpru ñkpọ, ama edip mme ndedibe uduak Esie ke kpukpru mme isua edem emi ekebede.

10 Man otodo, ke ini emi, oto ke ntak ufọk Abasi, mme enjel emi ekarade, ye mme odudu ke ererimbot enyọñ ekpediọñọ ifiọk Abasi, ke kpukpru mme nsio nsio uduot Esie. 11 Abasi akanam emi nte nsinsi uduak esie asañade, emi Enye akanamde osu ke Kraist Jisọs Ọbọñ ñnyin.

12 Ke edidiana kiet ye Enye, ye ke mbuọtidem ñnyin ke Enye, ñnyin iminyene unen ndiduk iso Abasi ye ọyọhọ uko.

13 Ami mekpe mbufo ubọk, nte yak esit oku timerede mbufo, ke ntak emi ami ñkutde ukut ke ibuot mbufo, kpukpru edi ke ufọn mbufo. 14 Ke ntak emi, ndien, ami nduọ ke edọñ mi ke iso Ete, 15 Enye emi kpukpru ekpuk Abasi ke obio Ubọñ Abasi ye mi ke isọñ ebọde ata enyiñ mmọ. 16 Ami mbeñe Abasi, oto ke ubọñ Esie emi minyeneke adaña, ndinọ mbufo odudu emi otode ke Spirit Esie man mbufo ekop nsọñidem ko ke ata esitesit idem mbufo, 17 ndien Kraist akpanam ebiet iduñ Esie ke esit mbufo, oto ke mbuọtidem. Ami mbọñ akam nte yak mbufo enyene oruñ mbufo ke ima, 18 man otodo, ke edidiana ọtọ kiet ye kpukpru ikọt Abasi, ekpenyene odudu ndidiọñọ nte ima Kraist atarade, onyuñ ọniọñde, onyuñ okoñde, onyuñ ọtuñọde. 19 Ih, man mbufo ediọñọ ima Esie, okposuk edi emi owo mikemeke ndidiọñọ ima emi ọyọhọ ọyọhọ, man otodo eyọhọ mbufo ọyọhọ ọyọhọ ye mfọnmma Abasi.

20 Ubọñ enyene Enye emi ekemede ndinam ñkan nte ñnyin ibeñede Enye, mme ndikere mbaña, nte asañade ekekem ye odudu Esie emi anamde utom ke idem ñnyin. 21 Ubọñ enyene Abasi ke ufọk Abasi ye ke Kraist Jisọs, ke kpukpru ini, ke nsinsi nsinsi! Amen.