1 Yesu kalawa Kuing'anda ya Mulungu, viyakalile yoita, waluko wake wamuwinza, wasonga kulonga nayo mbuli ya ng'anda ya Mulungu. 2 Yesu kawalongela, "Vinoga, modaha kugalonga gano gose! Nowalongela kweli, habule hata dibwe dimwe donda disigale uchanha ya dimwenga, chila chinhu chobomoligwa."

3 Yesu viyakalile kakala kulugongo lwa Mizeituni, waluko wake wamuwinza mchifiso, wamuuza, "Chilongele mbuli zino zolawilila lini? Vilaguso gani cholagusa kwiza kumwako na msimo wa uhelelo.?" 4 Yesu kawedikila, "Itinganyeni sekemviziligwe na munhu. 5 Manake wanhu wengi wolawilla woilonga iyo Kilisito nao wowagiza wanhu wengi. 6 Mohulika mbuli ya bung'hukila na nongelela ya bung'hukila, mbali sekemgwe fufunhende, manake gago gose golondeka kulawilila, mbali uhelelo ung'hali kuvika. 7 Wanhu wa isi imwe wolawa kuitowa na wanhu wa isi imwenga, wanhu wa ufaume umwe woitowa na wanhu wa ufaume umwenga. Hata hano na haja hokua na nzala na migudemo ya isi. 8 Gose gago kama chanduso cha usungu wa kuibasula mwana. 9 "Amala mogogigwa na kudununzigwa na wamwenga wenu kukomigwa. Wanhu wa isi zose wowehileni kwavija mweye mnhogola nie. 10 Kaidi mchipindi icho wanhu wengi wakalile wonitogola woileka kunhogola, wohindukana na kuihila. 11 Wolawilila walagusi wengi wa uvwizi wonda wawagize wanhu wengi. 12 Kwa mbuli za kongezeka kwa ubananzi, wendo da wanhu wengi woholola. 13 Mbali yofunya moyo mbaka hauelelo iyo yonda yaloholigwe. 14 Mbali kabula ya uhelelo kuvika, uno Usenga Unogile wa ufaume wa Mulungu woliguligwa mziisi zose ili wanhu wose wahulike usenga wa Mulungu.

15 "Ivo mwahaona, ‘Chinhu chihile chigala ubananzi cha Muing'anda ya Mulungu kama viyalongile Danieli mlagusi wa Mulungu, yonda yasome yaimanye mbuli iyo. 16 "Baho weli uko isi ya Yudea wakimbilile kulugongo. 17 Yeli kunze seke yengile mng'anda kusola chinhu. 18 Yeli kumgunda seke yabwele ukae kusola valo jake. 19 Woluona wanachike weli na inda na wokong'heza mdizua ijo! 20 Puleni ili kukimbila kwenu sekeiwe mazua ga mbeho hebu Zua da kuhumula! 21 Kwavija msimo uwo hokua na gayo kulu hadipatile kulawila kulawa kulumbigwa kwa isi mbaka lelo, hebu gayo ijo hadidaha kulawila kaidi. 22 Kama mazua gago gahalekile kuhunguzigwa habule munhu yoyose yahahonyeke kukomigwa, mbali mazua gago gahunguzigwa kwa mbuli ya waja wasaguligwe. 23 "Ivo, munhu yahawalongeleni zua ijo, ‘Kilisito kahano,’ ‘ebu Kilisito ka haja,’ sekemumtogole. 24 Kwavija wolawilila walagusi wa uvwizi na wanhu wamwenga wolonga uvwizi kua wao kina kilisito. Wosang'hana vilaguso vikulu na uzonza ya kuwakanganya wanhu ihadahika hata kuwavwizila hata waja wasaguligwe wa Mulungu. 25 Tegelezeni, nimala kuwalalika kabula ya kulawila mbuli iyo. 26 Ivo, wahawalongeleni, ‘Loleni, Kilisito kakuluala,’ sekemwite uko, hebu, ‘loleni, Kilisito kaifisa mng'anda,’ sekemtogole. 27 Mwana wa munhu kokwiza kama lumwesa vuubung'hula kulawa muusimbukilo wa zua mbaka kuuswelo wa zua wouona, ivo vonda iwe kwiza kwake Mwana wa Munhu. 28 Haja hauli mtufi baho honda waikunzanye makwangule.

