1 Yesu viyagaonile mabumbila ga wanhu, kakwela kulugongo, kakala hasi. Waluko wake wamwizila, 2 nayo kasonga kuwafunda.

3 Wamweda waja wavimanyile kua womlonda Mulungu, manake ufaume wa kuulanga wao.

4 Wamweda weli na giogio, manake wao wokwiza kuhanigwa.

5 Wamweda weli na uhole manake wao wokwing'higwa isi iwe yao.

6 Wamweda waja wolonda ng'hani kusang'hana goyolonda Mulungu, manake Mulungu kowadahiza kusang'hana gago.

7 Wamweda waja wowaonela bazi wamwenga,manake Mulungu nayo kowaonela bazi.

8 Wamweda weli na muhe ubung'huke, kwavija wao womuona Mulungu.

9 Wamweda waja wogala utindiwala, manake wokemigwa Wana Mulungu.

10 Wamweda waja wodununzigwa kwa kusang'hana goyolonda Mulungu, manake ufaume wa kuulanga ni wao.

11 Mmweda mweye wanhu wahawaliga na wahawaonela na kuwavwizila ubananzi wa chila namna kwa mbuli yangu.

12 Sekeni na kutenda galigali manake nhuzo yenu ng'hulu kuulanga. Saho ivo viwawaonele walagusi wa Mulungu wakalikabula yenu.

13 Mweye mwa munyu wa isi, mbali munyu uhazabuka wogeligwa choni ikolele? Haufaya chinhu bule, wokwasigwa na kukanyagigwa na wanhu. 14 Mweye mwa bung'hulo da isi! Kama kae izengigwe halugongo haifisika. 15 Na wanhu hawabwina muli na kugubika mdidebe, mbali wodika hachanha haichingolobweda ili diwabung'hulile wose weli mng'anda. 16 Ivija yolondeka bung'hulo jenu diwabung'hulile wanhu, ili wazione sang'hano zenu zinogile, wamtogole Tata yenu yeli kuulanga.

17 "Seke mtonge kua niza kuilava ndagizi na mafundo ga walagusi wa Mulungu. Sizile kuilava mbali kuigangamiza kua kweli. 18 Nowalongela kweli, mbaka haja ulanga na isi vihabita, habule hata yandiko dodo hebu chihande chidodo cha ndagizi chonda chisegezigwe mbaka vose vonda venele. 19 Ivo, munhu yoyose yoleka kutegeleza hata ndagizi imwe ndodo kubita zose, na kuwafunda wamwenga wasang'hane ivo, iyo kokua mdodo ng'hani muulongozi wa Mulungu. Mbali ija yonda yazigoge ndagizi na kuwafunda wamwenga iyo kokua mkulu muufaume wa Mulungu. 20 Leka ivo nowalongela, unovu wenu wa kumtogola Mulungu kama haubitile uja wa wafunda ndagizi na uja wa Mafalisayo, hamwingila mbee muufaume wa kuulanga.

21 "Mmala kuhulika wahenga walongeligwa kua, ‘Seke ukome! Yonda yakome kolamuligwa.’ 22 Mbali nie nowalongela, yoyose yonda yamgevuze miage kolondeka yalamuligwe. Na yonda yamzeleu miage na kumuona mbozi kogaligwa mchitala. Ivija yonda yamkeme miage ‘Mbozi’ kolondeka kwingila muumoto uja haufa. 23 Ivo, uhagala nhosa yako yakulukuzigwa mchilemela amala kuvimanya kua muihasanya na miago, 24 ileke nhosa yako mchilemela labaho ubweleganye kwa miago mkailumbe amala ubwele ukalave nhosa yako. 25 "Ilumbe na muhasanyi wako hima kuno mng'hali mzila kuita mchitala. Hebu mhasanyi wako kokugala kwa mlamuzi, nayo mlamuzi kokugala kwa mmilizi, nagweye kogeligwa mdigeleza. 26 Nokulongela kweli, hulawa umo mbaka ikulawe ija sente ya ngama yuudaigwa.

