1 Gano gago mazina ga lukolo lwa Yesu Kilisito, mwana wa Daudi, mwana wa Ibulahimu. 2 Ibulahimu kamlela Isaka na Isaka kamlela Yakobo na Yakobo na ndugu zake, 3 Yuda kamlela Pelesi na Zela, mamiyao kakala Tamali, Pelesi kamlela Hesiloni na Hesiloni kamlela Lamu, 4 Lamu kamulela Aminadabu, Aminadabu kamlela Nashoni, Nashoni kamulela Salimoni, 5 Salimoni kamlela Boazi, na mamiyake Boazi kakala Lahabu, Boazi kamlela Obedi, nayo mamiyake Obedi kakala Lutu, Obedi kamlela Yese, 6 Yese kamlela Daudi ija yakalile mfaume. Daudi kamlela Solomoni, ija mamiyake kakala Betisheba yakalile mwehe wa Ulia. 7 Solomoni kamulela Lehoboamu, Lehoboamu kamulela Abiya na Abiya kamulela Asa, 8 Asa kamulela Yehoshafati, Yehoshafati kamulela Yolamu, Yolamu kamulela Uzia, 9 Uzia kamulela Yosamu, Yotamu kamulela Ahazi, Ahazi kamulela Hezekia, 10 Hezekia kamulela Manase na Manase kamulela Amoni na Amoni kamulela Yosia, 11 Yosia kamlela Yekonia na ndugu zake. Uo ukala msimo uja Wayahudi viwagaligwe mmahame uko Babuloni. 12 Wayahudi viwagaligwe mmahame uko Babuloni, Yekonia kamlela Shealitieli, Shealitieli kamlela Zelubabeli, 13 Zelubabeli kamulela Abiudi na Abiudi kamulela Eliyakimu, Eliyakimu kamulela Azoli, 14 Azoli kamulela Zadoki na Zadoki kamlela Akimu na Akimu kamulela Eliudi, 15 Eliudi kamulela Eliazali na Eliazali kamulela Matani na Matani kamulela Yakobo, 16 nayo Yakobo kamulela Yusufu ija yakalile mulume wa Malia, mamiyake Yesu, yokemigwa Kilisito. 17 Ivo, hakala na vilelo kumi na vine kulawa Ibulahimu mpaka Daudi na vilelo kumi na vine kulawa Daudi mbaka msimo wa Wayahudi viwasoligwe kuvihame Babuloni, na vilelo kumi na vine kulawa msimo wa Wayahudi kugaligwa mmahame Babuloni mbaka Kilisto.

18 Ivo kuvumbuka kwa Yesu Kilisito kukala vino: Malia mami yake Yesu kakala kalaviligwa vilama na Yusufu, mbali wang'hali hawanafunga zengele Malia koneka kamha inda kwa udaho wa Muhe wa Mulungu. 19 Kwavija Yusufu, mulume yamlavile vilama Malia kakala munhu yotogoligwa, halondile kumgela chinyala Malia hazelu, kalonda kumleka kwa kinyele. 20 Viyakalile yang'hali yoitonga mbuli iyo mtumigwa wa kwa Mulungu kamlawila mzi nzonzi, kamlongela, "Yusufu, mwana Daudi, sekeudumbe kumsola Malia yawe mwehe wako, manake inda yeli nayo ya udaho wa Muhe wa Mulungu. 21 Nayo koibasula mwana wa chilume na gweye komwing'ha zina da Yesu, manake iyo yonda kuwalohola wanhu wake kulawa mmalozo gao." 22 Ivo, ganogose galawilila ili divikile dija Mndewa diyalongile kubitila mlagusi wa Mulungu kua, 23 "Mvimanye mhambe kokwamha inda, kolela mwana wa chilume, nao womkema zina jake Emanueli," manake, "Mulungu kahamwe na cheye." 24 Yusufu viyalamke kulawa mzinhongo katenda kama vialagizigwe na mtumigwa wa kwa Mulungu, kamsola Malia kuwa mwehe wake. 25 Mbali Yusufu hammanyile mwehe wake mbaka viyaibasule mwana wa chilume. Nayo Yusufu kamwing'ha zina, kamkema Yesu.