1 Yesu kagendelela kuwalongela, "Nowalongela ukweli, kuna wanhu wamwenga welihano hawadanganika mbaka weze kuuona Ufaume wa Mulungu uheza na udaho."

2 Mazua sita hamwande, Yesu kawasola Petulo na Yakobo na Yohana kawagala hachanha ya lugongo lutali weli waiyeka. Uko Yesu kageluka chihanga chake kuno wolola. 3 Valo jake dibung'huka dikala zelu chuwee mbaka dobalika, uzelu uja munhu yoyose muiisi hadaha kusunha ivo. 4 Bahaja waja waluko wadatu wawaona walagusi wa Musa na Elia wakala wolonga na Yesu. 5 Petulo kamlongela Yesu, "Mfundaji, vinoga cheye kukala hano. Chitogolele chizenge viheha vidatu, chimwe chako, chimwe cha Musa na chimwenga cha Elia." 6 Petulo kalonga ivo kwavija yeye na wayage wakala wodumba ng'hani na hamanyile cha kulonga.

7 Amala dilawila wingu, diwagubika, nayo dizi kulawa kwa Mulungu ihulilkika ilonga, "Ino iyo Mwanangu, nili na wende nayo, mtegelezeni." 8 Bahaja viwalolile kuno na kuno, wamuona Yesu tu hawamonile munhu imwenga yoyose yelinayo.

9 Viwakalile wohulumuka kulawa kulugongo, Yesu kawagoma "Sekewamlongele munhu yoyose gaja gawaonile, mbaka nie Mwana wa Munhu niheza kuzilibuka."

10 Nao wasang'hana kama viyalongile, mbali wakala woiuza wenyego, "Kuno kuzilibuka manake choni?" 11 Wamuuza Yesu walonga, "Habali wafunda ndagizi za Musa wolonga kua yolondeka Elia tebu yabwele kabula ya Yesu?"

12 Yesu kawedika, "Ivoili, mosi Elia kokwiza, ili kuzikagoya mbuli zose. Hataivo habali mbuli ino yandikigwa kua Mwana wa Munhu kolondeka adununzigwe ng'hani na kuzehigwa? 13 Mbali nomlongeleni, Elia kamala kwiza mwaka nawo wamtendela viwalondile, kama viyandikigwe kwa mbuli yake."*

14 Yesu na waja waluko wadatu viwabwelile kwa wayao, wawavika wazungukiligwa na bumbila da wanhu na wafunda ndagizi za Musa wamwenga wakala woibishila na waluko wa Yesu. 15 Bahaja wanhu waja viwamonile Yesu, wakanganya ng'hani, wamkimbilila ili wamlamse. 16 Yesu kawauza waluko wake, "Moibishila choni nawo?"

17 Baho munhu imwe kulawa mdibumbila ijo kamwidika Yesu, "Mfundaji, nimgala mwanangu kumwako, kana kinyamkela yomtenda yawe bubu. 18 Mala zose yahamwingila, komgwisa hasi na komtenda yalawe mahovu mmulomo, kuno koluma meno na komtenda yakakamale lukuli lose. Niwapula waluko wako wamlave chinyamkela iyo mbali hawadahile."

19 Yesu kawalongela, "Mweye ulelo ulibule tumanilo! Nokala na mweye mbaka lini? Nowafunyila moyo mbaka lini? Haya ngalileni hano mwana iyo." 20 Nawo wamgala mbwanga ija kwa Yesu. Bahaja Chinyamkela viyamonile Yesu, kamgela utamu wa kugwa mbwanga ija, kagwa hasi, kabimbilika kuno mahovu golawa mmulomo. 21 Yesu kamuuza tata wa mawana ija, "Mwanago kasonga lini kulawililigwa na utamu uno?"

Nayo tata wa mwana ija kamwidika, "Tangia haudodo wake. 22 Mala zimwenga chinyamkela komgwisa mwana muumoto, hebu mmazi ili yamkome. Mbali kama kodaha kutenda jojose, chokupula chionele bazi uchitaze!"

23 Yesu kamlongela, "Seke ulonge kama uhadaha! Gose godahika kwaija yomtogola Mulungu!"

24 Bahaja tata yake mwana ija kaguta nyangi kalonga, "Nhogola. Nhaze kuleka kutogola kwangu!"

25 Yesu viyaonile bumbila da wanhu woiting'hanila kwa wingi hamwake, kamkomhokela ija chinyamkela, kamlongela, "Gweye chinyamkela yuutenda mbwanga ino kua bubu na uswamagutwi, nokulongela umlekese mbwanga ino na seke umbwelele kaidi!"

