1 Mdizua idija Yesu kalawa muing'anda ija, kaita kukala hamgwazo mwa lamba. 2 Mabumbila makulu ga wanhu gamzunguluka mbaka Yesu kakwela muingalawa na kakala. Baho wanhu wose wema hamgwazo mwa lamba. 3 Nayo Yesu kawalongela mbuli nyingi kwa kulinga mbuli. "Tegelezeni! Mlimi kaita kumiza mbeyu. 4 Viyakalile yomiza mbeyu, zimwenga zilagalila mzila, ndege weza wazidonda. 5 Zimwenga zilagalila mmabwe hanhu hakalile na ulongo mdodo. Mbeyu zioneka zilopola kota mbali kwavija hakala na ulongo mdodo. 6 Na zua vidilawile mbeyu zotile zinyala kwavija mizizi yake haingile ng'hani, ivo mbeyu zotile zifa. 7 Zimwenga zilagalile mmiwa, miwa iyo ikula na kuzizonga. 8 Zimwenga zilagalila muulongo unogile, mmela wota, ukula na kulela, zimwenga mhule mia, zimwenga sitini na zimwenga salasini. 9 Yesu kakomeleza kwa kulonga, Yeli na maguti yahulike!

10 Amala waluko wake wamuwinza wamuuza, habali kolonga na wanhu kwa kulinga mbuli?" 11 Yesu kawedika, "Mweye mwing'higwa kuzimanya mbuli zija hazinagubuligwa muufaume wa Mulungu, mbali wamwenga haweng'higwe. 12 Kwavija yeli na chinhu kokengezeligwa, mbali ija yelibule chinhu, hata chija chidodo yelinacho kobokigwa. 13 Lekaavo nolonga nao kwa kulinga mbuli, kwavija wolola mbali hawaona, wotegeleza mbali hawahulika hebu kuvimanya.

14 Ivo mlagusi wa Mulungu Isaya kawalongela,

‘Wanhu wano wotegeleza na kutegeleza mbali hawovimanya, wolola na kulola mbali hawaona.

15 Manake wanhu wano wadala kuvimanya,

Na mmaguti gao hagadaha kuhulika goya,

Na meso gao galema kuona ukweli.

Bila ivo wahaonile kwa meso gao, wahahulike kwa magutwi gao na wahamanyile kwa ubala wao, na kunihindukila, kolonga Mulungu,

Na nie nihawahonyile.’

16 Mbali mweye mmweda! Kwavija meso genu goona na magutwi genu gohulika. 17 Nowalongela kweli walagusi wengi wa Mulungu na wanhu wengi wanovu wa Mulungu walonda kugaona gaja gamuona mbali hawadahile kugaona, na kugahulika gaja gamhulika, mbali hawadahile.

18 "Baho mweye tegelezeni ufambulo wa kulinga munhu yohanda. 19 Yoyose yohulika usenga kwambuli ya ufaume wa Mulungu na havimanya, ni kama zija mbeyu zilagalile mzila. Ija mbananzi kokwiza na kusola kija kihandigwe mmoyo wake. 20 Zija mbeyu zilagalile mmabwe ni kulinga munhu yahulike usenga uo na bahaja kaubokela usenga kwa deng'o. 21 Mbali kwavija kabule mizizi mgati yake, usenga wokala chipindi chiguhi. Ivo magazo na madununzo gaheza kwa mbuli ya usenga uo, woleka kutogola. 22 Na mbeyu zilagalile mmibiki ya mmiwa zolinga na munhu yahulike usenga uo, mbali woga wa ugima uno na kulonda uzenzi wauzonga usenga uo, na haulela manhunda. 23 Na zija mbeyu zihandigwe muulongo unogile ni kama munhu ija yahulike usenga uo na kuumanya, nayo kosang'hana goyolonda Mulungu, na kokua kama munhu yahandile mbeyu, imwe mia, imwenga mbeyu sitini na imwenga mbeyu salasini.

24 Yesu kawalinga wanhu mbuli imwenga,"Ufaume wa kuulanga uilinga na munhu yahandile mbeyu inogile mumgunda. 25 Chilo chimwe wanhu viwakalile wawasa, mbananzi keza kahanda mahembahemba muuhemba na kasegela. 26 Amala mbeyu vizotile na kukula na kulava mbelewela, na mahembahemba nago gasonga kufumula. 27 Watumigwa wa mwene mgunda wamuwinza wamlongela, ‘Mndewa gweye sikuhanda mbeyu zinogile muugunda wako, ivo mahembahemba gano galawa kulihi?’ 28 Mwenemgunda kawedika, ‘Mhasanyi iyo yasang'hane ivo,’ baho watumigwa wake wamuuza. ‘Kolonda cheye chiite kugang'ola?’ 29 Nayo kawedika, ‘Habule,’ lekeni, ‘Kwavija mhang'ola mahembahemba moung'ola uhemba ivija. 30 Vilekeni vose vikule hamwe mbaka mumlao. Amala nowalongela wasengaji tanhu wakunzanye mahembahemba makinza makinza wagasome moto, labaho wasenge uhemba wawike mdigulu jangu.’"

