1 Imitondo lukwili, chitala chose manake wakulu wa walava nhambiko na wavele vilongozi na wofunda ndagizi za Musa, waitogolela hamwe. Wamfunga Yesu, wamsola na kumgala kwa Pilato yakalile Kilongozi wa Kilumi. 2 Pilato kamuuza, "Ivo, gweye iyo Mfaume wa Wayahudi?"

Yesu kamwidika, "Kama gweye mwenyego vuulonga."

3 Wakulu wa walava nhambiko wamlongeleza Yesu kwa mbuli nyingi. 4 Mbali Pilato kamuuza kaidi Yesu, "Ivo, kwabule da kuwedika? Lola mbuli nyingahi ziwakulongeleza."

5 Mbali Yesu hagendelele kuwedika, baho Pilato kakanganya.

6 Ikala mazoela gake Pilato chila chipindi cha Pasaka komvugulila mfungigwa imwe mdigeleza ija iwamlonda wanhu. 7 Chipindi icho munhu imwe yokemigwa Balaba kakala yafungigwe mdigeleza hamwe na wabananzi wayage waswangize wanhu kutenda ubananzi na kukoma. 8 Dija bumbila da wanhu dimwizila Pilato na kumpula yawatendele kama vigali mazoela gake. 9 Pilato kawauza, "Molonda niwalekesele ino Mfaume wa Wayahudi?" 10 Manake Pilato kavimanya kua wakulu wa walava nhambiko wakala wamgoga na kumgala kumwake yamlamule kwa mbuli ya maya zao.

11 Mbali wakulu wa walava nhambiko wawaswangiza wanhu waja wamemile wampule yawalekesele Balaba badili ya Yesu. 12 Pilato kawauza kaidi, "Ivo monda nimtendele choni ino munhu imumkema Mfaume wa Wayahudi?"

13 Watoa nyangi walonga, "Muwambeni mumsalaba!"

14 Mbali Pilato kawauza, "Habali? Kabananga choni?" Mbali wao waguta nyangi kwa kuiyoha ng'hani, wolonga, "Muwambeni mumsalaba!"

15 Pilato kalonda yaweng'he ndeng'helelo wanhu waja wamemile, kawalekesela Balaba, nayo kalagiza Yesu yalibuligwe mbalati, na kamlava ili wamuwambe.

16 Wamilizi wamsola Yesu waita nayo mui ng'anda ya Pilato, ng'anda iyo yokemigwa Plaitolio. Umo wakunzanya bumbila jose da wamilizi. 17 Wamvaza Yesu golole da zambalau manake valo da Kifaume, wazinga kigalama cha miwa, wamvaza Yesu mditwi. 18 Wasonga kumlamsa kwa kumzeha, "Mwinyi, Mfaume wa Wayahudi!" 19 Wamtoa kwa mibalati ya midete kwa kubwelela kaidi na kaidi mditwi na kumtemela mate. Wamfugamila mmagulu gake kwa kumzeha. 20 Amala viwamalile kumzeha, wamhambula dija golole da zambalau, wamvaza valo jake mwenyego. Amala wamlava kunze ili wakamuwambe mumsalaba.

