1 Yesu kasonga kuwafunda kaidi mgwazo mwa lamba da Galilaya. Wanhu wengi waikunzanye kumzunguluka ivo wamtenda Yesu yengile muingalawa ikalile baho mummgwazo mwa lamba. 2 Kakala kowafunda mbuli nyingi kwa mifano, na kawalongela,

3 "Tegelezeni! Munhu imwe kaita kuhanda mbeyu. 4 Viyakalile yomiza, mbeyu zimwenga zilagalila nzila, ndege weza wazidonda wazija. 5 Zimwenga zilagalila muulongo uli na mabwe halibule ulongo mwingi. mbeyu zilopola kota, kwavija hakala habule ulongo mwingi, 6 mbali zua vidilawile ng'hani, mbeyu izo zihomba na zinyala kwavija mizizi yake haingile ng'hani muulongo. 7 Mbeyu zimwenga zilagalila mmiwa, miwa ikula izizonga mbeyu izo zotile zipotigwa kulela mhule. 8 Mbeyu zimwenga zilagala muulongo unogile, zota vinogile na zikula, zilela na zilava mhule, zimwenga zilela salasini, zimwenga sitini na zimwenga zilela mia."

9 Amala Yesu kalonga, "Yeli na magutwi ga kuhulika na yahulige ganilonga."

10 Yesu viyakalile yaiyeka, waluko wake kumi na waidi weli hamwe na wanhu wamwenga wamuwinza na kumlongela yawafambulile mifano yake. 11 Nayo Yesu kawalongela, "Mweye mwing'higwa udahi wa kumanya difisigwe muufaume wa Mulungu, mbali kwa waja weli kunze kila chinhu kumwao nowalongela kwa mifano 12 ili,

‘walole kwakugangamiza

mbali sekewaone,

wahulike vinogile ng'hani,

mbali seke wavimanye.

Ama ivo, wahamhindukile Mulungu,

nayo yahawalekesele malozo gao.’"

13 Amala Yesu kawauza, "Kama hamuumanyile mfano uno? Modahaze kuimanya mifano imwenga? 14 Mhandaji ija wa mbeyu nikama munhu yoligula usenga wa Mulungu. 15 Mbeyu zilagale nzila, iyo waja wanhu wohulika usenga wa Mulungu, bahaja Mwenembago kokwiza na kusola uja usenga uhandigwe mmwao. 16 Mbeyu zilagalile muulongo uli na mabwe, iyo waja wanhu wohauhulika usenga wa Mulungu, bahaja woubokela kwa ndeng'helo. 17 Mbali kama ija mimela yabule mizizi mitali usenga wa Mulungu haukala mmoyo, kwavija magazo na madununzo gaheza kwambuli ya usenga uo woleka kuutogola. 18 Mbeyu zilagalile mmiwa, iyo waja wanhu wouhulika usenga wa Mulungu, 19 mbali mahunganiko ga muiisi ino, kulonda vinhu na maya ya mbuli zimwenga vihawengila vouzonga usenga uli mmwao na hawadaha kuusang'hanila sang'hano usenga uo. 20 Mbeyu zilagalile muulongo uli na lutuba, iyo waja wanhu wohulika uja usenga wa Mulungu, woubokela na kuusang'hanila mbuli nyingi zinogile kama zija mbeyu wamwenga salasini na wamwenga sitini na wamwenga mia ya ija ihandigwe."

21 Yesu kagendelela kuwalongela, "Ivo, munhu kodaha kubwinha lumuli na kuugubika mdidebe hebu muuvungu wa komwa? Habule, mbali wokwikigwa haichingolobweda. 22 Ivija habule mbuli ifisigwe sekeivumbuligwe hebu mbuli yoyose igubikigwe seke igubuligwe. 23 Uhawa na magutwi ga kuhulika, na uhulike ganilonga!

24 Amala kawalongela, "Muitiganye ng'hani, vija vumuilavile kutegeleza usenga, ivo Mulungu viyakutenda uumanye, kaidi Mulungu kokutenda umanye ng'hani. 25 Manake ija munhu yotegeleza usenga wa Mulungu na kuumanya, Mulungu komtaza na kumtenda aumanya ng'hani." Kama munhu hategeleza usenga wa Mulungu, hata chija chidodo chiachimanya cha usenga wa Mulungu chobokigwa.

26 Yesu kagendelela kulonga,"Ufaume wa Mulungu uilinga vino. Munhu imwe kamiza mbeyu kumgunda. 27 Yahamala kumiza mbeyu, chila zua misi na chilo, viyawasile na kulamka, mbeyu yokota na kukula bila iyo kuvimanya mbeyu viikota nakukula. 28 Ikala ivo kwavija ulongo wenyego wokoteza mbeyu, amala mayani na mbelewele, amala uhule mdikwamvi. 29 Amala uhemba uhakangala, mlimi kokwingila mumgunda na mundu jake da kusengela manake mulao uvika."

30 Yesu kawauza, "Ivo chiulinge na choni ufaume wa Mulungu? Hebu mfano ulihi wakuilinga nawo chiusimulile umanyike? 31 Uilinga na mbeyu ya haladali, ihahandigwa muulongo iyo mbeyu ndodo ng'hani kubita mbeyu zose zili muiisi. 32 Mbali yahota, yokula na yokua mbiki mkulu kubita yose ili mdikonde, uli na makwamvi makulu mbaka ndege wozenga mvulu zao mgamakwamvi gake.

33 Kwamifano imwenga mingi kama ino Yesu kalonga nao Usenga wake, kwa vija viwovimanya. 34 Yesu halongile nao mbuli yoyose bila mifano. Mbali viyakalile na waluko wake, wao kawafambulila chila chinhu.

35 Mchigulogulo mdizua ijo, Yesu kawalongela waluko wake, "Chiloke chite mbaka umwambu mwa lamba." 36 Waluko wake wadileka dija bumbila, wengila muingalawa iyakalile Yesu wasegela nayo. Na wanhu wengila mzingalawa zimwenga wailongoza nao. 37 Bahaja halawila beho kulu mdilamba, digala ng'humbi da mazi ditoile ngalawa ija iyakalile Yesu mbaka ikala yomema mazi mgati. 38 Yesu kakala yawasile mgati hachisogo mwingalawa kuno kasigamiza ditwi jake mchilago. Waluko wake wamlamsa, wamlongela, "Mfundaji, hugesa kama chofa?"

39 Yesu kalamka, kadikomhokela beho dija, kadidikomhokela dija ng'humbi da mazi, "Nyamala hupi!" Bahaja, beho dinyamala, na lamba dikala na utindiwala mkulu. 40 Yesu kawalongela waluko wake, "Habali modumba ivo? Ivo, mng'hali hamtogola?" 41 Nawo waluko wake wakala wadumbile ng'hani, waiuza, "Yelihi ino mbaka beho na ng'humbi da mazi vomtegeleza?