1 Gakala gasigale mazua maidi tu kuvika lusona lwa Pasaka na lwa migate ija haigeligwe mela. Vilongozi wa walava nhambiko na wofunda ndagizi wakala wolonda nzila ya kumgoga Yesu kwa kwaubala na kumkoma. 2 Mbali wailongela, "Sekechitende mbuli ino mchipindi cha lusona lwa Pasaka, kwavija wanhu wodaha kugala heahea."

3 Yesu kakala uko Betania muing'anda ya Simoni yakalile na utamu wa dikulu. Yesu viyakalile yoja ndia, muke imwe kengila yeli na nhyupa ilumbigwe kwa mabwe ga alibasta ili na mavuta ganung'ila na ya bei ng'hulu. Kaigubula nhyupa iyo, kagida kinung'ila icho mditwi da Yesu. 4 Wanhu wamwenga wakalile haja wagevuzika kwambuli iyo na wakala woilongela wenyego kwa wenyego, "Habali kudaalila mavuta gabei ng'hulu kama vino? 5 Mavuta gano gahadahile kuguligwa kwa bei ng'hulu kubita chitumetume cha munhu cha mwaka mgima na sente izo waheng'higwe vikumbi muyega." Wamkomhokela ng'hani iyo muke.

6 Mbali Yesu kawalongela, "Habali momgaza? Mlekeni! Iyo kanhendela mbuli inogile. 7 Vikumbi muyega mokala nao mazua gose na modaha kuwataza saa yoyose yumlonda. Mbali nie sikala namweye mazua gose. 8 Muke ino kanitendela dija diyadahile. Kaugela lukuli lwangu mavuta ga kunung'ila kunitanda kwa kuwandigwa kwangu. 9 Nomlongeleni kweli, kwambuli ya kukumbukigwa muke ino, dino diyatendile dosimuliligwa hohose muiisi haja Usenga wa Mulungu hauliguligwa."

10 Amala Yuda munhu kulawa Kaliote, imwe mwa waluko wa Yesu kumi na waidi, kaita kwa walongozi wa walava nhambiko ili yamhinduke Yesu. 11 Vilongozi wa walava nhambiko wadeng'helela ng'hani kuhulika mbuli iyo na wamlalika kumwing'ha sente. Ivo yeye kakala yolonda nyafasi inogile ili yadahe kuwataza kumwamha.

12 Vidivikile zua da mosi da lusona lwa Migate haigeligwe mela, zua diwazoele kuchinja bung'hukilalo wa Pasaka, waluko wa Yesu wamuuza, "Kolonda chiitehi chikakutandile hakujila Pasaka?"

13 Amala Yesu kawalagiza waidi mwa waja waluko wake, kawalongela, "Gendeni muikae, uko moiting'hanila na mulume kapapa nongo da mazi. Muwinzeni, 14 mbaka kuyokwingila. Mlongeleni mwenekae wa ng'anda ija yokwingila, ‘Mfundaji kouza, chakulihi chumba cha nyambenyambe icho chinonda kujila Pasaka hamwe na waluko wangu? 15 Nayo kowalagusila chumba kikulu chakudigolofa, chimala kwikigwa goya. Chitandileni umo."

16 Waja waluko wasegela waita kuikae, nao wavika chila chinhu ivija kama viyawalongele. Ivo waitanda ndia ya lusona lwa Pasaka. 17 Hadiswele zua, Yesu keza na waja waluko wake kumi na waidi. 18 Viwakalile woja Yesu kawalongela, "Nowalongela kweli, kuna munhu imwe mmwenu iyoja hamwe na nie iyo konihinduka." 19 Waja waluko wasonga kulumila mmoyo na kumuuza imwe imwe, "Mndewa! Kolonga nie?"

20 Kawedika, "Imwe mmwenu mweye kumi na waidi, ija yozang'iza mgate mdibakuli hamwe na nie. 21 Nie Mwana wa Munhu nolondeka nife kama viyandikiligwe. Mbali koluona munhu ija yonihinduka nie Mwana wa Munhu! Vihanogile ng'hani munhu iyo maza seke yaleligwe!"

22 Viwakalile woja, Yesu kasola gate, kamwing'ha hewela Mulungu, kaubanzula na kuweng'ha waluko wake kalonga, "Soleni mje, uno uwo lukuli lwangu."

