1 "Seke muwalamula wanhu wamwenga, ili na mweye Mulungu seke yawalamule na mweye. 2 Manake vija vimuwatendela wamwenga, ivija namweye Mulungu vonda yawatendele. Chipimo ichija chimupimila wamwenga icho chomupimiligwa namweye. 3 Habali gweye kochiona chibale chili mgati mwa siso da miago, mbali hudiona bale dili mdisiso jako?

4 Hebu kodahaze kumulongela miago, ‘Leka nikulave chibale mdisiso jako, kuno gweye kuna bale mdisiso jako? 5 Kwa chibilikizi gweye! Tanhu lava bale dili mdisiso jako labaho kodaha kuchiona goya chibale chili mgati ya siso da miago na kuchilava. 6 Seke muweng'he umbwa vinhu vinang'hane seke wawahindukile na kumulumeni, hebu seke muwapigisile nguluwe usalu wa bei ng'hulu seke waubojoge.

7 "Puleni na mweye mokwing'higwa, zambwileni namweye mopata, toeni hodi na mweye movuguliligwa. 8 Manake chila yopula kokwing'higwa, na yozambwila kokwiza kupata, na yotoa hodi kovuguliligwa. 9 "Ivo yelihi mmwenu mwanage yahampula ndia komwing'ha dibwe? 10 Hebu, yahampula somba komwing'ha nyoka? 11 Mwahawa mweye mli wabananzi mvimanya kuweng'ha wanenu vinhu vinogile, nowalongela kweli Tata yenu yeli kuulanga kowasang'hanila ganogile ng'hani waja wompula.

12 "Gose gamlonda wanhu wawasang'hanile, wasang'hanileni wao ivija. Vino ivo viilondeka muindangizi ya Musa na mahala ga walagusi wa Mulungu.

13 Ingileni kwakubitila chiheleto, kwavija nzila ya kwingila muubananzi ya ugazi, na lwivi lwa kwingilila umo wa ugazi, wobitila nzila iyo wanhu wengi. 14 Mbali nzila ikulongoza muugima ni sisili, na lwivi lwa kwingilila umo nao mdodo. Wanhu wadodo tu wodaha kuimanya nzila iyo.

15 "Itiganyeni na walagusi wa uvwizi, wao wowezila kwakunze wooneka kama bung'hukilalo, mbali mgati yao kama mbwisi wakali.

16 Mowamanya kwa gaja gowasang'hana. Ivo, wanhu wokwaha zabibu mmibiki ya miwa, hebu manhunda ga msosowana mmisongoma? Habule! 17 Ivo, mbiki unogile wolela manhunda ganogile, na ivija mbiki wihile wolela manhunda gehile. 18 Baho mbiki unogile haudaha kulela manhunda gehile, hebu mbiki wihile haudaha kulela manhunda ganogile. 19 Chila mbiki uja haulela manhunda ganogile wokanhigwa na kwasigwa mmoto. 20 Kwaivo mowamanya kwa sang'hano zao.

21 Si chila munhu yong'hema Mndewa, Mndewa kokwingila muulfaume wa kuulanga, mbali ija yosang'hana goyolonda Tataangu yeli kuulanga kwa Mulungu. 22 Mdizua ijo da ulamuzi dihavika, wanhu wonilongela, ‘Mndewa, Mndewa! Kwa zina jako chiligula usenga wako, ivija kwa zina jako chiwalava vinyamkela na kusang'hana mujiza. 23 Baho nowalongela, ‘Siwamanyile mbee. Segeleni hamwangu, mwewe wabananzi!’

24 Ivo chila munhu yohulika mbuli zangu na kuzisang'hana, iyo koilinga na munhu yeli na nzewele, yazengile ng'anda yake muulongo mdala ulina mabwe. 25 Mvula yahatowa, vizanda vihamema, beho kulu dihabuma na kuitoa ng'anda iyo. Baho ng'anda iyo haigwa kwavija izengigwa mmabwe.

26 Ila yoyose yohulika mbuli zangu na hazisang'hanile, iyo koilinga na munhu mbozi yazengile ng'anda yake mmisanga. 27 Mvula yotoa, vizanda vomema, beho kulu dobuma na kuisung'ha ng'anda iyo, nayo yogwa, na kugwa kwake kukua kukulu."

28 Yesu viyamalile kulonga gago, bumbila kulu da wanhu dikanganya gaja mafundo gake. 29 Hagawile kama wafundaji wao wa ndagizi za Musa, mbali kafunda kama munhu yeli na udaho.