1 Yesu na waluko wake viwavikile habehi na Yelusalemu na wavika mchijiji cha Betifage mchigongo cha Mizeituni, kawalagiza waluko wake waidi, 2 kawalongela, "Gendeni mbaka chijiji chili kuulongozi lenu na momvika mhunda kafungigwa hamwe na mwanage. Wafunguleni na mngalile. 3 Kama munhu yahawauza habali motenda ivo mulongeleni, ‘Mndewa kowalonda, nayo bahaja kowalekeseleni." 4 Mbuli ino itendeka ili gaja galongigwe na mlagusi wa Mulungu gavikile,

5 "Walongeleni wanhu wa kae ya Yelusalemu, iyo Siyoni,

Lola mfaume wako kokwiza!

Muhole na kapapigwa na mhunda,

Mwana mhunda, mwanage mhunda."

6 Ivo, waja waluko waita na wasang'hana ivija kama Yesu viyawalagize. 7 Wamgala ija mhunda na mwanage, wayazanza vivalo vao mumgongo mwa waja mhunda na Yesu kakwela nchanha mwa mwana mhunda. 8 Bumbila kulu da wanhu wayazanza vivalo vao mnzila, na wanhu wamwenga wakanha vikwamvi va mibiki wayazanza mnzila. 9 Mabumbila ga wanhu walongole na wa hachisogo yake wenula dizi walonga,

"Yatogoligwe Mwana wa Daudi!

Yeng'higwe ganogile na Mulungu yokwiza kwa Zina da Mndewa!

Nhogolwa uchanha kwa Mulungu!"

10 Yesu viyakalile yokwingila Yelusalemu, kae yose imema yugwayugwa wakala wouza, "Ino nani?" 11 Wanhu wa mdibumbila dija walonga, "Ino mlagusi wa Mulungu Yesu kulawa muikae ya Nazaleti isi ya Galilaya."

12 Baho Yesu kengila Haing'anda ya Mulungu, kawawinga wanhu wakalile wogula vinhu Haiing'anda ya Mulungu, kazihindula meza zao waja wanhu wakalile wogula na kubadili sente, na kahindula vigoda va waja wakalile wogula njiwa. 13 Kawalongela, "Yandikigwa mgayamayandiko ga Mulungu, ‘Ng'anda yangu yokemigwa ng'anda ya kupula.’ Mbali mweye muitenda kua mhango ya wabavi."

14 Vipofu na weli na nhale wamwenga wamuwinza uko Haing'anda ya Mulungu nayo Yesu kawahonya. 15 Baho wakulu wa Walava nhambiko na wafunda ndagizi za Musa viwaonile mbuli za uzonza uyasang'hane Yesu, na ivija waja wana wakalile woguta nyangi zao Haing'anda ya Mulungu walonga, "Yatogoligwe Mwana wa Daudi," Wao wagevuzika. 16 Baho, wamlongela Yesu, "Ivo huhulika chowalonga wana wadodo?" Yesu kawedika,"Enaa, nohulika! Ivo, hamsomile mayandiko gano?

‘Kwa milomo ya wana wadodo na ving'hele wokwing'ha nhogolwa gweye.’"

17 Baho kawaleka, kalawa hanze Haikae ya Mulungu na kuita kukijiji cha Betania, kawasa uko.

18 Yesu viyakalile yobwela muikae ya Yelusalemu mnzila kulawa Betania, lukwili kaona nzala. 19 Kauona mbiki wa ng'huyu hamgwazo ya nzila, kauwinza, mbali kauvika wabule chinhu ila mayani muhala. Baho kawinukila kaulongela, "Seke ulele manhunda ng'oo!" Bahaja uja mbiki wa ng'huyu unyala. 20 Waluko wake viwaonile gago wakanganya walonga, "Habali mbiki uno wa ng'huyu unyala gafula?" 21 Yesu kawedikila, ‘"Nowalongeleni kweli, kama mwahawa na nhogola na bila kudumba, modaha sio kutenda ivo tu, mbali hata mhaulongela lugongo luno "Somoka ukasigwe muibahali,’ yotendeka ivo. 22 Na mwahawa na nhogola chochose chimpula kwa kufugama, mokwing'higwa."

23 Yesu viyabwelile kaidi kui ng'anda ya Mulungu, kakala yofunda. Viyakalile yofunda, wakulu wa walava nhambiko na wavele wa wanhu wamuuza, "Kosang'hana mbuli zino kwa udaho gani? Yelihi yakudahize gano?"

