1 Mazua gaja Yohana Mbatizi kalawila yoligula mchiwala cha Yudea kalonga, 2 "Hindukeni na kuleka malozo genu," kwavija ufaume wakuulanga wammabehi!" 3 Ino Yohana iyo ija mlagusi wa Mulungu Isaya yamlongile mbuli zake, viyalongile,

"Dizi ya munhu yokema kulawa kuchiwala,

‘Mtandileni goya Mndewa nzila yake,

Mgoloseleni nzila yake.’"

4 Yohana kakala na valo disonigwe kwa lusinga lwa ngamia, na mkwiji wa msipi wa mbende mchigudi chake. Ndia yake ikala nzige na uki wa kumbago. 5 Baho, wanhu kulawa Yelusalemu na waja walawile Uyahudi yose na mzi isi zose zili mumgwazo wa lwanda lwa Yolodani wamuwinza Yohana. 6 Nao wahinduka na kuleka malozo gao, nayo Yohana kawabatiza mulwanda lwa Yolodani. 7 Mbali viyawaonile Mafalisayo wengi na Masadukayo womwizila ili yawabatize, kawauza, "Mweye ulelo wa nyoka, yelihi yamfundeni muikimbile nyinukila ya Mulungu iyo ikwiza? 8 Laguseni mzisang'hano zenu kua mhinduka na kuleka malozo genu. 9 Seke mtonge na kuilongela, ‘Tata yetu Ibulahamu!’ Nomulongeleni kweli, Mulungu kodaha kugatenda mabwe gano gawe ulelo wa Ibulahamu. 10 Nashoka dikigwa mwaka mmizizi," kila mbiki uja haulela manhunda wokanhigwa na kwasigwa mmoto. 11 Niye nombatizani na mazi ili kulagusa kua mgaleka malozo genu. Mbali iyo yokwiza badili yangu kana udaho mkulu kubita nie, nie sidaha hata kumpapila makwabazi gake. Iyo kombatizani kwa Muhe wa Mulungu na kwa moto. 12 Lungo lwa mmakono gake, nayo kofagila lubuga lwake lwa kubetela, na kukunzanya uhemba wake mdigulu, na makumvi yagasome na moto uja haufaga."

13 Chipindi icho Yesu kalawa Galilaya kavika lwanda lwa Yolodani, kamuwinza Yahana yadahe kubatizigwa nayo. 14 Mbali Yohana kageza kumgoma na kulonga, "Ivo, gweye koniwinza nie? Niye iyo nilondeke kubatizigwa nagweye." 15 Mbali Yesu kamwidika, "Leka ikale ivo kwa sambi, manake cholondeka chigatende gaja gose Mulungu gayalondile." Baho Yohana katogola.

16 Bahaja Yesu viyamalile kubatizigwa, kalawa mmazi, baho ulanga ugubuka, kaoneka Muhe wa Mulungu viyahulumuka kama njiwa na kakala hachanha yake. 17 Bahaja dizi kulawa kuulanga dilonga, "Ino iyo Mwanangu nili na wende nayo."