1 Ke ini emi ekebede mbufo ema ekpaña ke spirit ke ntak ntututọñ ye mme idiọkñkpọ mbufo. 2 Ke ini oro mbufo eketiene mme oburobut usuñ ererimbot, ekesuk ibuot enọ mme odudu spirit emi ekarade ke ufum enyọñ, kpa spirit emi akarade mme mmọ emi esọñde ibuot ye Abasi. 3 Ke ofuri akpanikọ kpukpru ñnyin iketie nte mmọ, ikonyuñ idu uwem itiene nte idiọkitọñ obukidem ñnyin okoyomde, ikonyuñ inam se ededi emi akasañade ekekem ye se esit ye obukidem ñnyin ekerede. Nte kpukpru mme mmọ eken, akana ñnyin ñko itiene ibọ ufen iyaresit Abasi.

4 Edi mbọm Abasi awak eti eti, ima Esie ye ñnyin onyuñ okpon, 5 koro kadaña emi ñnyin ikakpañade ke spirit ke idak ntututọñ ñnyin, Enye ama osio ñnyin esin ke uwem ye Kraist. Edi ke mfọn Abasi ke ekenyaña ñnyin. 6 Ke edidiana ñnyin kiet ye Kraist, Enye ama emenede ñnyin ke enyọñ ye Enye man ñnyin ikara ye Enye ke Obio Ubọñ Abasi. 7 Enye akanam emi ndiwut nte uwutñkpọ ke mme eyo emi edidide, ndiwut utibe odudu mfọn esie ke ima emi enye owutde ñnyin ke Kraist.

8 Koro edi ke mfọn Abasi ke ekenyaña mbufo, oto ke mbuọtidem. Itoho ke se mbufo enamde, edi, edi enọ Abasi. 9 Ñkpọ ndomokiet iduhọ mi, emi owo akpadade ataña ase, koro edinyaña mitoho ke ntak nsinifik utom emi ñnyin inamde. 10 Abasi edi andibot ñnyin, ndien ke edidiana ñnyin kiet ye Kraist Jisọs Enye omobot ñnyin ọnọ uwem nti utom emi Enye ama ekebebeñe ñnyin idem enim ndinam.

11 Ekufre ete ke ini ama odu emi mbufo ekedide mme mmọ emi mikenimke Abasi ke akpanikọ, emi mme Ju emi ekekotde idem mmọ mme ana mbobi, ekekotde mbufo mbio edut (emi okotuk se owo akadade ubọk esie anam). 12 Ke mme ini oro mbufo ekeda nsan nsan ye Kraist. Ekedi mme isenowo, mbufo ikọduhọ ke otu mme mmọ emi Abasi ekemekde. Mbufo ikenyeneke ebuana ke mme ediomi emi okodorede ke mme eñwọñọ emi Abasi akanamde ọnọ ikọt Esie. Mbufo ekeduñde ke ererimbot emi ikenyeneke idorenyin, ikonyuñ inyeneke Abasi.

13 Edi idahaemi, ke edidiana kiet ye Kraist, mbufo emi ekedade nsan nsan, eda mbufo esaña ekpere oto ke ñkpa Kraist.

14 Koro Kraist ke idem Esie ama ada emem ọsọk ñnyin, ke edinam mme Ju ye mme mmọ emi midighe mme Ju edi idut kiet kiet. Enye akada ikpọkidem Esie owuri ibibene emi akabaharede mmọ onyuñ anamde mmọ edi mbio usua. 15 Enye ama abiat mbet mme Ju, ye mme ewuhọ ye ido ukara mmọ, man otodo Enye obot oto idut iba emi, obufa idut kiet emi edidianade kiet ye Enye, ke utọ usuñ emi ke Enye aka iso ndinam emem. 16 Ke ntak ñkpa Esie ke Krọs, Kraist ama abiat usua emi okodude, oto ke ntak Krọs Enye ama ada idut iba emi adian, ndien mmọ ewọrọ ikpọkidem kiet, ndien Enye ama ada mmọ afiak edem ọsọk Abasi. 17 Ke ntem, Kraist ama edi, onyuñ ọkwọrọ Eti Etop emem emi ọnọ kpukpru owo, ọkwọrọ ọnọ mbufo mme mmọ emi midighe mme Ju emi ekedade nsan nsan ye Abasi, onyuñ ọkwọrọ ọnọ mme Ju, emi ekekperede Enye. 18 Oto ke Kraist, ke kpukpru ñnyin, mme Ju ye mme mmọ emi midighe mme Ju inyene ukeme ke Spirit kiet ndiduk iso Ete.

19 Ke ntem mbufo mmọ emi midighe mme Ju idighe isenowo; mme mme ntondi aba; idahaemi mbufo eyedi nditọ isọñ ye ikọt Abasi, ye nditọ ekpuk Abasi.

20 Ebọp mbufo ñko edori ke itiat idak isọñ emi mme Ọbọsuru ye mme Asiak uduak Abasi ekesinde, emi itiat inuk edide Kraist Jisọs ke idem Esie. 21 Edi Enye omum ofuri ufọk adian ebiet kiet onyuñ anam enye ọkọri ọkọwọrọ edisana ebiet ke Ọbọñ. 22 Ke edidiana ye Enye, enyuñ ebọp mbufo ọtọ kiet edian ye kpukpru mme mmọ eken, ndien mbufo ekabade edi ufọk emi Abasi oduñde oto ke Spirit Esie.