26 Chinyamkela ija kaguta nyangi, kamgela utamu wa kugwa kwa ludabwa na kamlawa. Ija mbwanga kakala kama mtufi, ivo wanhu wengi walonga, "Kadanganika." 27 Mbali Yesu kamgoga mkono mbwanga ija kamwinula, nayo kenuka.

28 Yesu viyengile mng'anda, waluko wake wamuuza weli waiyeka, "Mbona cheye hachidahile kumlava kinyamkela ija?"

29 Yesu kawalongela, "Chinyamkela wa namna ino hadahika kulawa ivija, ila tanhu kwa kumpula Mulungu tu."

30 Yesu na waluko wake wasegela uko, wabitila Galilaya. Yesu halondile munhu yoyose avimanye hanhu haweli, 31 kwavija kakala kowafunda waluko wake. Kawalongela, "Mwana wa munhu kohindukigwa na kugeligwa mmakono ga wanhu nao womkoma, nayo mdizua da kadatu tangia viyakomigwe kozilibuka.

32 Mbali waluko wake hawakimanyile kija chiyalonga, nao wadumba kumuuza.

33 Ivo Yesu na waluko wake wavika Kapelinaumu na viwengile mng'anda kawauza, "Mkala moibishila choni kuja nzila?"

34 Mbali hawamwidike, kwavija mnzila wakala hawaitogolele kwambuli ya yelihi mlongozi mmwao kubita wose. 35 Yesu kalala hasi, kawakema waluko wake wose kumi na waidi kawalongela, "Kama munhu yoyose yahalonda kua mlongozi kolondeka kua mdodo na yawasang'hanile wanhu wose." 36 Amala kamsola mwana mdodo kamwimiza hagati yao, kamhagatila, labaho kawalongela, 37 "Munhu yoyose yonda yambokele mwana imwe mwa wana wano wadodo, kwa mbuli yangu kambokela nie. Nayo yambokele nie hanibokele nie tu mbali kambokela na Mulungu yanhumile."

38 Ohana kamlongela, "Mfundaji, chimuona munhu kolava chinyamkela kwa zina jako na cheye chimgoma kwavija iyo hali na cheye."

39 Mbali Yesu kawalongela, "Seke mumgome chija chiyasang'hana munhu iyo. Habule munhu yotenda miuzonza kwa zina jangu amala hamwande chidogo yeze kunilonga vihile. 40 Munhu yoyose yolonga ganogile getu iyo koilumba na cheye. 41 Nomlongeleni kweli, yoyose yamwing'hani mweye chikombe cha mazi kwa Zina jangu kwavija mweye mwa wanhu wa Kilisito, kweli haihonya mbee nhunza yake."

42 Munhu yoyose yonda yamhonze imwe mwa wana wadodo wano wonitogola koloza, vinoga kumwake munhu iyo afungiligwe dibwe kulu da kusagila na yatumbukizigwa mwibahali. 43 Kama mkono wako uhakuhonza uloze, udumule. Vinoga ng'hani kumwako kwingila muugima ulibule uhelelo uli na mkono umwe badili ya kua na makono maidi amala kokwingila mchitala cha wafile hanhu hali na moto uja haufa. 44 Umo kuli na funza hawofa hebu moto ukwaka bila kufa.* 45 Kama mgulu wako uhakuhonza uloze, udumule. Vinoga ng'hani kwingila muugima ulibule uhehelo uli mbete mbete badili ya kua na magulu maidi amala kokwingila mchitala cha wafile kuja kuli na moto ukwaka haufa. 46 Umo kuli na funza hawofa hebu moto ukwaka bila kufa. 47 Najo ziso jako dihakuhonza uloze, ding'ole. Vinoga ng'hani uwe na gele mbali wingile muugima badili uwe na meso maidi amala wasigwe mchitala cha wafile, 48 hanhu baho ‘funza wake hawofa hebu moto ukwaka haufa.’

49 Mulungu kombitiza Chila munhu mgamadununzo goilinga na kulukuzigwa na moto, kama vija wanhu viwobakaza munyu muinyama kabula ya nhosa ya kulunguza.

50 "Munyu unoga, mbali ihazabuka yoigela choni ili ikolele kaidi?

"Molondeka muilumbe mweye kwa mweye kama munyu viikolela, mkale kwa utindiwala, chila munhu na miage."