1 Niye Paulo nili msenga wa Mulungu, situmigwe kwa ludabwa lwa munhu mbali kwa udaho wa Yesu Kilisito na wa Mulungu Tata yamzilibule Yesu. 2 Niye hamwe na wamtogole Kilisito wose weli hamwe na niye chogalamusa mabumbila ga wamtogole Kilisito ga uko Galatia. 3 Nowapulila unovu wa Mulungu ukale na mweye na utindiwala kulawa kwa Mulungu Tata yetu na kulawa kwa Mndewa Yesu Kilisito. 4 Kilisito kailava mwenyego kwambuli ya kusegeza malozo getu kuilinga na wende wa Mulungu wetu na Tata, ili yadahe kuchilohola muuisi ino ya sambi ya ubananzi. 5 Kumwake iyo ukale ukulu wa Mulungu mazua gose galibule uhelelo! Pepa.

6 Nikanganya ng'hani mchipindi chiguhi tu chibitile, na mweye momlema Mulungu ija yawakemile kwa unovu wa Kilisito, na mouwinza usenga wa namna imwenga uwoneka kama Usenga Unogile. 7 Mbali habule Usenga Unogile umwenga. Viilongeka ni kua hana wanhu wowazaganyeni, waja wanhu wolonda kuubananga Usenga wa Kilisito. 8 Mbali, hata yahawa munhu imwe mmwetu hebu mtumigwa wa kwa Mulungu kulawa Kuulanga, kowaligulileni usenga hauwilinga na uja chiwaligulileni, baho munhu iyo yenukiligwe na Mulungu! 9 Chimala kuwalongeleni, na vino sambi nolonga kaidi. Kama munhu yoyose yahawaligulileni usenga wa namna imwenga, hauwilinga na uja mmalile kuubokela, iyo munhu yenukiligwe! 10 Sambi nolonda kutogoligwa na wanhu? Hebu na Mulungu? Hebu ivo, nolonda kuweng'ha deng'o wanhu? Kama nihatendile ivo, niye nihalekile kua mtumigwa wa Kilisito.

11 Mbwiga zangu nolonda mvimanye kua uja usenga niuligule haulawa kwa wanhu. 12 Niye siubokele kulawa kwa munhu, wala sifundigwe na munhu. Yesu Kilisito mwenyego iyo yanifunulile.

13 Habule mbuli kua mmala kuvimanya vija vinikalile nokala umwaka kwa kuiwinza mazoela ga Kiyahudi. Movimanya vinididununze bumbila da wanhu wamtogole Kilisito kubita chipimo na vinilondile kuwabananga kabisa kutogola kwao. 14 Enaa, niye niwahuma wayangu wengi waja wa mkamo wangu kwa kugombela mazoela ga Kiyahudi. Niiyoha ng'hani kugabokela mahala ga wavele wetu.

15 Mbali Mulungu kwa unovu wake, kakala yanisagule hata ning'hali sinavumbuka, kanikema nimsang'hanile. 16 Kalonda kunifunulila Mwanage nimmanye vija viyali ili niligule Usenga Unogile kwa wanhu hawali Wayahudi. Nie simuuzile munhu yoyose, 17 na bila kukwela tanhu kuita Yelusalemu kwa waja wanilongolele kua wasenga, mosi niita isi ya Alabia na amala nibwela kaidi Damasiko. 18 Ikala tu viibitile milao midatu, baho niitile Yelusalemu kuiona na *Petulo. Nikala uko kwa mazua kumi na tano, 19 mbali siwaonile wasenga wamwenga, ila Yakobo mdodo wake Mndewa Yesu.

20 Gano ganimwandikileni, Mulungu kovimanya, niye sivwiza!

21 Hamwande niita muiisi ya Silia na Kilikia. 22 Chipindi icho, niye mwenyego nikala simanyike kwa wanhu wamtogole Kilisito wa kuja Yudea. 23 Chiwakalile wochimanya ni chija tu wachihulike. "Munhu ija yakalile yochidununza umwaka, sambi koligula mbuli za kumtogola Mulungu ukuja kuyakalile yogeza kukubananga!" 24 Baho, wamwing'ha nhogolwa Mulungu kwambuli yangu.