24 Yesu kawedika, "Nanie nomuuzani mbuli imwe, muhanidika nanie nomlongeleni nosang'hana mbuli zino kwa udaho gani. 25 Ivo, udaho wa kubatiza wa Yohana Mbatizi ulawa kuulanga kwa Mulungu hebu kwa wanhu?" Mbali wailongela wao kwa wao vino, "Chahalonga, ‘Ulawa kuulanga kwa Mulungu,’ kochiuza, ‘Ivo mbona hamumtogole Yohana. 26 Na chihalonga, ‘Ulawa kwa wanhu,’ chodumba bumbila da wanhu vonda wachitende, manake wose wotogola kua Yohana kakala mlagusi wa Mulungu. 27 Baho wamlongela Yesu, "Hachimanyile!" Nayo Yesu kawalongela, "Nanie siwalongela nosang'hana gano kwa udaho gani.

28 Mweye moonaze, munhu imwe kakala na wabwanga waidi. Kamlongela ija imkulu, ‘Mwanangu, lelo genda ukasang'hane sang'hano kumgunda wa mizabibu.’ 29 Ija mwabwanga mkulu kamlongela, ‘Ndema!’ Mbali amala kahinduka, kaita kusang'hana sang'hano. 30 Amala tata ija kamlongela mwanage wa kaidi ivija, nayo kamwidika, ‘Enaa tata! Mbali haitile kuisang'hano. 31 Ivo, yelihi kati ya wano waidi yatendile chiyalondile tataake?" Wamwidika, "Ija mwana yalongole." Ivo, Yesu kawalongela, "Nomlongeleni kweli, wagoga kodi na weli na luhadu wokwingila muufaume wa Mulungu kabula yenu. 32 Manake Yohana Mbatizi keza kumwenu na kawalagusila nzila itogoligwe kukala na Mulungu, na mweye hamumtogole, mbali wagoga kodi na weli na luhadu wamtogola. Vimuonile gago gose mweye mng'hali hamtogole na kugaleka malozo genu."

33 Yesu kalonga, "Tegelezeni mfano umwenga. Hakala na mwene mgunda imwe kalima mgunda wa mizabibu, kauzungulusila lwigo, amala kahimba hanhu hakukamila zabibu, na ivija kazenga lingo da kwamilila umo mumgunda. Amala kawadodisha walimi nayo kapata mwanza wa kuita isi ya kutali.

34 Mumsimu wa mulao vuuvikile, kawalagiza watumigwa wake kwa waja walimi wakodishigwe mgunda, ili wamwing'he fungu jake mwa zija zabibu ziwahulule. 35 Waja wakodile mgunda wawakwida waja watumigwa wa mwene mgunda, imwe wamtoa, imwenga wamkoma na imwenga wamtoa mabwe. 36 Iyo mwene mgunda kawalagiza watumigwa wamwenga, wengi kubita waja walongole. Waja wakodile mgunda wawatendela ivija na wano. 37 Mchikomelezo kamlagiza mwanage kuno kotonga kua, ‘Womgesa mwanangu.’ 38 Mbali waja walimi viwamuonile ija mwanage wailongela wenyego kwa wenyego, Ino iyo muhazi, na chimkome ili chiusole uhazi wake!" 39 Ivo, wamvamila na kumkwida, wamlava kunze mwa mgunda uja wa mizabibu, wamkoma. 40 "Ivo, iyo mwene mgunda wa mizabibu yaheza, kowatendaze wao walimi?"

41 Wao wamwidika, "Kowakoma vihile wao wabananzi, na uja mgunda koweng'ha walimi wamwenga wao weonda wamwing'he fungu jake viilondeka.

42 Baho Yesu kawalongela, "Ivo hamsomile mbuli ino mgamayandiko ga Mulungu?

‘Dibwe diwalemile wazenzi kama hadifaya

Diwa dibwe kulu da kutumanila ng'hani.

Dino ijo diyatendile Mndewa,

Najo diwa da kuchikanganya!

43 Kwaivo nowalongeleni, ufaume wa Mulungu wosegezigwa hamwenu na kwing'higwa wanhu wa isi zimwenga waja wondawasang'hane gaja goyolonda Mulungu." 44 Yogwa mdibwe dino kobeneka vihande na dihamgwila munhu yoyose, domhonda honda." 45 Wakulu wa walava nhambiko na Mafalisayo viwahulike iyo mifano yake wavimanya kua kakala yowalonga wao. 46 Kwaivo wakala wolonda nzila ya kumwamha, mbali wawadumba wanhu kwavija wanhu wavimanya kua Yesu mlagusi wa Mulungu.