1 Amala Yesu kalongozigwa na Muhe wa Mulungu mbaka kuchiwala ili yagezigwe na Mwenembago. 2 Yesu kafunga kwa mazua alubaini hadile hebu kung'wa misi na chilo hachikomelezo kaona nzala. 3 Baho Mgezaji keza kamulongela,"Uhawa gweye iyo Mwana wa Mulungu, galongele mabwe gano gageluke migate."

4 Baho Yesu kamwidika, "Yandikigwa, ‘Munhu hakala kwa migate iiyeka, mbali na kila usenga ulawa kwa Mulungu.’"

5 Labaho Mwenembago kamsola Yesu mbaka isi inang'hane ya Yelusalemu na kumwika kuchahna mwa Ng'anda ya Mulungu, 6 na kamulongela, "Yahawa gweye iyo Mwana wa Mulungu, ibwanhe hasi, manake yandikigwa mmayandiko ga Mulungu, ‘Mulungu kokulagizila watumigwa wa kumwake, wokusola mmakono gao, seke uikwale mmabwe.’"

7 Yesu kamwidika, "Mayandiko ivija galonga, ‘Seke umgeze Mndewa Mulungu wako.’"

8 Amala Mgezaji kamgala Yesu mbaka kulugongo lutali, kamulagusila ufaume wose wa isi na unovu wake, 9 Labaho kamulongela, "Nokwing'ha vino vose kama wahatumbala mavindi na kunifugamila." 10 Baho Yesu kamlongela, "Halawe hano Mwenembago gweye! Yandikigwa mmayandiko ga Mulungu,

‘Komfugamila Mndewa Mulungu wako na kumsang'hanila iyo yaiyeka.’"

11 Baho, Mwenembago kamleka, na watumigwa wa kwa Mulungu weza, na kumsang'hanila.

12 Yesu viyahulike kua Yohana Mbatizi kafungigwa mdigeleza, yeye kaita Galilaya.

13 Yesu hakalile Nazaleti, kasegela kaita Kapelinaumu, kae ili behi na lamba da Galilaya, muimhaka ya isi ya Zebuloni na isi ya Nafutali, kakala uko. 14 Gano galawilila kugangamiza ukweli kwa gaja gayalongile Mlagusi wa Mulungu Isaya, viyalongile,

15 "Isi ya zabuloni na isi ya Nafutali, kubitila kudilamba umwambu mwa lwanda lwa Yolodani, Galilaya isi ya wanhu haweli Wayahudi!

16 Wanhu wakalile muiisi ili na bung'hukila ng'hulu wadiona bung'hulo kulu. Nao wakalile muiisi ya ziza na bung'hukila ya ifa, bung'hulo diwa bung'hukila!"

17 Kulawa chipindi icho, Yesu kasonga kuligula usenga wake yolonga, "Hindukeni na kuleka malozo genu manake ufaume wa kuulanga kwa Mulungu wammabehi!"

18 Yesu viyakalile yogenda mugwazogwazo mwa lamba da Galilaya, kawaona wanhu waidi wa lukolo lumwe, Simoni yokemigwa Petulo na miage Andulea, wakala wovula somba na nyavu mdilamba. 19 Baho, Yesu kawalongela, "Niwinzeni, nie nomtendani muwagale wanhu kwa Mulungu badili ya somba." 20 Bahaja wazileka nyavu zao wamuwinza Yesu. 21 Viyagendile hamwande chidogo, kawaona wanhu wamwenga waidi wa lukolo lumwe, Yakobo na Yohana wana Zebedayo. Wano wakala mui ngalawa wosasala nyavu zao hamwe na tati yao Zebedayo. Baho Yesu kawakema, 22 bahaja nao waleka nyavu zao na tati yao muingalawa, wamuwinza Yesu.

23 Nayo Yesu kakala yogenda chila hanhu mui Galilaya, yofunda mzi ng'anda za kuiting'hanila Wayahudi na kuligula Usenga Unogile kwa mbuli ya ufaume wa Mulungu. Kahonya vitamu vao kwavija vivili na utamu wa chila munhu yeli nao. 24 Mbuli zake zenela chila hanhu muiisi ya Silia, watamu wose weli na vitamu vovose na waja wogazigwa na madununzo ga chila namna. Waja wambule chinyamkela, weli na utamu wa kugwa na waja waholole lukuli, wagaligwa kumwake, nayo kawahonya wose. 25 Mabumbila makulu ga wanhu kulawa isi ya Galilaya na Dekapoli na Yelusalemu na Yudea na umwambu mwa lwanda lwa Yolodani, wamuwinza.