1 "Chipindi icho, ufaume wa kuulanga woilinga na mhambe kumi wasolile vimuli vao, kuita kumbokela mfunga zengele. 2 Mmwao mwa waja mhambe kumi watano wakala wabozi na watano wakala na nzewele. 3 Waja wabozi wasola koloboi zao, mbali hawasolile mavuta ga usigavu. 4 Mbali waja weli na nzewele wasola mavuta ga usigavu na mzi koloboi zao. 5 Kwa vija mfunga zengele kakawa kuvika, waja mhambe wose wakukila wawasa. 6 Muichilo chikulu hakala na nyangi, ‘Cheleko, cheleko! Mfunga zengele kokwiza, gendeni mkambokele.’ 7 Baho waja mhambe wose walamka, wazitanda goya koloboi zao. 8 Waja wabozi wawalongela waja weli na nzewele, ‘Ching'heni mavuta genu chidogo manake koloboi zetu zofa.’ 9 Mbali waja weli na nzewele wawalongela, ‘Mavuta hagachenela cheye na mweye! Yofaya muite mmagenge mkaigulile mavuta genu!’ 10 Ivo waja mhambe wabozi viwaitile kugula mavuta, mfunga zengele kavika, na waja mhambe waitandile goya wengila hamwe nayo muing'anda ya zengele, amala lwivi uhindigwa. 11 Hamwande waja mhambe wabozi weza, wakema, ‘Gomkulu, gomkulu, chivugulile! 12 Mbali yeye kawedika, ‘Kweli nomlongeni, siwamanyile mweye.’" 13 Hachikomelezo Yesu kalonga, "Ivo itandeni, kwa vija hamdimanya zua hebu saa.

14 "Chipindi icho yokuwa kama munhu imwe yafungile mwanza wa kutali. Kawakema watumigwa wake, kaweng'ha vinhu vake. 15 Kamwing'ha chila munhu vija viyodaha, imwe sente vikadi vitano va zahabu, na imwenga sente vikadi vidi va zahabu na imwenga sente kadi imwe ya zahabu, amala kafunga mwanza. 16 Bahaja ija yeng'higwe sente vikadi vitano kazisang'hanila sang'hano na zongezeka vikadi vimwenga vitano. 17 Ivija ija yeng'higwe vikadi vidi va zahabu nayo zongezeka vikadi vidi va zahabu. 18 Mbali ija yeng'higwe sente ya kikadi chimwe, kaita kahimba kombo muisi kakisila, kaifisa sente imwe ya zahabu ya mkulu wake.

19 "Vichibitile chipindi chitali, mndewa ija kabwela, kasonga kupeta hisabu ya vinhu vake. 20 Mtumigwa yeng'higwe sente za zahabu tano keza, kasola zahabu tano fungu jongezeke, kamlongela, ‘Gomkulu kuning'ha sente zahabu tano, hano hana sente zahabu tano fungu jongezeke.’ 21 ‘Mkulu wake kamlongela, ‘Kusang'hana goya, mtumigwa unogile na utogoligwe. Kutogoligwa kwa mbuli ndodo ivo nokwing'ha gamwenga makulu. Izo udeng'helele hamwe na mkulu wako!’ 22 Mtumgwa yeng'higwe sente zahabu mbili keza, kalava zahabu mbili zongezeke, kalonga, ‘Gomkulu kuning'ha sente zahabu mbili, sola zahabu zimwenga mafungu maidi gongezeke gamhatile.’ 23 ‘Mkulu wake kamlongela, ‘Kusang'hana goya mtumigwa unogile na utogoligwe. Kutogoligwa kwa mbuli ndodo ivo nokwing'ha gamwenga makulu. Izo udeng'helele hamwe na mkulu wako!’ 24 Mbali ija yeng'higwe sente zahabu imwe keza, kalonga ‘Gomkulu, nivimanya gweye hubunzagwa. Kosola chinhu si chako na kokwaha chinhu huchihandile. 25 Nidumba na niihimbila sente yako ya zahabu mdikombo. Sola basi sente yako imwe ya zahabu.’ 26 ‘Mkulu wake kamlongela, ‘Gweye iyo mtumigwa mbananzi na mbwa! Kovimanya niye nokwaha chinhu sichihandile na nosola chinhu si changu. 27 Ivo kulondeka, kuika sente yangu ya zahabu mwa wanhu wakuzisang'hanila sang'hano amala nihabwela mhate fungu jangu na dija fungu jongezeke. 28 Ivo, mbokeni iyo sente ya zahabu inimwing'ile mwing'heni munhu ija yeli na vikadi kumi va zahabu. 29 Manake, munhu yokisang'hanila sang'hano chinhu chinimwing'ile nomwongezela na chimwenga, nayo kokua navo vingi. Mbali munhu yoyose ija hakisang'hanila sang'hano chidodo chinimwing'ile, hata icho chidodo chiyeli nacho, nacho nomboka. 30 Na kwa mbuli ya ino mtumigwa yeli bule fungu chongezeke, mwaseni kunze mdizizi! Uko kokua na ndilo na kuluma meno.’