23 Amala kasola chikombe chili na divai, kamwing'ha Mulungu hewela, kaweng'ha waluko wake, wose wang'wila umo. 24 Kawalongela, "Ino iyo damu yangu ilagusa Lagano da Mulungu na wanhu wake, ikwitika kwa mbuli ya wengi. 25 Nomlongeleni kweli, sing'wa kaidi divai mbaka zua dija nihang'wa mu Ufaume wa Mulungu."

26 Amala Yesu na waluko wake wemba wila wa kumtogola Mulungu, viwamalile kwimba wila, walawa waita ku Lugongo lwa Mizeituni.

27 Viwakalile nzila Yesu kawalongela, "Mweye mose mong'imbila na kunyasa, kama viyandikigwe mmayandiko manang'hana Mulungu kalonga, ‘Nomtoa msusilaji na bung'hukilalo wopwililika.’ 28 Mbali nihamala kuzilibuka, nowalongolela kuita Galilaya."

29 Baho Petulo kalonga, "Hata wakuleke wose, mbali si nie."

30 Yesu kamlongela, "Nokulongela kweli, chilo cha lelo, kabula nzogolo hanakwika mala ya kaidi, kombela mala ndatu."

31 Mbali Petulo kagangamiza kulonga, "Hata kama ihalondeka kufa na gweye, nie sikubela." Na waja waluko wamwenga wabwelela kulonga ivo ivo.

32 Waita hanhu hokemigwa Getisemani, Yesu kawalongela waluko wake, "Kaleni hano nie noita kumpula Mulungu." 33 Amala kawasola Petulo, Yakobo na Yohana kailongoza nao hamwande chidogo. Nayo kasonga kwingila giogio na kugutilila. 34 Kawalongela, "Moyo wangu una giogio kulu na dodaha kunikoma. Sigaleni hano na mkale meso."

35 Yesu kakwesa hamwande chidogo, kagwa chifudifudi na kupula kalonga, "Kama ihadahika seke nibitile saa ino ya madununzo." 36 Kalonga, "Tataangu, gose godahika kumwako. Nisegezele chikombe chino cha madununzo, sio kama vinilonda nie, mbali sang'hana vija vuulonda gweye."

37 Amala kabwela kwa waluko wake waja wadatu kawavika wawasa, nayo kamlongela Simoni yokemigwa Petulo, "Simoni, kuwasa? Ivo, hudahile kukala meso hata saa dimwe tu? 38 Mkale meso na mpule sekemgezigwe kutenda malozo. Mweye molonda ila ng'huli zenu zabule ludabwa."

39 Kabwela kaidi kupula yolonga mbuli iija. 40 Viyabwelile kwa waluko wake, kawavika wawasa kaidi, kwavija meso gao gakala gazamile nhongo. Nao hawamanyile dakumlongela.

41 Kabwela mala ya kadatu, kawalongela, "Mng'hali muwasa na kuhumula? Imala iyo kuwasa! Zua divika. Lola! Nie Mwanage Munhu nogogigwa nogeligwa kwa wanhu weli na malozo. 42 Ivo imeni chiteni! Lola ija yonihinduka kokwiza!"

43 Yesu viyakalile yang'hali yolonga, Yuda, imwe mwa waja waluko kumi na waidi wa Yesu, kalawila yeli na bumbila kulu da wanhu wamhile mapanga na malungu. Wanhu wao wakalile walagizigwe na walongozi wa walava nhambiko na wafunza ndagizi za Musa na wavele. 44 Ivo Yuda, ija yamhinduke, kakala kaweng'ha kilaguso waja wanhu kua, "Ija yonda nimlamse kwa kumhagatila, iyo mumwamhe na mumsole yeli muwamilizi wenu." 45 Ivo Yuda viyavikile, kamuwinza Yesu kamlamusa, "Mfundaji!" Amala kumnonela. 46 Waja wanhu wamwamha Yesu, wamwika muwamizilizi wao. 47 Baho imwe mwa waja wakalile wemile behi na Yesu kasomola panga jake na kamkwapula gutwi mtumigwa wa Mkulu wa walava nhambiko. 48 Amala Yesu kawalongela, "Mwiza kunyamha na mapanga na malungu kama vija nie na mbavi? 49 Mazua gose chikala hamwe na mweye nowafunda wanhu mui ng'anda ya Mulungu hamnyamhile. Mbali leka mayandiko gavikile."