21 Munhu imwe kulawa kae ya Kilene zina jake Simoni, tata yao kina Alekizanda na Lufo, kakala yobita nzila ya kwingila muikae kulawa kumgunda, wamilizi wamswangiza yaupape uja msalaba wa Yesu. 22 Amala wamgala Yesu mbaka hanhu hokemigwa Goligota, iyo manake ni hanhu ha vuha da ditwi. 23 Nao wamwing'ha divai ihanganyigwe na dawa ya mbiki wa manemane, mbali Yesu kalema kung'wa. 24 Amala wamuwamba, na vivalo vake wavigola kwa kuvitoela simbi. 25 Ikala yovika saa nhatu imitondo viwamuwambile Yesu. 26 Mbuli yakuwambigwa kwake yandikigwa vino, "Mfaume wa Wayahudi." 27 Wamwamba Yesu hamwe na wanhu wabavi waidi, imwe msalaba wa ubanzi wake wa kulume imwenga msalaba wa ubanzi wa kumoso. 28 Baho gaja mayandiko gandikigwe galinganya, "Kahanganyigwa hamwe na wabananzi."* 29 Wanhu wakalile wobita nzila behi nawo watigisa matwi gao na kumzeha wolonga,"Enaa! Gweye ulongile kodaha kuibomola ng'anda ya Mulungu na kuizenga kwa mazua madatu, 30 uihonye mwenyego hulumuka mumsalaba." 31 Ivija wakulu wa walava nhambiko hamwe na wafunda ndagizi za Musa wamzeha wamwenga wailongela, "Iyo kawahonya wamwenga, mbali hadaha kuihonya mwenyego! 32 Waja Mafalisayo na wafunda ndagizi za Musa walonga, kama iyo Kilisito Mfaume wa Waizilaeli, na yahulumuke lelo mumsalaba, ili chilole na kumtogola." Waja wawambigwe hamwe nao wamliga.

33 Viivikile saa sita, ziza digubika isi yose kwa masaa madatu. 34 Muisaa tisa Yesu kaguta ndilo kwa dizi kulu, kalonga,"Eloi, Eloi lama Sabakitani?" Manake, "Mulungu wangu, Mulungu wangu mbona kunileka?" 35 Wanhu wamwenga wemile behi nayo viwahulike mbuli iyalongile, walonga, "Tegelezeni komkema Elia." 36 Munhu imwe kalopola, kazabika siponchi mui divai yaugwadu, kaika mdidete, kamwing'ha Yesu yang'we kalonga, "Tebu mulekeni, chilole kama Elia kokwiza kumlava kulawa baho mumsalaba." 37 Amala Yesu kalila kwa dizi kulu, na kadanganika. 38 Golole dikalaile doning'inila hanhu hanhang'hane mwi ng'anda ya Mulungu didegeka vihande vidi kulawila kuchanha mbaka hasi. 39 Baho ija mlongozi wa wamilizi, yakalile kema haulongozi ha msalaba wa Yesu, viyahulike ija dizi yake na viyalolile viyakala yodanganika, kalonga, "Kweli munhu ino kakala Mwana wa Mulungu!" 40 Hakala na wanachike wamwenga wakalile wolola kwa kutali, umo wakala baho Malia kulawa kae ya Magidala, na Malia mami yao Yakobo mdodo na Yose, ivija kakala baho na Salome. 41 Wanachike wano waisondelela na Yesu na kumhunganikila viyakalile Galilaya. Ivija hakala na wanachike wamwenga wengi wakalile weza hamwe nayo Yelusalemu.

42 Viivikile chigulogulo, kwavija dikala zua da kuitanda kabula ya zua da kuhumula Wayahudi, 43 Yusufu munhu kulawa Alimataya yakalile yotogoligwa mchitala, nayo mwenyego kakala koubeta kwiza kwa Ufaume wa Mulungu, kamuwinza Pilato bila kudumba na kumpula yeng'higwe lukuli lwa Yesu ili yakauwande. 44 Pilato kakanganya kuhulika Yesu tiyali kadanganika. Ivo kamkema ija mlongozi wa wamilizi, kamuuza kama Yesu kakala tiyali kadanganika. 45 Viyahulike kulawa kwa ija mlongozi wa wamilizi kua kweli Yesu kadanganika tiyali, Pilato kamleka Yusufu yausole lukuli lwa Yesu. 46 Baho Yusufu kagula sitili nzelu chinang'hane, kauhulumula lukuli lwa Yesu mumsalaba, kauzinga ija sitili inang'hane kawika mdipanga disongoligwe mdibwe. Amala kabimbilisa dibwe kulu kugubika haulwivi lwakwingilila mdipanga. 47 Malia kulawa kae ya Magdala na Malia mamiyake Yose wahaona hanhu haja hayagonezigwe Yesu.