Nascimento de Jesus

4 Chipindi chija chilondeke vichivikile, Mulungu kamlagiza Mwanage muiisi ino. Mwanage iyo yaleligwe na mwanachike, kakala yagogigwe na ndagizi za Wayahudi, 5 yapate kuwakombola waja wagogigwe na ndagizi ili cheye Wayahudi chitendigwe wana wa Mulungu.

16 Manake Mulungu kana wende ng’hani na wanhu wa muuisi zose, mbaka kamlava mwanage waiyeka, ili chila munhu yomtogola sekeyage, mbali yapate ugima ulibule uhelelo.

Kuvumbuka kwa Yesu

18 Ivo kuvumbuka kwa Yesu Kilisito kukala vino: Malia mami yake Yesu kakala kalaviligwa vilama na Yusufu, mbali wang’hali hawanafunga zengele Malia koneka kamha inda kwa udaho wa Muhe wa Mulungu.

20 Viyakalile yang’hali yoitonga mbuli iyo mtumigwa wa kwa Mulungu kamlawila mzi nzonzi, kamlongela, "Yusufu, mwana Daudi, sekeudumbe kumsola Malia yawe mwehe wako, manake inda yeli nayo ya udaho wa Muhe wa Mulungu. 21 Nayo koibasula mwana wa chilume na gweye komwing’ha zina da Yesu, manake iyo yonda kuwalohola wanhu wake kulawa mmalozo gao." 22 Ivo, ganogose galawilila ili divikile dija Mndewa diyalongile kubitila mlagusi wa Mulungu kua, 23 "Mvimanye mhambe kokwamha inda, kolela mwana wa chilume, nao womkema zina jake Emanueli," manake, "Mulungu kahamwe na cheye." 24 Yusufu viyalamke kulawa mzinhongo katenda kama vialagizigwe na mtumigwa wa kwa Mulungu, kamsola Malia kuwa mwehe wake. 25 Mbali Yusufu hammanyile mwehe wake mbaka viyaibasule mwana wa chilume. Nayo Yusufu kamwing’ha zina, kamkema Yesu.

30 Baho mtumigwa wa kuulanga kwa Mulungu kamlongela, "Malia sekeudumbe, gweye kupata ng’hekewa ya Mulungu." 31 Kwavija kopata inda na kulela mwana wa chilume na komkema zina jake Yesu. 32 Nayo kokuwa na Undewa, ivija kokemigwa Mwana wa yeli Kuchanha ng’hani. Mndewa Mulungu komwing’ha Ufaume kama Tata yake Daudi, 33 koilongoza ulelo wa Yakobo halibule uhelelo, na ufaume wake wabule uhelelo!"

4 Yusufu nayo kalawa kae ya Nazaleti ili Galilaya, kuita, Betelehemu muikae Yudea kae ya Daudi, Yusufu kaita uko kwavija yeye wa lukolo wa Daudi. 5 Kaita uko ili yandikigwe hamwe na Maliamu mwehe yamlavile pamvu nayo kakala na inda, 6 ivo, viwakalile uko Betelehemu, mazua gake kuibasula chimvikila. 7 Kamlela mwanage wachilume wa chaudele na kamvaza vikumbi, kamtambaliza mdidogo disongoligwe da kudila ng’ombe kwavija hawapatile hanhu hakuwasa mzikae za wageni.

10 Mbali mtumigwa wa kuulanga kwa Mulungu kawalongela, "Sekemdumbe! Kwa vija nie niwagalila Usenga unogile yonda iweng’he ndeng’helo ng’hulu kwa wanhu wose. 11 Kwavija lelo muikae ya Daudi kaleligwa mlohozi kwa mbuli yenu, iyo Kilisito Mndewa! 12 Na vino vokua vilaguso kumwenu, momvika mwana kavazigwa vikumbi, kawasa mdigogo disongoligwe kwa kudila ng’ombe.

15 Viwasegele waja watumigwa kuita kuulanga kwa Mulungu, waja wasusilaji wailongela, "Haya na chiteni mbaka Beselehemu, chikalole gaja galawilile, mbuli ziyachilongele Mndewa."

16 Walopola kuita Betelehemu wamvika Maliamu na Yusufu na ija mwana ching’hele katambalalizwa mdigogo disongoligwe da kulisila ng’ombe. 17 Viwamonile imwana, wapwililisa gaja gawalongiligwe na mtumigwa wa kuulanga kwa Mulungu kwa mbuli ya mwana io. 18 Wose wahulike wakanganyika ng’hani kwa gaja gawalongiligwe na wasusilaji wa ngh‘ondolo.

37 Amala Pilato kamlongela Yesu, "Ivo gweye ni Mfaume?" Yesu kamwidika, "Gweye kulonga kua niye na Mfaume. Niye nileliligwa kwa mbuli iyo, na kwa mbuli iyo niza muiisi kuwalongela wanhu kwa mbuli ya kweli. Chila munhu yowinza ukweli konitegeleza."

9 Viwamtegeleze mfaume, waja wanhu weli na ilimu ya nhondo wasegela. Kumbe ija nhondo iwaonile ubanzi wa usimbukilo wa zua iwalongolela iita ima hachanha ha hanhu haja hayali imwana.

10 Viwaionile nhondo ija wadeng’helela ng’hani. 11 Ivo, wengila mng’anda, wamuona ija mwana na Malia mami yake, waja wanhu watumbala mavindi, wamfugamila. Amala wafungula mbahasha zao, wamwing’ha nhunza, ikala zahabu, ubani na mavua ga manemane.

12 Mulungu kawalalika mzi nzozi seke wabwele kwa Helode," wabwela mzikae zao kwa kubitila nzila imwenga.