1 Yesu kawakema waluko wake kumi na waidi, kaweng'ha udaho wa kuwawinga vinyamkela na kuhonya vitamu na uzidilwa wose. 2 Gano gago mazina ga waja waluko kumi na waidi yawakemile watumigwa, wa mosi kakala Simon yakemigwe Petulo na Andulea ndugu yake Petulo, Yakobo mwana Zebedayo na Yohana ndugu yake, 3 Filipo na Batolomayo, na Tomasi na Matayo yakalile mgoga kodi, na Yakobo mwana Alifayo na Tadayo, 4 Simoni Mkananayo na Yuda Isikaliote ija yamhinduke Yesu.

5 Yesu kawalagiza wao kumi na waidi na kuweng'ha ndagizi zino, "Seke muite kwa wanhu wa isi zimwenga, hebu sekemwingile mzikae za wasamalia. 6 Mbali muite kwa wanhu wa Izilaeli wao kama ng'hondolo wagile. 7 Gendeni mkaligule vino, ‘Ufaume wa kuulanga kwa Mulungu wa mmabehi.’ 8 Honyeni watamu, zilibuleni wafile na wahonyeni weli na dikulu, walaveni vinyamkela. Mwing'higwa bule na laveni bule. 9 Sekemsole mzikadi zenu zahabu, hebu madini ga sente hebu madini ga shaba. 10 Seke msole kadi yakupulila nzila, hebu koti da kusaula hebu makwabazi hebu mkwaju. Manake msang'hanaji kolondeka yabokele chitumetume chake. 11 "Mhengila muikae yoyose hebu chijiji, zambwileni munhu yalonda kuwabokela, kaleni muing'anda yake mbaka mhasegela hanhu baho. 12 Muhengila mng'anda, muwalamuse wenekae wenu. 13 Kama wenekae iyo wombokelani baho utindiwala wenu wokua nao. Mbali kama hawawabokela, utindiwala wenu wowabwelela mweye. 14 Kama munhu yoyose yahalema kuwabokela hebu kuwategeleza ivo mhalawa muing'anda iyo hebu kae iyo, kung'huseni timbwisi dili mmagulu genu, kulagusa kua waulema usenga wao. 15 Nowalongeleni kweli, mdizua da kulamula, wanhu wa kae iyo Mulungu kowalamula hakulu kubita iwapatile wanhu wa kae ya Sodoma na Gomola.

16 "Tegelezeni, nowalagiza kama bung'hukilalo hagati ha mbwisi. Muwe wabala kama nyoka, na wahole kama hua.

17 Itiganyeni wanhu womlemeni, manake wowogala mchitala na kuwalibula miboko mzing'anda za kuiting'hanila wayahudi. 18 Kwambuli yangu mogaligwa haulongozi wa wakulu na wafaume ili mdahe kunilongelela kumwao na kwa wanhu haweli Wayahudi. 19 Ivo, mhagaligwa mchitala, sekemdumbe molonga choni, chipindi chahavika mokwing'higwa gakulonga. 20 Manake si mweye monda kulonga mbali Muhe wa Mulungu wa iyo Tata yenu yolonga mgati yenu. 21 Ndugu komhinduka miage ili yakomigwe, na tata komhinduka mwanage nao wana wowatoa tata na mami zao na kuwagalila ifa. 22 Wanhu wose wowagevuzikila mweye kwa mbuli ya Zina jangu. Mbali yonda yafunye moyo mbaka kuuhelelo iyo yonda yaloholigwe. 23 Wanhu wahawaonela muikae imwe kimbililileni muikae imwenga. Nowalongela kweli hamkomeleza miyanza yenu mzikae zose za Izilaeli kabula Mwana Munhu hanavika. 24 "Mwaluko hambita mfundaji wake, hebu mtumwa hambita mndewa wake. 25 Yofaya mwaluko kua kama mfundaji wake, na mtumwa kua kama mndewa wake. Ihawa mkulu wa ng'anda wamkema Belizebuli, ivo, waja weli mng'anda yake howakemigwa mazina gehile ng'hani?

26 "Ivo,sekemuwadumbe wanhu wao. Wofisa mbuli ziwasang'hana mbali dovika zua ijo baho wanhu wovimanya viwafisile. Chila muhnhu koimanya mbulu zao. 27 Gaja niwalongeleni vichikalile chiiyeka walongeleni wanhu, na gaja ganiwalongeleni kwa kunyong'onya, mulongeleni chila munhu. 28 Sekemuwadumbe wao wodaha kukoma lng'huli zenu, mbali hawadaha kukoma muhe wako. Yolondeka kuwadumba ija yodaha kukoma lukuli na yahamala kukoma kanao udaho wa kuwagela ng'huli na muhe wenu muumoto uja haufa. 29 Sholwewanda waidi hawaguligwa kwa senti imwe. Mbali Mulungu hamleka hata imwe yalagale bila mwenyego kulonda. 30 Mbali kumwenu mweye, hata mvili zili mmatwi getu zose zipetigwa. 31 Ivo seke mdumbe mweye wanhu wakutogoligwa ng'hani kubita sholwewanda wengi.

32 Chila munhu yonitogola hazelu iyo wangu, nanie ivija nomtogola ha Tataangu yeli kuulanga kwa Mulungu. 33 Mbali yoyose yonibela ha wanhu, nanie nombela ha Tataangu yeli kuulanga kwa Mulungu.

34 "Sekemtonge kua niza kugala utindiwala muiisi. Mbali ngala bung'hukila. 35 Kwavija niza kugala uhasanyi kati ya wabwanga na tataake, kati ya biti na mamiyake na kati ya mke mwana na nkoi wake. 36 Na wahasanyi wa wanhu ni waja wa mng'anda yake.

37 "Yeli na wende na tati yake hebu mami yake kubita kuning'ha wende nie hanifaya. Na yomwing'ha wende mwanage hebu biti yake hafaya kuwa mwaluko wangu. 38 Na munhu hatogole kudununzika kwa mbuli yangu na kuniwinza iyo hanifaya. 39 Munhu yoikimila mwenyego iyo koyagiza, na ija yokwagiza ugima wake kwambuli yangu iyo koloholigwa.

40 "Yonda yawabokele mweye muing'anda yake, konibokela nie, na yonibokela nie kombokela ija yanilagize. 41 Yombokela mlagusi wa mulungu, kwavija mlagusi wa Mulungu, kobokela gweko da mlagusi wa Mulungu. Yombokela munhu yatogoligwe kwavija katogoligwa, kobokela gweko da munhu yatogoligwe. 42 Nowalongela kweli, yoyose yomwing'ha chikombe cha mazi gauzizimi imwe mwa wano wadodo, kwavija mjalusona wangu, kweli hakosa kubokela gweko jake."