1 Yesu viyahulumuke kulawa kulugongo, bumbila kulu da wanhu dimuwinza. 2 Ivo, keza munhu imwe yeli na dikulu, kamfugamila Yesu na kalonga, "Mndewa, wahalonda, kodaha kunihonya. 3 Yesu kagolosa mkono wake, kamwamha na kulonga, "Nolonda! Uhone." Bahaja munhu ija kahona utamu wake. 4 Amala Yesu kamlongela, "Tegeleza, sekeumulongele munhu yoyose, ila genda ukailaguse kwa mlava nhambiko, na kulava nhosa ija iyalagize Musa kuwagangamizila kua kuhona."

5 Zua dimwe Yesu viyakalile yokwingila muikae ya Kapelinaumu, mkulu imwe wa wamilizi kamuwinza na kumpula 6 kalonga, Mndewa, mtumigwa wangu kawasa ukae, mtamu wa kuholola na kolumwa ng'hani."

7 Yesu kamulongela, "Nokwiza kumuhonya."

8 Mbali iyo mwamilizi mkulu wa Loma kamulongela, "Mndewa, nie silondeka wingile muing'anda yangu. Mbali longa mbuli yoyose tu ya udaho na mtumigwa wangu kohona. 9 Kwavija hata nie nili haulongozi mwa wakulu wangu, nanie nina wamilizi iniwalongoza. Nihamlongela imwe ‘Genda!’ Nayo koita, na nihamulongela imwenga ‘Izo!’ Nayo kokwiza, na kwamtumigwa wangu, ‘Tenda vino!’ Nayo kotenda." 10 Yesu viyahulike mbuli hizo, kakanganyika kawalongela wanhu waja wakalile womwinza, "Nowalongela kweli, sinaona munhu yoyose muiisi ya Izilaeli yeli na nhogola kama ino. 11 Ivo, nowalongeleni kua wanhu wengi wokwiza kulawa kuusimbukilo wa zua na uswelo wa zua, nawo wokala muindia hamwe na Ibulahimu na Isaka na Yakobo muufaume wa kuulanga kwa Mulungu. 12 Mbali waja walondeke kua mu uo ufaume wa Mungu wokwasigwa kunze, mdiziza, uko wolila na kuluma meno." 13 Amala Yesu kamulongela iyo mkulu wa wamilizi wa chi Loma, "Genda ukae na viwe kumwako kama vuutogole." Na saa iija mtumigwa wake kahona.

14 Yesu viyavikile ukae yake Petulo, kamvika nkoi wa chike wa Petulo kawasa mdikomwa, kana homa ng'hali. 15 Baho Yesu kamwamha iyo mama mkono, na homa ikunguzuka, kema na kumhunganikila. 16 Viivikile chigulogulo, wamgalila wanhu wakalile wambule vinyamkela, nayo, kwakuwakomhokela tu kawawinga vinyamkela wose. Ivija kawahonya wanhu wose wakalile watamu. 17 Kasang'hana ivo ili kugangamiza gaja gayalongile mlagusi wa Mulungu Isaya,

"Iyo mwenyego kochisegezela uzidilwa wetu,

Kavisola vitamu vetu."

18 Yesu viyaonile bumbila da wanhu dimzunguluka, kawalagiza waluko wake waloke umwambu mwa lamba. 19 Mfundaji imwe wa ndagizi za Musa kamuwinza kamlongela, "Mfundaji, nie nokuwinza hohose hauita." 20 Yesu kamwidika, "Mbwisi wana mhango, na ndege wana mvulu, mbali Mwana munhu kabule hanhu hakuhumulila." 21 Amala munhu imwenga mwa waja waluko wake kamlongela, "Mndewa, nileke tanhu niite nikamuwande tataangu." 22 Mbali Yesu kamulongela, "Niwinze! Waleke wanhu wawile kama wafile wawawande wafile wayao."

23 Baho Yesu kakwela muingalawa hamwe na waluko wake. 24 Bahaja bung'hukila ng'hulu da mazi dilawila mdilamba, mbaka ng'humbi da mazi disonga kuigubika ngalawa, mbali Yesu kakala yawasile utulo. 25 Waluko wake wamuwinza wamlamusa wolonga, "Mndewa chihonye chofa!" 26 Yesu kawalongela, "Mweye wanhu muli na nhogola ndodo, habali modumba?" Baho kenuka kadikomhokela beho na dija lamba, baho hakala hupii. 27 Waja wanhu wakanganyika, walonga, "Munhu ino wa vilihi! Mbaka beho na ng'humbi vomtegeleza!"

28 Yesu kavika muiisi ya Wagadala, umwambu mwa lamba, na uko wanhu waidi wambule vinyamkela waiting'hanila nayo kulawila maloloni. Wanhu wao wakala wogela woga ng'hani, mbaka hakala habule munhu yagezile kubita nzila iyo. 29 Nawo wasonga kuguta nyangi, "Konda choni kumwetu gweye Mwana Mulungu? Ivo, kwiza kuchidununza na chipindi hachinavika?" 30 Behi na hanhu haja hakala na nguluwe wengi wosusiligwa. 31 Baho waja vinyamkela wampula,"Uhachilava chileke chiwengile nguluwe waja." 32 Yesu kawalongela,"Enaa, gendeni." Baho bumbila jose da vinyamkela diwalawa wanhu waja na diwengila nguluwe. Bumbila jose da nguluwe dipolomokela mumtelemko mkulu dididimila mdilamba na nguluwe wose wafila mmazi. 33 Amala wasusilaji wa waja nguluwe wakimbila waita kuikae. Uko wazilonga mbuli zose na mbuli ziwapatile waja wanhu wakalile wambula vinyamkela. 34 Baho, wanhu wose muikae ija walawa wamuwinza Yesu na viwamonile wampula yasegele mui isi yao.