1 Yesu na waluko wake wavika umwambu wa lamba da Galilaya muiisi ya Wagelasi. 2 Yesu viyalawile muingalawa, bahaja waiting'hanila na munhu imwe yolawila mgamapanga. Munhu iyo kakala yambule Chinyamkela. 3 Munhu iyo kakala yokala mgamapanga, na habule munhu yodaha kumkimila na kwakumfunga loda. 4 Mala nyingi kakala yafungigwe kwa loda magulu na makono, mbali kozidumula na kukanha zija zikalile mmagulu gake. Hahawile na munhu yoyose yadahile kumkimila. 5 Misi na chilo kakala kohembwegela mgamapanga na mvigongo, koguta nyangi na kuikanha kwa mabwe.

6 Viyamonile Yesu kwa kutali, kamkimbilila na kamtumbalila. 7 Kaguta kwa dizi kulu kalonga, "Habali wingilila mbuli zangu, Yesu, mwanage Mulungu yeli kuchanha ng'hani? Nokupula kwa zina da Mulungu, seke undununze!" 8 Kalonga ivo kwavija Yesu kakala kamkomhokela, "Chinyamkela mlekese munhu ino!"

9 Baho Yesu kamuuza, "Zina jako nani?" Ija munhu kamwidika, "Zina jangu bumbila da wamilizi, manake cha wengi." 10 Amala waja vinyamkela wampula ng'hani Yesu seke yawalave muiisi ija. 11 Behi na baho hakala na bumbila da nguluwe dikalile dosusiligwa muinhelemko ya lugongo. 12 Baho waja vinyamkela wampula Yesu walonga, "Chokupula ng'hani chileke chiite chikawengile nguluwe waja." 13 Yesu kawaleka waite, nawo waita kuwengila nguluwe waja. Bumbila dija da nguluwe, dihulumukila muingema na dingila mdilamba na difila mmazi. Na bumbila dija da nguluwe dovika kama elufu mbili.

14 Walolesi wa nguluwe waja wakimbilila mzikae na mvijiji kuwalongela mbuli iyo. Wanhu walawa kuita kulola gago galawilile. 15 Viwamvikile Yesu, wamuona ija munhu yakalile na bumbila da vinyamkela, kakala yavalile vivalo na yeli na umanyi wake wenele. Nao wadumba ng'hani. 16 Waja wagaonile gago wawalongela wanhu wao gaja gamlawile ija yakalile na vinyamkela na dija bumbila da nguluwe.

17 Baho wanhu wasonga kumpula ng'hani Yesu yahalawe muiisi yao.

18 Baho Yesu viyakalile yokwingila muingalawa, ija munhu yakalile kambula vinyamkela kampula wailongoze.

19 Mbali Yesu hamtogolele ila kamlongela, "Genda ukae yako ukawalongele walukolo wako gaja gayakutendele Mndewa Mulungu na viyakuonele bazi.

20 Ivo munhu ija kahalawa kaita kuwalongela uko Dakapoli, maana yake isi ya kae kumi, vija Yesu viyamtendele, nawo wanhu wakanganyika ng'hani.

21 Yesu viyamalile kuloka umwambu, viyakalile hamgwazo mwa lamba bumbila kulu da wanhu dimzingila. 22 Amala imwe wa vilongozi wa ng'anda za kuiting'hanila wayahudi yakemigwe Yailo, kavika haja na viyamuonile Yesu katumtumbalila mavindi, 23 kampula kamlongela, "Biti yangu mtamu lagalaga. Chonde chonde nokupula izo umwikile makono gako mditwi umpulile utamu wake uhone."

24 Baho Yesu kailongoza nayo. Bumbila kula da wanhu diwawinza, wakala womzonga.

25 Baho hakala na muke yakalile na utamu wa kuzinga ngata kwa milao kumi na midi. 26 Muke iyo kakala kodununzika ng'hani na kahunganika kwa walaguzi wengi na katumila kila chinhu chiyelinacho yapate kuhona badili yake utamu umzamila ng'hani. 27 Mbali viyahulike mbuli ziyatendile Yesu nayo keza hachisogo ha Yesu mdibumbila da wanhu, kamha mhindo ya Yesu, 28 ivo kailongela mmoyo wake, "Kama nihadaha kwamha mhindo yake tu, nohona."

29 Bahaja utamu wake wakuzinga ngata kukanha, nayo kaona lukuli lwake luhona kabisa. 30 Baho Yesu kavimanya udaho wake ulawa na uhonya. Kadihindukila dija bumbila da wanhu na kawauza, "Yelihi yanyamhile mhindo yangu?"

31 Waluko wake wamwidika, "Koona wanhu viwakumemele vino amala kouzaze, ‘Yelihi yakwamhile?"

32 Mbali Yesu kapelesa ubanzi wose yamlole yelihi yamwamhile. 33 Ija muke, kuno kokimanya chimlawilile, keza yogudema kwa Yesu kuno kodumba na kamgwila mmagulu gake, kamlongela gose gamlawilile. 34 Yesu kamlongela, "Biti yangu tumanilo jako dikuhonya. Genda kwa utindiwala, na utamu wako seke ukubwelele."

35 Yesu viyakalile yang'hali yolonga, wanhu wavika kulawa ukae kwa Yailo wamlongela, "Biti yako kadanganika habali ung'hani komgaza mfundaji?"

36 Mbali Yesu hawagesile gaja gawalonga, ivo kamlongela ija mkulu wa ng'anda yakuiting'hanila, "Seke udumbe, gwee togola tu." 37 Ivo hamlekile munhu yoyose yamuwinze badili ya Petulo na Yakobo na Yohana mdodoake Yakobo. 38 Viwavikile ukae kwa Yailo, Yesu kaona tulikizi, wanhu wolila chaka, weli na ndilo ili na kulombokeza ng'hani. 39 Baho Yesu kengila mng'anda, kawalongela, "Habali mogala tulikizi kuno molila? Mwana ino hadanganike ila kawasa tu."

40 Waja wanhu wamseka kwa kumzeha. Mbali Yesu kawalava kunze wose kuyawasile ija mwana, kawasola tata na mami yake imwana na waja waluko wake wadatu yelinao. Wengila mng'anda mbaka hayeli ija mwana. 41 Kamwamha mkono ija mwana na kamlongela, "Talita kumi!" Manake, "Biti, nokulongela lamuka!"

42 Bahaja biti ija kalamka kema, na kasonga kugenda Mwana iyo kakala na ukulu wa milao kumi na midi. Nao viwagaone gago gawakanganya ng'hani. 43 Yesu kawalagiza kwa kugangamiza seke wamlongele munhu yoyose mbuli ino. Na ivija kawalongela wamwing'he ndia ija mwana yaje.