1 Yesu viyakalile yolawa hai ng'anda ya Mulungu, mwaluko wake imwe kamlongela, "Mfundaji! lola vija mabwe gano vigali makulu na mazengo viganogile!"

2 Baho Yesu kamwidika kalonga, "Ivo, gwee kokanganya mazengo gano vigali makulu? Habule hata dibwe dimwe donda kusigala hachanha mwadibwe dimwenga, chila dibwe dobomoligwa."

3 Yesu viyakalile kakala kulugongo lwa Mizeituni yoilola na ng'anda ya Mulungu, Petulo na Yakobo na Yohana na Andulea wainega wamuwinza Yesu na wamuuza, 4 "Tebu chilongele, mbuli zino zolawilila lini? Nachoni kilaguso cha kuchilagusa mbuli zino za behi kulawilila?

5 Yesu kasonga kuwalongela, "Itiganyeni na munhu yoyose seke yawavwizile. 6 Manake wanhu wengi wokwiza na kutumila Zina jangu na wolonga, ‘Iyo nie Kilisito,’ nao wowavwizila wanhu wengi. 7 Mhahulika mbuli ya bung'hukila, hebu nongelela ya bung'hukila, seke mdumbe. Mbuli izo zokwiza kulawilila tu, mbali uja uhelelo ung'hali. 8 Wanhu wa isi imwe woitoa na wanhu wa isi imwenga hebu wanhu wa ufaume umwe woitoa na wanhu wa ufaume umwenga. Kolawila na mtigisiko hanhu hakwe hakwe na nzala kulu. Madununzo gago iyo kama mosi mwa usungu wa kulela.

9 Mbali mweye muitiganye. Manake wowagala mvitala na wowalibula na mibalati mzing'anda za kuitinganila wayahudi. Ivija molamuligwa haulongozi lwa wakulu na wafaume kwavija mweye mwa wajalusona wangu, ili kuwalongela mbuli zangu. 10 Mbali kabula uhelelo kufika, tanhu Usenga Unogile uliguligwe kwa wanhu wose. 11 Wahamwamhani na kuwagala mvitala kulamuligwa, seke mgae kwa dakulonga. Longeni tu jojose donda mwing'higwe, kwavija sio mweye mulonga mbali Muhe wa Mulungu. 12 Baho Munhu komhinduka ndugu yake ili yakomigwe, tata komhinduka mwanage yakomigwe. Wana wowatoa tata na mami zao mbaka wowakoma. 13 Wanhu wose wowalema kwavija mweye wajalusona wangu, mbali yonda yafunye moyo mbaka hauhelelo kohonyigwa.

14 "Mhaona kinyolodo icho kima hanhu hahalondeka mui ng'anda ya Mulungu mvimanye kua hana chinhu chihile chogala ubananzi na hachilondeke kukala umo, mvimanye yogesa choni! Waja wanhu wali ku Yudea wakimbilile kulugongo. 15 Iyo yeli kuchanha mchiswili cha ng'anda yake seke ya hulumuke hasi hebu kwingila mng'anda kusola chochose. 16 Yeli kumgunda sekeyabwele ukae kusola valo jake. 17 Woluona wana chike weli na inda hebu waja wokong'heza mmazua gago! 18 Puleni Mulungu mbuli zino sekezilawilile msimo wa mbeho. 19 Manake mazua gago wogaya ng'hani vija haina lawila hachisogo tangia baho Mulungu viyalumbile isi na mbaka lelo na hailawila kaidi mbee! 20 Kama Mndewa sambi yahunguze mazua gago, habule munhu yoyose sambi yahonyigwe, mbali kwa chimo cha waja yawasagulige waiyeka, Mndewa kogahunguza mazua gago.

21 "Mmazua gago munhu yoyose yahawalongela, ‘Loleni, Kilisito kakuno!’ hebu, ‘Loleni, kakuja!’ Sekemumtogole. 22 Manake wolawila wanhu woikema walagusi wa uvwizi na wamwenga woikema nie ‘Kilisito!’ Nao wosan'na vilaguso na uzonza ili kuwazaganya, ihadahika hata waja wasaguligwe waiyeka. 23 Ivo itiganyeni! Nie niwalongela mbuli zino kabula haganalawilila.

24 Mbali mmazua gago, kugala kuhamala, "Zua dogeligwa ziza na mwezi haulava bung'hulo jake, 25 nhondo zogwa kulawa kuulanga, na baho vinhu vimwenga vili kuulanga votigisika.’ 26 Leka wanhu wose vonda wamuone Mwanage Munhu viyeza mgamawingu kwa udaho mwingi na ukulu wa Mulungu. 27 Nayo kowalagiza Watumigwa wake wa kuulanga kwa Mulungu wawakunzanye wanhu wasaguligwe na Mulungu kulawa mhande zose nne za isi, kulawa muuhelelo mwa isi mbaka muuhelelo mwa ulanga kwa Mulungu.

28 "Ifunzeni mfano uno kulawa mumbiki wa Mtini, mhaona makwamvi gake gochipuka na kulava mayani, movimanya kua msimo wa mulao wahabehi. 29 Ivija, mhagaona gaja ganiwalongele golawilila, mvimanye kua Kilisito kahabehi kwiza na kamuulwivi. 30 Nomlongeleni kweli, wanhu wa ulelo uno haukwaga mbaka mbuli zino zose zilawilile. 31 Ulanga na isi wobita, mbali usenga wangu haukwaga mbee.

32 Mbali kwa mbuli ya zua dijo na saa habule hata imwe yovimanya, hata watumigwa wa kuulanga kwa Mulungu hebu nie Mwana wa Munhu sivimanya, ila Tata yaiyeka. 33 Itiganyeni! Mkale meso mpula! kwavija hamvimanya saa ija yonda ivike. 34 Yokua kama munhu yeli muumwanza viyaileka ng'anda yake na kuwalagiza watumigwa wake wailole goya, amala kamlongela ija yokaliza ng'anda yokala muulwivi yakale meso. 35 "Kwaivo itandeni kwavija hamvimanya kobwela lini mweneng'anda, kama ni chigulogulo, hebu chilo chizamile, hebu imitondo lukwili nzogolo yokwika, hebu usimbukilo wa zua. 36 Mkale meso kama yahalawila gafula, seke yeze kuwavika muwasa. 37 Dija diniwalongela mweye, ivija nowalongela wanhu wose ‘Muitande goya!’ "