29 "Vigamalile magayo ga mazua gago, zua dogeligwa ziza, mwezi haubung'hula, nhondo zolagala kulawa kuulanga, na udaho wa kuulanga wotigisigwa. 30 Amala chilaguso cha mwana munhu chooneka kuulanga, na baho makabala gose muuisi golomboleza, womona mwana munhu yokwiza kulawa mgamawingu ga kuulanga yeli na udaho na ukulu mwingi. 31 Nayo, kowalagiza watumigwa wa kwa Mulungu weli na mhalati zilila ng'hani, nawo wowakunzanya wasaguligwe wake kulawa mhande zose nne za isi, kulawa kuuhelelo uno mbaka uhelelo umwenga.

32 "Muifunze mfano uno wa mbiki wa mtini, mala makwamvi gake gahasonga kusimbuka, movimanya kuwa msimo wa vuli uvika. 33 Ivija na mweye mwahaona mbuli zino zose zogendelela, mvimanye kua msimo wa kubwela Mwana wa Munhu wahabehi kuvika. 34 Nowalongeleni kweli, ulelo uno haubita mbaka mbuli zose zilawilile. 35 Ulanga na isi zobita, mbali Usega wangu haubita mbe.

36 "Mbali kwa mbuli ya zua ijo na saa iyo, habule munhu yovimanya, hebu watumigwa wa kwa Mulungu, hebu Mwana wa Munhu, ila Tata yaiyeka iyo yovimanya. 37 Kwavija kama viikalile chipindi cha Nuhu, ivo yonda iwe kwiza kwa Mwana Munhu. 38 Manake chipindi icho, kabula ya bung'hukila kulu da mazi, wanhu wakala woja na kung'wa, wosola na kusoligwa mbaka Noa viyeingile mgati mwa ija ngalawa ng'hulu ikemigwa Safina. 39 Wanhu hawamanyile choni chilawilile. Amala mvula itoa kwa chipindi chitali na wanhu wafa muibung'hukila ya mazi. Mwana wa Munhu honda yabwele, bahaja yolawila mchipindi ichija. 40 Chipindi icho wanhu waidi wokua mumgunda, imwe kosoligwa na imwenga kulekigwa. 41 Wanachike waidi wokua wodunda uhule mdibwe, imwe kusoligwa na imwenga kulekigwa. 42 Baho, muitande, kwavija hammanyile zua diyonda yabwele Mndewa wenu. 43 Mbali sekemuisemwe mbuli ino, kama mwene kae yahavimanyile zua dija mbavi vonda yeze yahaitandile, hebu kuileke ng'anda yake ibomoligwe. 44 Kwaivo na mweye muitande, kwa vija Mwana wa Munhu kobwela muisaa ija mweye hamuimanyile."

45 Yesu kagendelela kulonga, "Ivo yelihi mtumigwa msang'hana goya na yeli na nzewele, ija mndewa wako komtenda yawalongoze wanhu wake, yaweng'he ndia kwa chipindi chake? 46 Kamweda mtumigwa ija mkulu wake yaheza komvika kosang'hana ivo. 47 Nowalongela ukweli, komwika mtumigwa iyo yawimile uzenzi wake wose. 48 Mbali kama mtumigwa yehile yahailongela mmoyo, ‘Mkulu wangu kokawila kubwela,’ 49 Labaho kasonga kuwatoa watumigwa wayage na kusonga kuja na kung'wa na wakoligwa. 50 Zua na saa ija haimanyile mkulu wake kobwela. 51 Komtoa vihile na kumwika fungu dimwe na waja hawamtegeleza. Uko kokua na ndilo na kuluma meno. Manake madununzo makali ng'hani.