1 Ami emi ndide owo ñkpọkọbi ke ntak edinam ñkpọ nnọ Ọbọñ, mekpe mbufo ubọk nte yak edu uwem emi ọdọkde akada ke idaha emi Abasi enimde ke ini emi Enye okokotde mbufo. 2 Esuhọde idem, enyene emem emem ido, enyuñ enyene ime kpukpru ini. Ewut ima mbufo ke ndinọ kiet eken uñwam. 3 Edomo ukeme mbufo ndikpeme edidiana ọtọ kiet emi Edisana Spirit ọnọde, oto ke emem emi ọbọpde mbufo adian ọtọ kiet.

4 Ikpọkidem kiet ye Spirit kiet odu, ukem nte ekenyuñ ekotde mbufo esin ke idorenyin kiet, ke ini Abasi okokotde mbufo. 5 Ọbọñ kiet odu, ye mbuọtidem kiet, ye babtisim kiet; 6 Abasi kiet odu, emi edide Ete kpukpru owo, emi edide Ọbọñ kpukpru ñkpọ, emi anamde ñkpọ ebe ke kpukpru ñkpọ, onyuñ odude ke kpukpru ñkpọ. 7 Enọ ñnyin kiet kiet asaña asaña enọ, nte Kraist abaharede obon.

8 Kpa nte ikọ Abasi ọdọhọde, ete, "Ke ini emi Enye ọkọdọkde ke ata enyọñ, Enye ama ada mme mbuot ekọñ ọdọk; Enye ama onyuñ ọnọ mme owo mme enọ" 9 Ke emi, nso ke, "Enye ama ọdọk ke enyọñ" ọwọrọ? Emi ọwọrọ ete ke akpa itie Enye ama ọsuhọde edi, oro edi, ọsuhọde edi ke ata idak isọñ ererimbot. 10 Ke ntre, kpa Enyemi ọkọsuhọrede edi, edi Enye ọkọdọk ke enyọñ ebe mme enyọñ, man Enye ọyọhọ enyọñ ye isọñ ye iso Esie.

11 Edi Enye ọkọnọ mme owo enọ, Enye ama emek ubak owo ndidi mme Ọbọsuru, ndusuk ndidi mme Asiak Uduak Abasi, ndusuk, mme ọkwọrọ ikọ, ndusuk ndidi mme ekpeme erọñ, ye mme andikpep.

12 Enye akanam emi man ebeñe kpukpru ikọt Abasi idem ọnọ utom Obio Ubọñ Abasi, man ebọp ikpọkidem Kraist. 13 Ke edinam ntem ñnyin iyekot idem ñnyin ibok ọtọ kiet, ke mbuọtidem kiet, ye ke ifiọk emi ñnyin idade idiọñọ Eyen Abasi, man ñnyin ikabade idi mbon emi iyọhọde ke ifiọk Abasi, inyuñ inyenede ñkoñkoñ idaha ke ọyọhọ idaha emi Kraist akadade.

14 Ke ntre ñnyin ididighe aba nditọ ọwọñ, emi ofum nsu nsu ukpep ediwobide itop mi ye ko, oto ke ubọk mbio nsu emi edade mme owo ewaha ekpọñ usuñ ke idak ñkari emi mmọ esiakde mbufa. 15 Utu ke oro, ke editiñ akpanikọ ke spirit ima, ñnyin inyene ndikọri ke kpukpru usuñ ndọk mbine Kraist emi edide ibuot. 16 Ke idak ukara Esie kpukpru mme mbak ikpọkidem ebaba ọtọ kiet, ndien mme ndido emum ofuri ikpọkidem ekama nte ekenamde mmọ. Ke ntre, ke adaña emi ndido kiet kiet enamde utom nte akpanade mmọ enam, ofuri ikpọkidem ọkọri onyuñ ọbọp idem esie ada ke ima.

17 Ke enyiñ Ọbọñ, ndien, ke ami ntiñ emi, ñnyuñ nduri mbufo utọñ nte, ekudu aba uwem nte mme mmọ emi midiọñọke Abasi, emi ekikere mmọ edide ikpuikpu, 18 emi esit mmọ ñko esinede ke ekim. Mmọ inyeneke udeme ke uwem emi Abasi ọnọde, koro mmọ enanade ifiọk ofuri ofuri enyuñ etunde itun. 19 Mmọ inyeneke aba iso obut, mmọ eyak idem mmọ; enọ mme oburobut ido, enyuñ enam kpukpru mme oruk ñkpọ emi midotke, inyeneke aba mfarakeidem.

20 Oro idighe se mbufo ekekpepde ebaña Kraist! 21 Ke akpanikọ mbufo, ema ekop ebaña Enye, ndien nte mme anditiene Enye, ema ekpep mbufo akpanikọ emi odude ke Jisọs. 22 Do, esio akani obot mbufo efep, emi akanamde mbufo edu uwem nte oro mbufo ekedude, akani obot emi idiọk udọñ abiaña okowotde enye.

23 Ana enam esit ye ekikere mbufo edi obufa ofuri ofuri. 24 Mbufo enyene ndimen obufa obot nsine emi ebotde ke mbiet Abasi, onyuñ ayararede idem esie ke ata uwem emi edide nnen nnen ye edisana.

25 Ekusu aba nsu. Kpukpru owo enyene nditiñ akpanikọ ye eyen eka esie, koro kpukpru ñnyin idide nsaña kiet ke ikpọkidem Kraist. 26 Edieke esit ayatde mbufo, ekuyak iyaresit ada mbufo ke edinam idiọkñkpọ, ekunyuñ eyak iyaresit mbufo ebighi esim ofuri usen. 27 Ekunọ Setan ifet.

28 Owo emi ekesiwode ñwo yak enye okuwo aba, edi ọtọñọ ndida ubọk esie nnam utom, man enyene utib ke nnen nnen usuñ ndida mbọk idem esie, ñnyuñ ñkeme ndida ññwam mme mmọ efen emi minyeneke. 29 Ekuyak ndiọi ikọ ewọrọ mbufo ke inua ke ini emi mbufo etiñde ikọ. Etiñ mme ikọ emi añwamde añwam, mme uduot ikọ emi ekemede ndidọdiọñ, ñnyuñ nnọ se inanade, man otodo se mbufo etiñde akpanam ufọn ọnọ mme mmọ emi ekpañde utọñ enọ mbufo.

30 Ñko, ekuyak Edisana Spirit Abasi ọfuhọ, koro oro edide idiọñọ inyene Abasi ke idem mbufo, emi edi ubiọñ nte ke usen eyedi emi edinyañade mbufo.

31 Etre kpukpru idiọk esit, ifutesit ye iyaresit. Utọk ye isuñi okudu aba. Udu usua ke uduot ekededi okudu aba. 32 Ekabade efọn ido enyuñ ekop kiet eken mbọm eñyuñ edaha do enọ kiet eken, nte Abasi akadahadedo ọnọ mbufo ke Kraist.