1 Viibitile milao kumi na mine, niita kaidi Yelusalemu hamwe na Balinaba, na ivija nimsola Tito hamwe na cheye. 2 Niita uko kwavija Mulungu kakala kanifunulila niite uko. Mchigwena, niwalongela vilongozi wao mbuli ya Usenga Unogile uniuligule kwa wanhu haweli Wayahudi. Nhenda ivo giladi ili sang'hano yangu inisang'hane na ija inisang'hana sambi, sekeyage bule. 3 Waitogolela na nie hata miangu Tito ija mgiliki, hawamswangize yengile kumbi, 4 hata yahawa kukala na mbwiga wamwenga wa uvwizi walondile yengile kumbi. Wanhu wano wengila kwa ubala na kulolesa vichikala goya kwa kuilinga na Kilisito Yesu, ili wachitende watumwa wa ndagizi za Musa, 5 mbali hachiitogolele nao hata chidodo ili ija kweli ya Usenga Unogile ukale na mweye mazua gose.

6 Vilongozi wao watogoligwa ng'hani hawakalile na mbuli imwenga yakunilongela. Enaa, watogoligwa ng'hani mbali kumwangu iyo si chinhu, kwavija Mulungu hamuonela munhu. 7 Badili yake, wavimanya kua Mulungu kakala yanhumile kuligula Usenga Unogile kwa wanhu wa isi zimwenga kama vija Petulo viyakalile katumigwa kuligula kwa Wayahudi. 8 Mulungu ija yamdahize Petulo kua msenga kwa Wayahudi, ivija iyo yanidahize na niye kua msenga kwa wanhu wa isi zimwenga. 9 Baho, Yakobo na Petulo na Yohana waja wooneka kua vilongozi wakulu, wavimanya kua Mulungu kakala yaning'ile unovu uwo na wachamha makono, yani Balinabasi na niye ili iwe chilaguso cha wanhu chiilumbile. Cheye chilitogolela chikasang'hane sang'hano kwa wanhu haweli Wayahudi, na wao wasang'hane kwa Wayahudi. 10 Wachipula chinhu chimwe, sekechiwasemwe vikumbi muyega, iyo mbuli nikalile noiyoha kuitenda.

11 Petulo viyavikile kae ya Antiokia simtogolele hazelu kwa vija kakala yabanange. 12 Wanhu waja wakalile walagizigwe na Petulo viwakalile wang'hali hawanavika, Petulo kakala yoja ndia hamwe na wanhu haweli Wayahudi. Mbali viwavikile wanhu wao, kaleka kuja hamwe na wanhu haweli Wayahudi, kwa kudumba chibumbila cha waja wowaswangiza wengile kumbi. 13 Hata Wayahudi wamwenga wamtogole Kilisito wailumba nayo Petulo muisang'hano ino ya ubilikizi, nawo wamtogola Balinaba viyalongile kwa mbuli ya ubilikizi wao. 14 Baho, vinionile kua wakala wolongelela mbuli ya Usenga Unogile vihile, nimlongela Petulo baho ha wanhu wose, "Gweye ni Myahudi mbali kokala kama wanhu haweli Wayahudi na si kama Myahudi. Ivo, kodahaze kuwashwangiza wanhu haweli Wayahudi kukala kama Wayahudi?"

15 Kweli, kulawa mwaka cheye chileligwa Wayahudi na sio wanhu wokemigwa, "Wanhu haweli Wayahudi weli na malozo." 16 Mbali chovimanya kweli kua munhu hodahika kua mtogoligwa kwambuli ya kuzitegeleza ndagizi, ila tu kwa kumtogola Yesu Kilisito. Cheye Wayahudi ivija chimtogola Yesu Kilisito ili chipate kutendigwa watogoligwa kwanzila ya kumtogola Kilisito, habule munhu hata imwe yotendigwa mtogoligwa ha Mulungu kwa kutegeleza ndagizi. 17 Yahawa cholonda kutendigwa kua watogoligwa na Mulungu kwa kuilumba na Kilisito, kuno cheye chooneka kua china malozo kama wanhu haweli Wayahudi, ivo, mbuli ino yooneka kua Kilisito kochitaza vichisang'hana malozo? Hambee hata chidodo! 18 Yahawa nihaleka kuwinza ndagizi ili mhate kutogoligwa na Mulungu, amala kaidi nisonga kuwinza ndagizi za Musa, baho niye nokua mtenda malozo. 19 Kwavija, kwa mbuli ya iyo ndagizi, niye nidanganika, ndagizi yenyego ing'oma, mhate kukala kwa mbuli ya Mulungu. Niye nikomigwa hamwe na Kilisito mumsalaba, 20 na sambi nina ugima, mbali si niye kaidi, ila Kilisito kokala mgati yangu. Ugima uno nili nao sambi ni kwa mbuli ya kutogola, kutogola kwa nzila ya Mwana wa Mulungu yaning'ile wende hata kaulava ugima wake kwambuli yangu. 21 Niye siulema unovu wa Mulungu. Kama hana munhu kotendigwa mtogoligwa kwambuli ya ndagizi, baho Kilisito kadanganika bule!