1 Baho, chinilonda kulonga ni kua, muhazi yahawa yang'hali mwana mdodo, iyo koilinga na mtumwa, hata ihawa uzenzi wose uwo wake. 2 Chipindi chose icho kokala muulezi wa walolezi na waja womwimila mbaka chipindi chija chikikwe na tatake. 3 Cheye ivija chikala kama wana wadodo, chikala cholongozigwa kwa mahala gaja golongoza muiisi. 4 Chipindi chija chilondeke vichivikile, Mulungu kamlagiza Mwanage muiisi ino. Mwanage iyo yaleligwe na mwanachike, kakala yagogigwe na ndagizi za Wayahudi, 5 yapate kuwakombola waja wagogigwe na ndagizi ili cheye Wayahudi chitendigwe wana wa Mulungu.

6 Sambi, kwavija mweye ni wanage, Mulungu kamlagiza Muhe wa Mwanage mmioyo yenu, Muhe ija yochitenda chimkeme Mulungu "Aba," iyo kulonga "Tata yetu."

7 Baho gweye si mtumwa kaidi, ila mwana. Na yahawa ni mwana, baho gweye kobokela gose kulawa kwa Mulungu gaja gayawekile wanage.

8 Baho umwaka hamummanyile Mulungu na ivo muisang'hanila milungu ija haikalile Mulungu wa kweli. 9 Vino sambi kwa vija mommanya Mulungu wa kweli na momanyika nayo, ivo modahaze kubwelela kaidi kugasang'hanila mahala ga umwaka? 10 Mng'hali mosang'hana mbuli za kuvina sona za misimo ya mazua na miezi na milao!

11 Ningila kitwetwetwe kua sang'hano niisang'hane kwa mbuli yenu yagabule!

12 Mbwiga zangu, nompulani mukale kama niye, seke mlongozigwe na nda ndagizi, kama nie vinikalile kumwenu. Vinizile kumwenu hamnhendele chinhu chochose chihile. 13 Movimanya kua utamu wangu uwo unitendile niye nikale kumwenu, kuwaligulileni Usenga Unogile kwa mala ya mosi.

14 Hata ivo, chipindi chija hamna nizeleu hebu kunilema kwambuli ya uzidilwa wangu hata kama mshwangizigwa kutenda ivo, mbali mnibokela kama watumigwa wa kwa Mulungu, mnibokela niye kama vija Kilisito Yesu mwenyego.

15 Mkala muindeng'helo, sambi choni chilawilile? Noilahila kua kulawa chija chipindi, mwahadahile hata kugang'ola meso genu na kuning'ha niye. 16 Ivo, vino sambi niwa mhasanyi wenu kwavija viniwalongeleni ija kweli?

17 Wanhu wao wamwenga wogazika kwambuli yenu, mbali viwogesa kwa mbuli ya mweye havinogile. Wolonda sekemuilumbe na niye ili mweye muwahunganikile wao.

18 Kweli ni mbuli inogile mazua gose, kuwahunganikila wamwenga mzimbuli zinogile, na sio tu chipindi niye nili na mweye. 19 Mweye wanangu wa wende! Kolonga vija mwanachike yeli na inda viyogaya chipindi chija cha kulela, na niye nogendelela kugaya kwa mbuli yenu mbaka haja wanhu vonda waone vumsang'hana kama Kilisito viyalonda. 20 Maza nahawile hamwe na mweye vino sambi, baho nahapatile kuwamanya goya vumli na kudimanya da kulonga. Sambi ningila kitwetwetwe kwa mbuli yenu!

21 Tebu nomuuzani, mweye molonda kulongozigwa na ndagizi. Ivo, muuhulika vija ndagizi viilonga? 22 Mmayandiko ga Mulungu gandikigwa kua, Abulahamu kakala na wana waidi, imwe kulawa kwa mwanachike mtumwa na imwenga kwa mwanachike heli mtumwa. 23 Ija mwanachike mtumwa kalela kulinga vija viilondeka, mbali ija mwanachike heli mtumwa kalela kwa mbuli ya laliko da Mulungu.

24 Mbuli izo ziwa mfano, kwavija wao waidi ni mfano wa malagano maidi, da mosi ijo dija disang'hanigwe kulugongo Sinai, na msenga wake ni Hajili, na wana wake woleligwa muutumwa. 25 Hajili iyo mfano wa lugongo lwa sinai uli uko Alabia, na mfano wa kae ya Yelusalemu ya sambi, kwavija kae ino ya muutumwa hamwe na wanhu wake.

26 Mbali Yelusalemu ili Kuulanga kwa Mulungu kolonga vija mwanachike ija heli muutumwa, nayo iyo mfano wa mama yetu. 27 Kwavija yandikigwa,

"Deng'ha gweye ulibule ulelo ija hulelile!

Toa dizi gweye hupatile usungu kuibasula!

Kwavija wana wa ija yasigwe ni wengi kubita wa ija yeli na mulume."

28 Ivo, baho mweye mbwiga zangu, mweye ni wana wa Mulungu kuilinga na laliko jake kama viyawile Isaka. 29 Kama vija mazua gaja mwana viyaleligwe chiunhu kamdununza ija mwana yaleligwe kwa udaho wa Muhe wa Mulungu, na iyo yogendelela mbaka sambi. 30 Mayandiko ga Mulungu golongaze? Golonga, "Muwinge mama yeli mtumwa hamwe na mwanage, kwavija mwana wa mtumwa kokua muubananzi hamwe na mwana wa mama heli mtumwa." 31 Baho ndugu, cheye si wana wa mtumwa ila wa ija mama heli mtumwa.