1 Amala Mafalisayo chidogo na Wafunda ndagizi za Musa wavika kulawa Yelusalemu, wamuwinza Yesu wamuuza, 2 "Habali waluko wako hawagesa mahala gachibokele kulawa kwa Wahenga wetu? Hawasunha mikono yao mbaka muiching'o kama viilondeka kabula ya kuja!" 3 Yesu kawedika, "Na mweye habali hamgesa ndagizi za Mulungu ila mogesa mafundo genu wenyego? 4 Mulungu kolonga,’Wategeleze tata na mami yako,’ na ‘Yomliga tata na mami yake kolondeka yakomigwe.’ 5 Mbali mweye mowafunda vino munhu yahawa na chinhu chija chofaya kumtaza tata yake hebu mami yake, mbali kolonga, ‘Chinhu chino nomlavila Mulungu,’ 6 ivo, mweye mowafunda sekewawategeleze kaidi tata na mami yake! Ivo vumzeleu usenga wa Mulungu kwa kuwinza mafundo genu wenyego. 7 Mweye watenda giladi! Mlagusi wa Mulungu Isaya kalagusa goya kwa mbuli yenu,

8 ‘Mulungu kolonga, wanhu wano wonhogola kwa mulomo tu,

Mbali mmoyo mwao wakutali na niye.

9 Kunifugamila kwao hakufaya,

Manake mafundo goofunda ni ndagizi za wanhu tu!’"

10 Yesu kadikema dija bumbila da wanhu, kawalongela, "Tegelezeni, mvimanye! 11 Chinhu chimtenda munhu sekeyatogoligwe kumfugamila Mulungu sio chija chingila mmulomo, mbali chija chimlawa mmulomo, "Icho icho chimtenda munhu sekeyatogoligwe kumfugamila Mulungu." 12 Amala waluko wamuwinza, wamlongela, "Ivo, kovimanya kua Mafalisayo wagevuzika viwahulike chuulongile?" 13 Mbali nayo kawedika, "Chinhu chochose hachihandigwe na tata yangu yeli Kuulanga, chong'oligwa. 14 Walekeni wenyego! Wao vipofu, vilongozi wa vipofu, na chipofu yahamlongoza chipofu miyage, wose waidi wotumbukila mdikombo." 15 Petulo kalonga, "Chifambulile kulinga mbuli uko." 16 Yesu kalonga, "Hata mweye hamvimanyile? 17 Ivo, hamvimanyile kua chila chingila mmulomo choita mmunda amala cholawa kunze chokwasigwa kuichoo? 18 Mbali mbuli zilawa mmulomo zolawa mmoyo, na gago gao gomtenda munhu sekeyatogoligwe kumfugamila Mulungu. 19 Kwa vija, muumoyo molawa nhonga ya kukoma na ugoni na luhadu na ubavi na kulonga uvwizi na kuliga. 20 Gago gago gomtenda munhu sekeyatogoligwe kumfugamila Mulungu. Mbali kuja ndia bila kusunha mkono mbaka kuiching'o kama viilondeka hakutenda munhu sekeyatogoligwe kumfugamila Mulungu."

21 Yesu viyasegele hanhu haja kaita kukala ubanzi wa Tilo na Sidoni. 22 Baho mami imwe yakalile yokala baho na hakalile muyahudi kamuwinza Yesu, kaguta dizi kalonga, "Mndewa mwana wa Daudi, nionele bazi! Biti yangu kambula chinyamkela na kodununzika ng'hani." 23 Mbali Yesu hamwidike. Baho, waluko wake wamuwinza wamlongela, "Mulongele yasegele kwa vija kuchigaza kwa kuguta nyangi!" 24 Amala Yesu kawedikila, kalonga "Nhumigwa kwa waja tu wanhu wa Izilaeli weli kama bung'hukilalo wagile welibule wa kuwasusila." 25 Baho iyo mama keza, kamfugamila kalonga, "Mndewa chonde chonde nitaze." 26 Yesu kamwidika, "Havinogile kusola ndia ya wana na kuwapigisila umbwa." 27 Iyo mama kedika, "Kweli Mndewa, mbali hata umbwa woja ndia ilagale haja hawaja Wandewa wao." 28 Baho Yesu kamwidika, "Mama nhogola yako ng'hulu, ivo usang'haniligwe kama vuulonda." Ija biti yake kahona saa iija.

29 Yesu kalawa baho kaita umwambu wa lamba da Galilaya, kakwela kulugongo na kakala hasi. 30 Bumbila kulu da wanhu dimuwinza Yesu, wanhu wengi ng'hani wamwizila wawagala weli na nhale na vipofu na mbetembete na weli na ludanha na wamwenga wengi wakalile na vitamu, waweka haulongozi mmagulu gake, nayo Yesu kawahonya. 31 Bumbila kulu da wanhu wakanganya kuona weli na ludanha wolonga, wakalile waholole wahona na mbetembete wogenda na vipofu woona, wanhu wamtogola Mulungu wa Izilaeli.

32 Baho Yesu kawakema waluko wake kalonga, "Nowonela bazi wanhu wano kwa vija wakala na niye mazua madatu, nao sambi wabule ndia isigale. Sitogola kuwaleka wasegele bila kuja, sekewasinduke mnzila. 33 Waluko wake wamlongela Yesu, "Hano chamchiwala, chopatahi ndia ya kwenela wanhu wengi vino?" 34 Yesu kawauza,"mna migate mingahi?" Wamwidika, walonga, "Migate saba na visomba vidodo chidogo." 35 Baho, Yesu kawalagiza wanhu wakale hasi. 36 Kaisola ija migate na vija visomba, kamwing'ha hewela Mulungu na kamega, kaweng'ha waluko nao wawagolela wanhu. 37 Wose waja weguta. Amala wakunzanya vilagale na wamemeza vigelo saba. 38 Wao wadile wakala walume kubita elufu nne, bila kupeta wanachike na wana wadodo. 39 Baho, Yesu kawalaga wanhu, kakwela ngalawa, kaita uko Magidala.