1 Vidibitile zua da kuhumula Wayahudi, behi na mitondo ya zua da jumapili, Malia wa Magidala na ija Malia imwenga waita kudilola panga. 2 Bahaja dilawila gudemo kulu da isi, mtumigwa wa kwa Mulungu wa Mndewa kahulumuka kulawa kuulanga, kadibimbilisa dibwe na kudilava haulwivi amala kadikalila. 3 Mtumigwa iyo wa kuulanga kwa Mulungu kaoneka kama lumwesa na vivalovake vake vikala vizelu chwee. 4 Waja wamilizi wa panga wagudemeka kwa kudumba ng'hani, wakala kama wadanganike. 5 Mbali ija mtumigwa wa kwa Mulungu kawalongela waja wanachike, "Mweye sekemdumbe! Nivimanya kua momzambwila Yesu yawambigwe mumsalaba. 6 Kahabule hano, manake kazilibuka kama viyalongile. Izoni mulole haja hayakalile kawasa.

7 Ivo, lopoleni gendeni mkawalongele waluko wake kua kazilibuka, na sambi kawalongoleleni kuja Galilaya, uko konda mmuone. Onaa nimala kuwalongela."

8 Ivo weli na gudemo na ndeng'helo ng'hulu, wanachike waja walawa hima mdipanga, wakimbila kuita kuwalongela waluko wake.

9 Bahaja, Yesu kaiting'hana nao kalonga, "Haligani." Wanachike waja wamuwinza, wamtumbalila mavindi, wamwamha magulu gake. 10 Amala Yesu kawalongela, "Sekemdumbe! Gendeni mkawalongele walukolo wangu waite Galilaya, na uko woniona."

11 Waja wanachike viwakalile woita, wamilizi wamwenga wa dija panga waita kuikae kulonga gaja galawilile kwa wakulu wa nhambiko. 12 Ivo waiting'hana hamwe na wavele, na viwamalile kuilongela, waweng'ha waja wamilizi sente nyingi.

13 Wawalongela, "Mweye molonga vino, ‘Waluko wake weza ichilo wamwiba cheye vichikalile chiwasa.’ 14 Kama mkulu wa isi ya Loma yahaimanya mbuli ino seke mgae cheye cholonga nayo na hampata mbuli yoyose."

15 Wamilizi waja wazisola sente zija, watenda kama viwalongiligwe. Mbuli ija yenela mwa Wayahudi mbaka lelo.

16 Baho waja waluko kumi na imwe waita Galilaya kulugongo uja yawalagize Yesu. 17 Viwamuone Yesu wamfugamila, mbali wamwenga wakala womkanganya Yesu. 18 Yesu kawawinza habehi, kawalongela, "Ning'higwa ulongozi wose muisi na kuulanga.

19 Ivo, gendeni mkawatende wanhu wa isi zose kua waluko wangu, mhawabatiza kwa zina da Tata na da Mwana na da Muhe wa Mulungu. 20 Na wafundeni kugoga ndagizi zose zinimwing'heni. Nanie nokala na mweye mazua gose, enaa, mbaka hauhelelo mwa ugima."