1 Chipindi icho, mfaume Helode wa Galilaya kahulika nhogolwa za Yesu. 2 Ivo, kawalongela watumigwa wake, "Munhu ino iyo Yohana Mbatizi kazilibuka, iyo mana kana udaho wa kusang'hana mizonza. 3 Helode iyo yamwamhile Yohana na kumgela muing'anda ya kufungila wanhu kwambuli ya Helodia, mwehe wa Filipo ndugu yake. 4 Chila mala Yohana kakala yamlongele Helode, "Havilondeka gweye kumsola mwehe iyo!" 5 Helode kalonda kumkoma Yohana, mbali kadumba wanhu kwavija wanhu wamtogola kua Yohana mlagusi wa Mulungu.

6 Mulusona wa mvumbuka ya Helode, biti Helodia kavina haulongozi ha waja wagonekigwe mulusona. Helode kanogeligwa 7 mbaka kamlalika biti iyo, "Noilahila kua nokwing'ha chochose chonda upule!" 8 Nayo kuno koswangizigwa na mami yake, kampula, "Ning'he ditwi da Yohana Mbatizi bahano mdisinia!" 9 Nayo mfaume kagwa giogio, mbali kwavija viyailahile haulongozi ha waja wagonekigwe kalagiza yeng'higwe. 10 Baho Helode kalagiza mmilizi yaite muing'anda ya kufungila wanhu yakamkanhe ditwi Yohana Mbatizi. 11 Ditwi da Yohana digaligwa mditanda, keng'higwa ija biti nayo kasola kamgalila mami yake. 12 Waluko wa Yohana weza, wausola mtufi wake, wauwanda. Amala waita kumlongela Yesu mbuli iyo.

13 Yesu viyapatia mbuli iyo, kasegela hanhu haja kwa ngalawa, kaita hanhu halibule wahu ili yawe yaiyeka. Mbali wanhu viwapatile kuimanya mbuli iyo, wamuwinza kwa magulu kulawa mzikae. 14 Yesu viyatelemke kulawa muingalawa na kuona bumbila kulu da wanhu, moyo wake uwaonela bazi, na kawahonya watamu wao. 15 Viiviklie chigulogulo, waluko wake wamuwinza wamlongela, "Hanhu hano hamchiwala na zua diswa. Baho walage wanhu waite mvijiji waigulile ndia." 16 Yesu kawalongela, "Sio mbaka waite, weng'heni mweye ndia." 17 Mbali waluko wake wamlongela, "China migate mitano tu na somba waidi." 18 Yesu kawalongela, "Ngalileni hano." 19 Kawalagiza wanhu wakale hasi mmayani. Amala Yesu kaisola ijaa migate mitano na waja somba waidi, kalola uchanha kuulanga, kavipulila ganogile ga Mulungu. Amala kamega ija migate, kaweng'ha waluko wake, nao waweng'ha wanhu. 20 Wanhu wose waja weguta. Amala waluko wakunzanya visigale na wamemenza vigelo kumi na vidi. 21 Waja wadile walume wovikila elufu tano bila kupeta wanachike na wana wadodo.

22 Bahaja, Yesu kawalagiza waluko wake wakwele muingalawa, wamlongole umwambu mwa lamba chipindi yeye kogalaga mabumbila ga wanhu. 23 Viyamalile kuwalaga wanhu, kakwela kulugongo yaiyeka kupula. Kakala uko yaiyeka yopula mbaka hadiswele zua. 24 Na chipindi icho ija ngalawa ivika mmabehi kuvika hagati ya lamba kulu, mbali itoigwa na nhumbi da mazi kwa vija beho dikala doisung'ha ngalawa. 25 Ichilo habehi na kukunguzuka, Yesu kawawinza waluko wake kuno yogenda uchanha mmanzi. 26 Waluko wake viwamonile yogenda uchanha mmazi wadumba ng'hani walonga,"Uno mzimu!" Waguta bung'hukila kwa kudumba. 27 Bahaja, Yesu kawalongela, "Nyamaleni, iyo niye. Sekemdumbe!" 28 Petulo kamlongela, "Mndewa, iyawa iyo gweye kweli, nilongele nikuwinze uchanha mmazi." 29 Yesu kalonga, "Haya, izo." Baho, Petulo katelemka kulawa muingalawa, kagenda uchanha ya mazi, kamuwinza Yesu. 30 Mbali Petulo viyaonile dija beho, kadumba na kasonga kudidimila, kalila kwa dizi yokema, "Mndewa nilohole!" 31 Baho, Yesu kagolosa mkono wake na kumwamha, kamlongela, "Gweye ulina nhogolwa ndodo! Habali kuona woga?" 32 Amala wakwela muingalawa, na beho ditindiwala. 33 Wose wakalile mgati ya muingalawa watumbala mavindi na kumfugamila, walonga, "Gweye kweli Mwana wa Mulungu."

34 Waloka umwambu wa lamba, wavika isi ya Genezaleti. 35 Wanhu wa uko Viwammanyile kua iyo Yesu, wapwililisa mbuli zake chila hanu. Baho, wamgalila Yesu watamu wose. 36 Wampula yawalekele wamwamhe tu mhindo ya valo jake. Nao wose wamwamhile wahona.