1 Mchipindi icho, bumbila kulu da wanhu diiting'hanila kaidi. Kwavija wakala wabule ndia, Yesu kawakema waluko wake kawalongela, 2 "Nodionela bazi bumbila dino da wanhu, kwavija chikalahamwe zua da kadatu sambi na wabule ndia. 3 Nihawalongelaga waite ukae na nzala, wosinduka nzila kwavija wamwenga wolawa kutali."

4 Waluko wake wamulongela, "Mbali hano chahachiwala chopatahi migate ya kwenela kuwalisa wanhu wose? 5 Yesu kawauza, "Mna migate mingahi?"

Wamwidika, "China migate saba."

6 Yesu kawalongela wanhu wakale hasi. Viyamalile kusola migate na kumwing'ha hewela Mulungu, kaibanzula na kuweng'ha waluko wake ili wawagolele wanhu, waluko wake watenda ivo. 7 Ivija wakala na visomba vidodo, Yesu kamwing'ha hewela Mulungu, kawalagiza waluko wake waweng'he wanhu. 8 Waja wanhu wose waija ndia iyo mbaka weguta, amala waluko wa Yesu wakunzanya vihande visigale wamemeza vigelo saba. 9 Wanhu wajile ndia ija wovika elufu nne. Viyakomeleze Yesu kawalaga wanhu waite kumwao, 10 na bahaja kengila muingalawa yeli na waluko wake waita ubanzi wa Dalumanuta.

11 Mafalisayo weza, wasonga kumuuza Yesu. Ili kumgeza, wampula yawalagusile chilakuso kulawa kuulanga kwa Mulungu. 12 Yesu kalumila ng'hani mmoyo, kawauza, "Habali ulelo uno wolonda vilaguso? Kweli, nowalongela, hawalagusiligwa vilaguso vovose."

13 Amala Yesu kawaleka Mafalisayo, kakwela muingalawa na waluko wake, kasonga kuloka umwambu.

14 Waluko wakala waisemwa kugala migate ya kwenela, wakala na mgate umwe tu muingalawa. 15 Yesu kawakomhokela, waitiganye na mela da Mafalisayo na wa Helode.

16 Waluko wa Yesu wasonga kuilongela wenyego kua, "Kalonga vino kwavija hachigalile migate."

17 Yesu kavimanya viwotonga, kawauza, "Mbona molongelela kwambuli ya kukosa migate? Mng'hali hamvimanya hebu kupata ubala? Ivo, mbona mna miyoyo midala? 18 Mna meso mbali hakulola, mna magutwi mbali hamhulika? Ivo, muisemwa 19 viniibanzule ija migate mitano kuwalisa wanhu elufu tano? Mkuzanya vigelo vingahi vimemile ndia isigazigwe?"

Wamwidikila kua "Vigelo kumi na vidi."

20 "Ivo, viniibanzule ija migate saba kuwalisa wanhu elufu nne, mkuzanya vigelo vingahi vimemile ndia isigazigwe?"

Wamwidikila, "Vigelo saba."

21 Amala kawauza, "Ivo, mng'hali hamnavimanya?"

22 Yesu na waluko wavika kae ya Betisaida na wanhu wamgalila munhu imwe chipofu, wampula yamwamhe munhu iyo ili yamhonye. 23 Yesu kamwamha mkono iyo munhu chipofu na kamgala hamwande chidogo haikae iyo. Viyamtemele mate mmeso na kumwikila makono, Yesu kamuuza, "Koona chochose?"

24 Chipofu ija kalola, na kalonga, "Nowaona wanhu, wooneka kama mibiki igenda."

25 Yesu kamwikila kaidi makono mmeso. Amala meso gake gahona, kabwelela kulola na kakiona chila chinhu ivija vichili. 26 Yesu kamlaga yabwele ukae yake, kuno kamlalika, "Genda ukae yako seke ubitile hagati ya kae."

27 Yesu na waluko wake wasegela kuita mvijiji vili habehi na uko Kaisalia Filipi. Viwakalile nzila Yesu kawauza, "Wanhu wolonga nie nani?"

28 Wamwidika, "Wamwenga wolonga gweye Yohana Mbatizi, wamwenga wolonga kwa mlagusi wa Mulungu Elia na wamwenga wolonga gweye imwe kati ya waja walagusi wa Mulungu."

29 Yesu kawauza, "Ivo, na mweye, molonga nie nani?"

Petulo kamwidika, "Gweye iyo Kilisito."

30 Yesu kawagoma seke wamlongele munhu yoyose kua nie iyo Kilisito.

31 Yesu kasonga kuwafunda waluko wake kua nie Mwana wa Munhu nolondeka nidununzike ng'hani na kulemigwa na wavele vilongozi, wakulu wa walava nhambiko, na wafunda ndagizi za Musa, na womkoma na mdizua da kadatu kozilibuka. 32 Kagalonga gano bila kifiso, lekaivo Petulo kamsola hamgwazo kasonga kumgoma. 33 Mbali Yesu kahinduka na kuwalola waluko wake, kamlongela Petulo, "Bwela hachisogo, Mwenembago gweye! Gweye hutonga gali kwa Mulungu mbali kotonga ga wanhu."

34 Amala kadikema bumbila dija da wanhu na waluko wake, kalonga, "Munhu yoyose yolonda kua mjalusona wangu, kolondeka yazileke mbuli zake mwenyego na yatogole kudununzika mbaka kudanganika kwa mbuli yangu, leka yaniwinze. 35 Kwavija munhu yoyose yolonda kuuhonya ugima wake mwenyego kowagiza, mbali yoyose yolonda kuwagiza ugima wake mwenyego kwa mbuli yangu na kwa mbuli ya Usenga Unogile, iyo kouhonya. 36 Yomfaya choni munhu kama yahapata isi yose na kuwagiza ugima wake mwenyego? 37 Hebu munhu kolava choni yapate kaidi ugima wake? 38 Munhu yoyose muulelo uno uli na ugoni na malozo, yahanionela chinyala nie na usenga wangu, nie Mwana wa Munhu, nayo nomlema yaheza mdibung'hulo da Tata yangu hamwe na watumigwa wa kuulanga kwa Mulungu."