1 Chipindi chidodo chibita Yesu kabwela kae ya Kapelinaumu, wanhu wahulika kua kabwela ukae. 2 Ivo wanhu wengi wammemela mbaka haulwivi hakala habule nyafasi yoyose yakubita! Nayo Yesu kakala yoligula usenga wa Mulungu. 3 Ivo wanhu wamgalila Yesu munhu yaholole, yakalile yapapigwe na wanhu wane. 4 Mbali wapotigwa kumvikiza kwa Yesu kubitila haulwivi kwavija wanhu wakala wamema. Ivo wakwela kuchanha kuchiswili na watobola zonzo hachanha ha haja hayakalile Yesu, wamhulumusa kwa nzabi ija mtamu yaholole yeli mchilago chiagonele. 5 Yesu viyaonile vija viwamtogole, kamlongela ija mtamu yaholole, "Mwanangu, nikulekesela malozo gako."

6 Wafunda ndagizi za Musa wamwenga wakalile haja waitonga mbuli iyo mmoyo, 7 "Habali munhu ino kolonga vino? Ino komfukula Mulungu! Yelihi yodaha kulekesa malozo ga munhu badili ya Mulungu yaiyeka?"

8 Bahaja Yesu kavimanya viwatonga mmoyo, nayo kawalongela, "Habali motonga ivo mmoyo? 9 Mbuli ibuhile ilihi, kumlongela ino mtamu wa kuholola, ‘Nikulekesela malozo gako,’ hebu kulonga, ‘Ima, usole chilago chako uite?’ 10 Nolonda kuwagangamizila kua nie Mwana wa Munhu ninao udaho wa kuwalekesela wanhu malozo gao muiisi." Yesu kamlongela ija mtamu, 11 "Nokulongela, ima, usole chilago chako uite ukae yako."

12 Bahaja ija mtamu wa kuholola kema, kasola chilago chake kaita kuno wanhu womlola! Mbuli ino iwakanganya wose, wamtogola Mulungu, walonga, "Mbuli kama ino hachinaiona mbee!"

13 Yesu kaita kaidi mgwazogwazo mwa Lamba da Galilaya. Bumbila kulu da wanhu dimuwinza, nayo kasonga kuwafunda. 14 Viyakalile yogenda, kamuona Lawi mwana wa Alifayo kakala hanhu hakukunzanyila kodi, kamlongela, "Niwinze." Lawi kema, kamuwinza Yesu.

15 Amala Yesu viyakalile yoja ndia muing'anda ya Lawi, Wagoga kodi wengi na weli na malozo wakala woja hamwe nayo na waluko wake, manake hakala na wanhu wengi wakalile womuwinza. 16 Wafunda ndagizi wamwenga weli Mafalisayo viwamonile Yesu yoja na wagoga kodi na wamwenga wamanyike kua weli na malozo, wawauza waja waluko wa Yesu, "Habali Yesu koja na wagoga kodi na waja wamanyike kua weli na malozo?"

17 Yesu viyahulike gago gawalonga kawawedika, "Welina ugima hawalonda mlaguzi, mbali watamu wolonda mlaguzi. Sizile kuwakema waja watogoligwe na Mulungu, badili yake niza kwa mbuli ya weli na malozo."

18 Waluko wa Yohana na waja wa Mafalisayo wakala wofunga. Wanhu wamwenga wamuwinza Yesu na kumuuza, "Mbona waluko wa Yohana na wa Mafalisayo wofunga mbali waluko wako hawofunga?"

19 Yesu kawedika, "Wagonekigwe na mwenye zengele wodahaze kufunga wahawa hamwe na mwenye zengele? Kwavija mwenye zengele kahamwe nawo, hawodaha kufunga. 20 Mbali chipindi chokwiza ija mwenye zengele yahalavigwa kumwao, baho leka wafunge.

21 Habule munhu yosonela chilaka cha sambi mchivalo cha mwaka. Yahatenda ivo, kija chilaka cha sambi chokidega chivalo cha mwaka, na haja hasonigwe hokongezeka kudegeka. 22 Ivija habule munhu yogida divai ya sambi mmifuko ya mbende ya mwaka. Yahatenda ivo, ija divai ya sambi yoitula ija mifuko ya mbende ya mwaka, kwaivo divai yokwitika na mifuko ya mbende ya mwaka yobanangika. Ivo divai ya sambi yokwikigwa mmifuko ya sambi.

23 Mdizua dimwe da kuhumula da Wayahudi, Yesu kakala yobita hagati ya mmigunda ya ndia kama ya uhemba yeli na waluko wake. Viwakalile wobita waja waluko wake wakala wokwanyula makwamvi gake. 24 Mafalisayo wamuuza, "Lola, mbona waluko wako wotenda mbuli igomigwe kutendigwa mdizua da Kuhumula?" 25 Yesu kawedika, "Ivo hamsomile mmayandiko ga Mulungu bule viyatendile Daudi na wayage viwakalile na nzala? 26 Daudi kengila Muing'anda ya Mulungu Abiasali viyakalile mkulu wa walava nhambiko, kaija ija migate ikigwe kwambuli ya Mulungu, ija igomigwe kujigwa na wanhu wamwenga ila walava nhambiko waiyeka, nayo kaweng'ha na wayage."

27 Amala Yesu kawalongela, "Zua da kuhumula dikigwa na Mulungu kwambuli ya kuwataza wanhu, mbali si wanhu wadunhunzike kwa Zua ijo. 28 Nie Mwana wa Munhu iyo Mndewa wa Zua da kuhumula."