27 "Yesu kagendelela kulonga, ‘Muhulika wanhu walongeligwa kua seke utende, Ugoni!’ 28 Mbali nie nowalongela yonda yamlole mwana chike kwa kummelela mate, tiyali katenda nayo ugoni mmoyo. 29 Ivo, kama siso jako da kulume dihakuhonza kusang'hana ubananzi, ding'ole ujase kutali. Yofaya ng'hani kumwako kwagiza kilungo chimwe cha lukuli lwako kubita lukuli lwako lwose kwasigwasi muumoto uja haufa. 30 Yahawa mkono wako wa kulume wahakuhonza kusang'hana ubananzi, ukanhe ukawase kutali. Yofaya ng'hani kumwako kwagiza kilungo chimwe cha lukuli lwako, kubita lukuli lwako lwose uite muiisi ya wafile.

31 "Imala kulongigwa ivija muindagizi ya Musa, ‘Yonda kumleka mwehe wake, kolondeka yamwing'he balua ya nyasa.’ 32 Mbali nie nomlongeleni yomwing'ha mwehe wake nyasa kwa mbuli yoyose, mbali si kwa mbuli ya ugoni, komtendela mwehe wake ugoni, na mulume yahasola mwehe yeng'higwe nyasa si kwambuli ya ugoni, nayo kotenda ugoni.

33 "Kaidi muhulika wahenga walongeligwa kua, ‘Seke ubene lahilo jako, mbali kolondeka kugangamiza lahilo jako kwa Mndewa.’ 34 Mbali nie nowalongeleni seke muilahile mbee mhailalika, hebu kwa ulanga manake icho chigoda cha ulongozi cha Mulungu, 35 hebu kuilahila muiisi manake icho hanhu hakwika magulu gake, hebu sekemuilahile kwa Yelusalemu manake iyo kae ya Mfaume mkulu. 36 Ivija seke uilahile kwa ditwi jako manake hudaha kuitenda hata mvili imwe iwe nzelu hebu nhitu. 37 Ivo wahalonga, ‘Enaa,’ baho iwe ‘Enaa,’ na wahalonga, ‘Habule.’ Baho iwe ‘Habule.’ Chochose chonda chibite gago cholawa kwaija mbananzi.

38 Yesu kagendelela kulonga, "Muhulika kua ilongigwa, ‘Siso kwa siso, zino kwa zino.’ 39 Mbali nie nowalongeleni, seke umlihizile munhu yehile. Mbali munhu yahakutoa ng'hua kanza da kulume, muhindulile na da kaidi. 40 Na munhu yahakugala mchitala konda kukuboka shati jako, mleke yasole na koti ivija. 41 Munhu yahalonda kukuswangiza upape mbahasha yake kwa chilomita imwe, gweye upape chilomita mbili. 42 Yonda yakupule, mwing'he, hebu sekeumuhindukile chisogo yokupula chinhu.

43 Muhulika ilongigwa kua, ‘Mwing'he wende miago, na kumwihila mhasanyi wako.’ 44 Mbali nie nowalongeleni weng'heni wende wahasanyi wenu na kuwapulila waja womdununzani, 45 ili mdahe kua wana wa Tata yenu yeli kuulanga kwa Mulungu. Kwavija iyo kuwabung'hulila zua jake wanhu wehile na wanogile, na kuwatoela mvula wanhu wanogile na wabananzi. 46 Ivo mopata choni mhaweng'ha wende waja woweng'ha wende mweye tu? Manake, hata wagoga kodi wosang'hana ivija. 47 Ivija muhawalamsa walukolo lwenu waiyeka, ivo, msang'hana chinhu cha uzonza? Manake hata wamhazi nao wosang'hana ivo. 48 Baho muwe wa kutogoligwa kama Tata yenu viyali wa kutogoligwa.