31 "Mwana wa Munhu vonda yeze muukulu wake, na watumigwa wa kwa Mulungu wose weli hamwe nayo, baho kokala mchigoda chake cha ulongozi yeli mfaume. 32 Wanhu wa isi zose woiting'hana hamwake, nayo kowabagula wanhu kama vija msusilaji viyobagula bung'hukilalo na mbuzi. 33 Koweka bung'hukilalo ubanzi wake wa kulume na mbuzi ubanzi wake wa kumoso. 34 Amala mfaume kowalongela waja wa ubanzi wake wa kulume, ‘Izoni mweye mwing'higwe ganogile na Tata yangu, bokeleni ufaume utandiligwe kulawa kulumbigwa kwa isi zose. 35 Kwavija nikala na nzala na mweye mning'ha ndia, nikala na ng'ilu na mweye mning'ha mazi, nikala nyambenyambe mmbokela, 36 ng'hala bule chivalo mnivaza, nikala mtamu na mweye mwiza kunilola, nikala mdigeleza na mweye mwiza kunilola.’ 37 Baho waja wanhu wanogile wamwidika mfaume, ‘Mndewa, lini chikuona kuna nzala na cheye chikwing'ha ndia, hebu kukala na ng'ilu na cheye chikwing'ha mazi? 38 Na kaidi lini chikuona uli nyambenyambe na cheye chikubokela, hebu kukala bila chivalo na cheye chikuvaza? 39 Na kaidi lini chikuona kukala mtamu hebu mfungigwa na cheye chiza kukulola?’ 40 Mfaume kowedika, ‘Nowalongeleni kweli, chila chinhu chimumtendele imwe mwa wano ndugu zangu wadodo mnhendela niye.’ 41 "Amala kowalongela waja weli ubanzi wake wa kumoso, ‘Segeleni hamwangu mweye mwinukiligwe! Gendeni muumoto wa mazua gose ulibule uhelelo uja yatandiligwe Mwenembago na vinyamkela wake. 42 Manake nikala na nzala na mweye hamning'ile ndia, nikala la na ng'ilu na mweye hamning'ile mazi. 43 Nikala nyambenyambe na mweye hamnibokele ng'hala mtamu na nifungigwe na mweye hamwizile kunilola.’ 44 Nao baho womwidika, ‘Mndewa, lini chikuona kakala na nzala hebu ng'ilu hebu kukala nyambenyambe hebu bila chivalo, na kukala mtamu hebu mfungigwa, na cheye hachikusang'hanile? 45 Nayo kowedikila, ‘Nowalongeleni kweli, chila vuumlekile kumtendele mbuli zino, imwe mwa wano wadodo, mkala mlema kunhendela niye.’ 46 Ivo, wano woita muulamuzi ulibule uhehelo, mbali waja watogoligwe woita muugima ulibule uhelelo."