1 Yesu kengila muingalawa, kaloka lamba kavika ukae yake. 2 Baho wanhu wamgalila munhu imwe yaholole lukuli, katambalazigwa mchilago. Yesu viyaonile nhogolwa yao, kamlomgela munhu ija yaholole, "Mwanangu seke udumbe! Kulekeseligwa malozo gako."

3 Wafunda ndagizi za Musa wamwenga wasonga kutonga, "Munhu ino komliga Mulungu!"

4 Yesu kavimanya viwatonga, kalonga, "Habali motonga gehile mmoyo?

5 Dilihi dibuhile ng'hani, kulonga ‘Kulekeseligwa malozo gako,’ hebu kulonga ‘Ima ugende?’ 6 Ivo, nonda mvimanye kua Mwana Munhu kanao udaho muiisi wa kuwalekesela wanhu malozo gao." Labaho kamlongela munhu ija yaholole, "Ima, usole chilago chako uite ukae yako." 7 Munhu ija yakalile yakolole kenuka, kaita ukae yake. 8 Wanhu wose wamemile haja, viwaonile gago galawilile, wadumba, wamtogola Mulungu yaweng'ile wanhu udaho kama uo.

9 Yesu kasegela baho, na viyakalile yoita kamuona munhu imwe yokemigwa Matayo, kakala hanhu hakwamhila kodi. Baho, Yesu kamlongela, "Niwinze."

Nayo Matayo kenuka na kumuwinza Yesu.

10 Yesu viyakalile ukae kukala kuja ndia, wagoga kodi wengi na wabananzi, weza na kuja na Yesu hamwe na waluko wake.

11 Mafalisayo viwaonile gago, wawauza waluko wake, "Habali mfundaji wenu koja na wagoga kodi na weli na malozo?" 12 Yesu kawahulika kawalongela, "Wanhu weli na ugima hawalonda mlaguzi, mbali watamu iyo wolonda mlaguzi. 13 Ivo, kaifunzeni kuumanya ulonzi uno, ‘Nolonda bazi mbali sio nhambiko.’ Sizile kuwakema wanhu wanovu, mbali weli na malozo."

14 Amala waluko wa Yohana Mbatizi wamuwiza Yesu, wamuuza, "Cheye na Mafalisayo chofunga mala nyingi, habali waluko wako hawafunga?" 15 Yesu kawedika, "Ivo, wagonekigwe mdizengele wolondeka kukala na giogio na kufunga wahawa hamwe na Mwenye zengele? Habule! Mbali chipindi chovika haja Mwenye zengele yahasegezigwa hamwao, chipindi icho chonda wawe na giogio na kufunga.

16 "Wanhu hawasonela chilaka cha chivalo cha sambi mchivalo cha umwaka. Manake chilaka icho chodideka valo ijo daumwaka, na haja hadegeke hokongezeka. 17 Na wanhu hawagela divai ya sambi mmifuko ya mbende ya bung'hukilalo yamwaka. Wahatenda ivo mifuko iyo yotulika na divai yokwitika, nayo mifuko iyo yobanangika. Mbali wanhu wogela divai ya sambi mmifuko ya mbende ya sambi, na vose vidi, mifuko ya mbende na divai vokala goya."

18 Yesu viyakalile yolonga gago, afisa imwe Myahudi kavika, kamtumbalila kalonga, "Biti yangu kadanganika sambi baha. Mbali nokupula chite ukamwikile mkono wako nayo kohona." 19 Yesu, kasegela hamwe na waluko wake kamuwinza. 20 Mama imwe yakalile na utamu wa kufua damu kwa milao kumi na midi, kamuwinza Yesu hachisogo kamha mhindo da valo jake. 21 Katenda ivo kwa kutonga mmoyo, "Nihajamha tu valo jake nohona." 22 Yesu kahinduka kamona, kamlongela, "Biti sekeudumbe! Nhogola yako ikuhonya," Mama ija kahona saa iija. 23 Amala Yesu kengila mng'anda mwa ija afisa. Na viyaonile watoa filimbi za giogio na waja wanhu wamemile wolombekeza, 24 kalonga, "Segeleni hano, biti ino hadanganike ila kawasa tu." Nawo wamseka.

25 Baho bumbila da wanhu wakalile haja vidisegezigwe, Yesu kengila mng'anda kamwamha mkono biti iyo, nayo kenuka. 26 Mbuli iyo yenela ng'hani muiisi ija yose.

27 Yesu kasegela baho, viyakalile yoita, vipofu waidi wamuwinza woguta nyangi wokema, "Mwana Daudi chionele bazi!" 28 Nayo Yesu viyengile mng'anda, wanhu wao waidi wamuwinza, nayo kawauza, "Ivo, motogola kua nodaha kuwahonya?" Nawo wamwidika,"Enaa Mndewa." 29 Baho Yesu kagamha meso gao, kalonga, "Na viwe ivo kama vumtogole."

30 Meso gao gaona, nayo Yesu kawalongela kwa kugangamiza na kulonga, "Seke mmulongele munhu yoyose mbuli ino." 31 Mbali wao wasegela, walongelela mbuli za Yesu muiisi ija yose.

32 Wanhu viwakalile wosegela, wamwenga wamgalila Yesu munhu imwe yakalile na ludanha kwavija kakala yambule chinyamkela. 33 Bahaja chinyamkela ija viyalavigwe, munhu iyo yakalile na ludanha kasonga kulonga, wanhu wakanganya walonga, "Mbuli kama ino hainalawila mui Izilaeli!" 34 Mbali Mafalisayo wakala wolonga, "Munhu ino kowawinga vinyamkela kwa udaho wa mkulu wa vinyamkela."

35 Yesu kaita mzikae zose na mvijiji na kufunda mzing'anda za kuiting'hanila Wayahudi kuno yoligula Usenga unogile wa ufaume wa Mulungu, na kuhonya vitamu vose na uzidilwa wachila namna. 36 Ivo viyawaonile wanhu, mabumbila kwa mabumbila, kawaonela bazi, kwavija wakala wodumba na hahawile na wa kuwataza kama ng'ondolo walibule msusilaji. 37 Baho kawalongela waluko wake, "Ndia imema mmigunda, mbali wagobolaji wadodo. 38 Ivo, mpuleni Mndewa Mulungu mwene uo mgunda yagale wagobolaji wagobole ndia yake."