1 Uno uo mwanduso wa Usenga Unogile wa Yesu Kilisito, Mwanage Mulungu. 2 Usonga kama vuwandikigwe mchitabu cha Isaya mlagusi wa Mulungu,

"Mulungu kalonga, ‘Nomlagiza msenga wangu yakulongolele

Iyo yonda yakutandile nzila.’ 3 Na dizi jake dokema kuchiwala,

Yolonga, ‘Mtandileni Mndewa nzila yake,

Itandeni goya mmoyo kumbokela Mndewa yahesa!’"

4 Iyo msenga kakala Yohana Mbatizi kalawilila kuluwala kawalongela wanhu, "Longeni malozo genu na kugaleka na mbatizigwe, na Mulungu kowalekesela malozo genu." 5 Wanhu kulawa isi Yudea na hanhu hose ha Yelusalemu wakala womuwinza kumtegeleza, na watogola kugalonga na kugaleka malozo gao, nayo kawabatiza muulwanda lwa Yolodani.

6 Yohana kakala kavala kivalo chitengenezigwe kwa mazoya ga mnyama yokemigwa Ngamia na mchigudi kaifunga na mkwiji wa mbende. Ndia yake ikala nzige na uki. 7 Nayo Yohana kaligula yolonga, "Hachisogo kokwiza yeli na udaho mkulu kubita nie. Iyo nie nzakabwa tu kumwake sidaha hata kumfulila nzabi za mikwabazi yake. 8 Nie nombatizeni kwa mazi, mbali iyo kombatizeni kwa Muhe wa Mulungu."

9 Mazua gago Yesu keza kulawa kae ya Nazaleti ya Galilaya, kavika kwa Yohana nayo kambatiza muulwanda lwa Yolodani. 10 Yesu viyakalile kolawa mmazi, kaona ulanga wogubuka na Muhe wa Mulungu kamuhulumukila kama vija hua. 11 Na dizi kulawa kuulanga kwa Mulungu dihulikigwa dolonga, "Gweye iyo mwanangu wa wende ininogeligwe ng'hani."

12 Bahaja Muhe wa Mulungu kamlongoza Yesu kuita kuchiwala, 13 nayo kakala uko mazua alobaini, kuno kogezigwa na Mwenembago. Uko kakala na wanyama wa kuimbago, nawo Watumigwa wa kuulanga kwa Mulungu wakala womsang'hanila.

14 Mmazua mengi vigabitile Yohana kagogigwa na kwikigwa mchifungo. Hamwande Yesu kaita kae ya Galilaya na kasonga kuligula Usenga unogile wa Mulungu, 15 kalonga, "Chipindi chivika, na chipindi cha Mulungu kulongoza chahabehi! Mgalonge na kugaleka malozo genu, na kuutogola Usenga Unogile!"

16 Zua dimwe Yesu viyakalile yogenda hamgwazo mwa bahali ya Galilaya kawaona wavula somba waidi Simoni na Andilea ndugu yake wakala wovua somba na lwavu lwao. 17 Yesu kawalongela, "Niwinzeni, na nie nomfundani mnigalile wanhu kama vija vumkala movula somba." 18 Bahaja waleka nyavu zao wamuwinza Yesu.

19 Viyagendile hamwande chidogo kawaona Yakobo na Yohana wanage Zebedayo. Wakala muingalawa yao wosasala nyavu zao. 20 Bahaja Yesu kawakema wamuwinze, nawo wamleka Zebedayo tata yao muingalawa na waja watumigwa wa kulihigwa, nawo wamuwinza Yesu.

21 Amala Yesu na waluko wake wagoga nzila mbaka Kapelinaumu, vidivikile zua da kuhumula da Wayahudi wengila mwi ng'anda ya kuiting'hanila ya Wayahudi na kasonga kuwafunda. 22 Wanhu wakanganya ng'hani kwa vija viyafunda, manake kakala yowafunda kama munhu yolalika, mbali si kama wafundaaji wao wa ndagizi za Musa.

23 Bahaja, kengila munhu mwing'anda ya kuiting'hanila yakalile yambule chinyamkela nayo kakala yoguta nyangi yolonga, 24 "China choni nagweye, Yesu ulawa Mnazaleti? Ivo, kwiza kuchibananga? Nokumanya gweye kwa nani, gweye iyo wikigwe uiyeka kulawa kwa Mulungu!"

25 Mbali Yesu kamkomhokela ija chinyamkela, na kamlongela, "Nyamala hupi na umlawe munhu ino!"

26 Iyo chinyamkela kamtigisa tigisa kwa ludabwa na kaguta kwa dizi kulu, amala kamlawa munhu ija. 27 Wanhu wose wakanganya, na kuiuza wenyego kwa wenyego, "Chino choni? Uno ufundaji waiyeka uli na laliko. Manake munhu ino kowalakila hata vinyamkela nawo womtegeleza!"

28 Ivo mbuli zake zenela hima chila hanhu mziisi zili behi na Galilaya.

29 Labaho Yesu na waluko wake Simon na Andulea na Yohana na Yakobo viwalawile mwing'anda ya kuiting'hanila Wayahudi, wavika muikae ya Simoni na Andilea. 30 Mama nkoi wa Simoni kakala mtamu wa mdikomwa, kolumwa homa, na bahaja viyavikile wamlongela Yesu mbuli iyo. 31 Ivo Yesu kamuwinza, kamgoga mkono na kamwinula. Baho homa ikunguzuka, nayo kasonga kuwasang'hanila.

32 Mchigulogulo zua da kuhumula vidimalile, wanhu wamgalila watamu wose na waja wambule vinyamkela. 33 Wanhu wengi wa kae ija waikunzanya hamwe hanze ya lwivi lwa ng'anda. 34 Yesu kawahonya wanhu wengi wakalile na chila chitamu na kawalava vinyamkela wengi. Mbali hawalekile walonge chochose kwavija wammanya iyo nani.

35 Mitondo yake lukwili, kabula zua kusimbuka, Yesu kalawa kaita hanhu halibule munhu yoyose kakala baho kupula. 36 Simoni na wayage waita kumzambwila Yesu kuyeli, 37 na viwamonile wamlongela kua, "Kila munhu kokuzambwila gweye."

38 Yesu kawedika kawalongela, "Chiteni mmabululu gamwenga galibehi na Galilaya, mhate kuligula Usenga wa Mulungu uko, manake icho chinizile." 39 Kwaivo kazunguluka Galilaya yose, kuno kuligula mnaizing'anda za kuiting'hanila Wayahudi na kuwalava vinyamkela.

40 Munhu imwe yeli na utamu wa dikulu kamwizila Yesu, katumbala mavindi kampula, kamlongela, "Wahalonda kodaha kuninang'hana." 41 Yesu kamonela bazi kulu, kagolosa mkono wake kamwamha. Kamlongela, "Nolonda, unang'hane!" 42 Bahaja utamu wa dikulu umlawa, kanang'hana. 43 Amala Yesu kamgoma ng'hani, na kamleka asegele hima aite 44 kwa kumlongela, "Kolondeka sekeumlongele munhu yoyose mbuli zino. Mbali genda ukailaguse kwa mlava nhambiko ili kuwagangamizila kua kuhonyigwa. Na ukalave nhambiko kama viyalalike Musa."

45 Mbali munhu ija kalawa na kasonga kulonga chila hanhu vija viyahonyigwe. Kwaivo Yesu kapotigwa kwingila mzikae kaidi bila kifiso badili yake kalonda hanhu halibule wanhu kakala baho. Mbali wanhu wang'hali womzambwila uko na uko kuyali kila ubanzi.