1 Mweye Wagalatia waja dimema ena, da hindi ena! Ivo, yalihi yawalogile? Mbuli ya kuwambigwa Yesu Kilisito mumsalaba ikala ilongigwe hazelu ha meso genu. 2 Chinilonda ni kuchimanya chinhu chimwe kulawa kumwenu. Ivo, mubokela Muhe wa Mulungu kwambuli kama viilondeka na ndagizi hebu kwa mbuli ya kuhulika na kuutogola Usenga Unogile? 3 Ivo, kumbe mweye ni dimema ena, dahindi ena kubitiliza? Mweye mkala msongile kubokela Usonga Unogile kwa kutazigwa na Muhe wa Mulungu, ivo, sambi molonda kukomeleza kwa ludabwa lwenu wenyego? 4 Ivo, zija mbuli zose ziwapatile mweye zaga bule tu? Hambee havidahika! 5 Eti, Mulungu yomwing'hani Muhe wake na kuwasang'hanila miujiza mmwenu kwa vija mozitenda zilondeka na ndagizi, hebu kwa vija mouhulika Usenga Unogile na kuutogola? 6 Tebu, loleni mbuli ya Ibulahimu, kama Mayandiko vigandikigwe, "Ibulahimu kamtogola Mulungu na kwa kutogola kwake, Mulungu kamtogola kua mtogoligwa." 7 Kwaivo baho, mvimanye kua wanhu womtogola Mulungu wao weli ulelo wakweli wa Ibulahimu. 8 Mayandiko ga Mulungu galagusa kua Mulungu yang'hali kowasang'hanila wanhu haweli Wayahudi kua watogoligwa kwa nzila ya kutogola. Kwaivo, Mayandiko ga Mulungu galongola kumligulila Ibulamu Usenga Unogile, "Kubitila gweye isi zose zobokela ganogile ga Mulungu." 9 Baho, Ibulamu katogola na kabokela ganogile ga Mulungu, na waja wose wakalile wotogola wabokela ganogile ga Mulungu ivija.

10 Mbali waja wose wotumanila kusang'hana viilonda ndagizi, wenukiligwa. Kwavija Mayandiko ga Mulungu gandikigwa, "Munhu yoyose ija hazigoga na kuzitenda mbuli zose zandikigwe mchitabu cha ndagizi, kenukiligwa na Mulungu!" 11 Ni kweli kua kwa kuwinza ndagizi hakudaha kumtenda munhu kua mtogoligwa, kwavija Mayandiko gandika, "Munhu yatogoligwa kokala kwa kulongozigwa na kutogola kwake." 12 Mbali ndagizi haitumanila kutogola, ila Mayandiko gandika, "Munhu yotenda viilonda ndagizi kosang'hana vija viilonda ndagizi." 13 Kilisito kachikombola kulawa muinyinukila ya ndagizi za Musa kwa kuchisolela nyinukila iyo kwa mbuli yetu, kwavija Mayandiko gandika, "Yoyose yawambigwe mumsalaba kenukiligwa na Mulungu." 14 Mbuli ino itendeka giladi ili gaja ganogile ga Mulungu yeng'higwe Abulahamu gawavikile wanhu haweli Wayahudi kubitila Kilisito, na ili kwa kutogola, chiubokele uja Muhe uja Mulungu yachilalike.

15 Mbwiga zangu, nomwing'hani mfano kulawa muugima wetu wachila zua. Tebu tongeni kwa mbuli ya malagano ga wanhu waidi waitogolele mbaka kusainigwa na waidi wao waugela muhuli, baho habule munhu yonda yaubene hebu kongeza chinhu chochose. 16 Baho, Mulungu kamlalika Abulahamu na ulelo wake. Mayandiko hagalonga kwa mbuli ya wengi, "Na ulelo wake," yani wengi, ila gandika, "Na mlelo wake," yani imwe, nayo iyo Kilisito. 17 Chinilonda kulonga icho chino. Mulungu katenda lagano jake na kadigangamiza, ndagizi za Musa zija zilawilile milao mia nne na salasini hamwande zikala zing'hali kulawilila. Hazidahile kudibena ijo lagano wala kudihindula ijo laliko. 18 Kwavija, kama gweko da Mulungu dopatika kwa kutegeleza ndagizi, baho haidaha kaidi kutumanila laliko da Mulungu. Mulungu kamwing'ha ganogile gake Abulahimu kwavija kakala yamlalike. 19 Ivo baho ndagizi ya choni? Yongezigwa baho ili kulagusa ubananzi wa wanhu, mbaka vonda yeze ija mlelo wa Abulamu ija yeng'higwe dija laliko. Mulungu kamwing'ha Musa ndagizi kubitila mtumigwa wake wa kwa Mulungu nayo Musa kaweng'ha wanhu. 20 Hebu iyo msenga halondigwa kama yahawa mbuli yenyego yokua ya munhu imwe, mbali Mulungu ni imwe ija yekile laliko na Ibulahimu bila msenga.

21 Ivo, ndagizi yoibishila na laliko da Mulungu? Hambe! Kama ndagizi ilavigwe ihadahile kuweng'ha wanhu ugima, baho chihatogoligwe na Mulungu kwa kutegeleza ndagizi. 22 Mayandiko ga Mulungu gakomeleza kulonga kua, isi yose ya yolongozigwa na udaho wa malozo, ivo baho, waja wose womtogola Yesu Kilisito wokwing'higwa chija chiyalalongile Mulungu.

23 Vichikalile ching'hali hachinamtogola Kilisito, ndagizi ichitenda kua wafungigwa, kuno chobetela kutogola uko kufunhuligwe.

24 Baho, iyo ndagizi ikala kama yaya wetu mbaka viyezile Kilisito ili kubitila kutogola chitendigwe watogoligwa kwa kumtogola Kilisito.

25 Sambi kumtogola Kilisito kuvika, kwaivo ndagizi haidaha kua yaya kaidi kumwetu.

26 Kwa kumtogola Kilisito mweye mose muwa wana wa Mulungu kwa nzila ya kuilumba na Kilisito Yesu.

27 Mweye mose mbatizigwe muilumba na Kilisito, ivo ni kama vija mumvala Kilisito. 28 Baho habule kaidi kuleka kuilinga kwa Myahudi na munhu heli Myahudi, mtumwa na munhu heli mtumwa, mulume na mwanachike, wose ni chinhu chimwe kwa kuilumba na Kilisito Yesu. 29 Mweye mwa wanhu wa Kilisito, baho mweye wa ulelelo wa Abulahamu, na mobokela gaja Mulungu gayalalike.