31 Yesu kagendelela kuwalongela wanhu kuilinga mbuli imwenga,"Ufaume wa kuulanga uilinga na mbeyu ya haladali isoligwe na munhu imwe yaitile kuihanda mumgunda wake. 32 Mbeyu iyo ni ndodo kubita mbeyu zose zili muiisi, mbali ihota na kukula yokua ng'hulu kubita mibiki yose ili mdikonde. Yokula na kua mbiki mkulu mbaka ndege wakuulanga wokwiza kuzenga mvulu mmakwamvi gake."

33 Yesu kawalongela kulinga mbuli imwenga,"Ufaume wa kuulanga uilinga vino, mama imwe yaisolile amila na kuihanganya na usage wa ngano madebe maidi na nusu baho usage wose wolulumuka."

34 Yesu kafunda wanhu gano gose kwa kulinga mbuli, halongile jojose kwa wanhu bila kutumila kulinga mbuli. 35 Katenda vino kulagusa kweli gaja kalongigwe na mlagusi wa Mulungu,

"Notumila mifano nihalonga nao,

Nowalongela gaja gafisigwe tangia kulumbigwa kwa isi."

36 Amala Yesu kadilaga dija bumbila da wanhu na kengila mn'nga, waluko wake wamuwinza wamulongela, "Chilongele uja vija kulinga mbuli ya mahembahemba wogesa choni." 37 Yesu kawalongela, "Munhu yohanda zija mbeyu zinogile ni Mwana wa Munhu, 38 Mgunda uja iyo isi, zija mbeyu zinogile iyo wanhu waja ufaume wa Mulungu ni wao, mbali gaja mahembahemba iyo wanhu waja waija mbananzi, 39 na mhasanyi yahandile mahembahemba gaja iyo Mwenembago. Mulao iyo uhelelo wa isi. 40 Kama vija mahembahemba vigakunzanyigwa na kusomigwa mmoto, ivo vondaiwe muuhelelo wa isi, 41 Mwana wa Munhu kowalagiza watumigwa wake wa kwa Mulungu, wawakunzanye kulawa muufaume wake waja wose wowahonza wanhu watende malozo, na waja wose watenda ubananzi, 42 nakuwasa muumoto uja haufa, na uko wolila na kuluma meno. 43 Amala waja wanhu wa Mulungu wobung'huka kama zua muufaume wa Tataao. Kwaivo, yeli na magutwi na yahulike.

44 "Ufaume wa kuulanga uilinga na chinhu cha bei ng'hulu chifisigwe mumgunda. Munhu imwe yachifisule kachifisa kaidi. Kadeng'helela ng'hani mbaka kaita kugula vose yeli navo, amala kabwela na kuugula mgunda uja.

45 "Kaidi, ufaume wa kuulanga uilinga na munhu imwe yozambwila chinhu cha bei ng'hulu chipatika muisomba chikemigwa lulu, 46 na viyapatile iyo lulu imwe, kaita kugula vinhu vose yeli navyo, kabwela kuigula lulu ija.

47 "Ivija, ufaume wa kuulanga ulinga na lwavu utandigwe mdilamba na wokunzanya chila aina ya somba. 48 Lwavu vuumemile, wanhu waukwega mbaka mhwani, wakala hasi, wasagula somba wanogile waweka mmigelo yao, na waja wehile wawasa. 49 Ivo vondaiwe muuhelelo mwa isi, Watumigwa wa kwa Mulungu wolawila, wowabagula wanhu wehile na wanhu watogoligwe 50 na wowasa wanhu wehile muumoto uja haufa, uko wolila na kuluma meno."

51 Yesu kawauza kaidi mbuli zose ziyawafundile, "Mgamanya gano gose?" Wamwidika,"Enna." 52 Ivo Yesu kawalongela, "Kwaivo, chila mfundaji wa ndagizi za Musa yakalile mwaluko wa ufaume wa kuulanga koilinga na mwene ng'anda yolava muusigavu wake vinhu vaumwaka na va sambi."

53 Yesu viyakomeleze kulonga kulinga na mbuli iyo kalawa hanhu haja, 54 na viyabwelile mchijiji chake. Uko kakala yofunda wanhu mui ng'anda yao yakuiting'hanila Wayahudi mbaka wakanganya. "Ino kapatahi nzewele na uzonza uno?" 55 Ivo, ino sio ija Munhu yosongola vinhu va mibiki? Ivo, mami yake sio Malia, na ndugu zake sio kina Yakobo na Yusufu na Simoni na Yuda? 56 Na lumbu zake sio wose chahamwe nao? Ivo kapatahi gano gose?" 57 Baho wakala womlema. Yesu kawalongela.

"Mlagusi wa Mulungu kotogoligwa kila hanhu mbali sio muikae yake hebu muing'anda yake." 58 Na hasang'hane mizonza mingi haja kwavija hawamtogole.