50 Baho waluko wake wose wamleka, wakimbila. 51 Baho hakala na Mbwanga imwe, yakalile kaigwasika golole zelu, kakala komuwinza Yesu, wageza kumwamha, 52 mbali iyo kapulusuka kalagaza golole jake, kakimbila mwazi.

53 Wamgala Yesu mng'anda mwa Mkulu wa walava nhambiko, na uko walongozi wa walava nhambiko, wavele na wafundaji wa ndagizi waiting'hanila hamwe. 54 Petulo kamkoleleza kwa kutali, mbaka halubuga la Mkulu wa nhambiko. Uko kakala hamwe na wamilizi, kokotela moto. 55 Vilongozi wa walava nhambiko na wasenga wose wa Chitala wakala wolonda wapate mbuli ya kumgoga Yesu ili wamkome, mbali hawapatile. 56 Wengi wamlavila mbuli za uvwizi Yesu, mbali mbuli zao wose haziilumba.

57 Amala wamwenga wenuka wamlavila mbuli za uvwizi, walonga, 58 "Cheye chimhulika viyalonga, ‘Nie nobomola ng'anda ya Mulungu izengigwe na wanhu na mmazua madatu noizenga imwenga iyo haizengigwa na wanhu.’ " 59 Mbali hata ivo, mbuli zao haziilumbile. 60 Baho Mkulu wa walava nhambiko kema haulongozi wa chitala kamuuza Yesu, "Ivo, gweye hudaha kuwedika? Ivo, wanhu wano wose wokulongeleza choni?"

61 Mbali Yesu kanyamala hupii, halongile mbuli yoyose. Mkulu wa walava nhambiko kamuuza kaidi, "Ivo, gweye iyo Kilisito, Mwana wa Mulungu ija yotogoligwa?" 62 Yesu kawedika, "Nie iyo. Namweye moniona nie Mwanage Munhu vinikala mkono wa kulume mwa Mulungu yeli na udaho, na niheza mgamawingu gali kuulanga kwa Mulungu."

63 Mkulu wa walava nhambiko kadega vivalo vake kwa kulagusa ludoko, kalonga, "Ivo, cholonda yelihi kaidi yeze achilongele mbuli yake? 64 Mweye wenyego muhulika viyafukula. Mweye momlamulaze baho?"

Wose walamula kua kolondeka yafe.

65 Amala wanhu wamwenga wasonga kumtemela mate, wamfunga kumbi mmeso, wamtoa mang'hua na kumlongela, "Lagusa yelihi yakutoile! Wamilizi wamsola wamtoa mang'hua.

66 Petulo viyakalile yang'hali halubuga, keza mtumigwa imwe wa chike kulawa mwa watumigwa wa Mkulu wa Walava nhambiko. 67 Viyamuonile Petulo yokotela moto, kamkodolela meso, kamlongela, "Gweye ivija kukala hamwe na Yesu wa Nazaleti."

68 Mbali Petulo kabela, kalonga,"Aka ngobole simmanya na sikimanya chuulonga." Amala Petulo kahalawa kaita kuinzila ya kwingilila. Baho nzogolo kakwika.

69 Ija mtumigwa wa chike viyamuonile Petulo baho, kawalongela kaidi waja wemile baho, "Munhu ino nayo wahamwe." 70 Mbali Petulo kabela kaidi. Hamwande chidogo waja wakalile wemile behi na Petulo wamlongela, "Mbali kweli gweye kwahamwe nayo, manake gweye nayo kwa munhu wa Galilaya!" 71 Petulo kasonga kuiduila na kuilahila, kawalongela, "Simmanyile munhu ino yumlongelela mbuli zake."

72 Bahaja nzogolo kakwika mala yakaidi. Baho Petulo kakumbuka mbuli ija Yesu iyamulongele, "Kabula nzogolo hanakwika mala ya kaidi, kombela mala nhatu." Ivo kavimanya viyatendile, kalila ng'hani.