1 Chipindi icho Yesu kakala yobita mmigunda ya uhemba Mdizua da kuhumula. Baho, waluko wake wakala na nzala, wasonga kukwanyula makwamvi ga uhemba na kuja lukuso. 2 Mafalisayo viwaonile gago wamlongela Yesu, "Lola! Waluko wako wosang'hana mbuli igomigwe kusang'hanigwa Mdizua da Kuhumula!" 3 Kawedika kawalongela, "Ivo, hamsomile viyatendile Daudi na wayage viwakalilile na nzala? 4 Baho kengila Muing'anda ya Mulungu, kaja ija migate ija ya laguso ija igomigwe kujigwa na wamwenga, mbali walava nhambiko waiyeka. 5 Hebu hamsomile mchitabu cha ndagizi za Musa kua walava nhambiko mdizua da kuhumula wobena ndagizi mui ng'anda ya Mulungu kwakusang'hana sang'hano, mbali hawapetigwa kua wabananzi?

6 Ivo, nowalongeleni kua hana chinhu hano chikulu kubita ng'anda ya Mulungu. 7 Maza mvimanyile mayandiko golonga, ‘Nolonda bazi mbali sio nhambiko ya kulunguza,’ mhalekile kuwalonga vihile wanhu walibule gehile, 8 kwavija Mwana wa Munhu kana udaho kwambuli ya Zua da kuhumula."

9 Yesu kalawa baho, kaita kui ng'anda ya kuiting'hanila Wayahudi, 10 umo kukala na munhu yaholole mkono. Mafalisayo wamwenga wakala baho ili kumgeza Yesu ili yapate mbuli, ivo wamuuza Yesu, "Ivo, yofaya kumhonya munhu mdizua da Kuhumula?" 11 Mbali Yesu kawalongela, "Yokuwaze mmwenu munhu imwe yeli na bung'hukilalo wake kengila mdikombo tali mdizua da kuhumula? Ivo hadaha kumwamha na kumlava mdikombo ijo? 12 Mbali munhu kofaya ng'hani kubita bung'hukilalo! Ivo, yofaya kutenda ganogile mdizua da Kuhumula." 13 Amala Yesu kamlongela munhu ija yaholole mkono, "Golosa mkono wako."

Kaugolosa mkono wake nawo uhona ukala kama uja umwenga. 14 Ivo, Mafalisayo walawa wamwikila chigwena chakumkoma Yesu.

15 Mbali Yesu viyahulike mbuli iyo kahalawa hanhu haja, wanhu wengi wamuwinza. Kawahonya watamu wote 16 na kawagoma sekewawalongele wanhu mbuli zake. 17 Kagasang'hana ivo ili gaja gayalongile Mulungu kubitila Mlagusi wa Mulungu Isaya gawe kweli.

18 Ino iyo mtumigwa wangu inimsagule, ija nili na wende nayo, yoning'ha wende mmoyo. Muhe wangu nowika kumwake, nayo kowalongela ulamuzi wangu mziisi zose.

19 Iyo holema hebu hoguta nyangi, hebu dizi jake hadihulikika muinzila.

20 Hadibena dete dihondeke, hebu utambi ulawa yosi hauzima. Mbaka chila munhu honda yalamuligwa vijaviilondeka,

21 Na kumwake wanhu wose womtumainila."

22 Amala wamgalila munhu imwe chipofu na yambule chinyamkela yamtendile kua na ludanha. Yesu kamuhonya na baho kadaha kulonga na kuona. 23 Bumbila jose da wanhu dizaganyigwa kwa gaja Yesu gayatendile. Waiuza, "Ino sio mwana wa Daudi yalalikigwe na Mulungu? 24 Mafalisayo viwahulike gago walonga, "Munhu ino kowalava vinyamkela kwakulongozigwa na Belizebuli, mkulu wa vinyamkela."

25 Yesu kuno yovimanya viwotonga, kawalongela,"Ufaume wowose wahaihasanya na kuigola wenyego wobanangika, na wanhu wa ng'anda imwe wahaiasanya na kuigola wenyego kwa wenyego wobanangika. 26 Na ihawa Mwenembago komuwinga Mwenembago miage iyo koigola mwenyego mmabumbila, na hadaha kukala ng'hani kogwa! 27 Mweye molonga nowawinga vinyamkela kwa udahi wa Belizebuli, ivo, wajalusona wenu wowalava vinyamkela kwa udahi wa yelihi? Kwavija wao wao wonda wawalamule mweye. 28 Mbali ihawa nie nowalava vinyamkela kwa udaho wa Muhe wa Mulungu, ivo mvimanye kua ufaume wa Mulungu uwavikila. 29 Habule munhu yodaha kubena ng'anda ya munhu yeli na ludabwa na kumboka vinhu vake, tanhu kolondeka yasonge kumfunga munhu ijo yeli na ludabwa, labaho komboka vinhu vake. 30 Munhu yoyose hailumbile nanie konilema, na yoyose hakunzanya nanie iyo kopwililisa. 31 Kwa ivo nowalongela, wanhu wolekeseligwa malozo gao na maligo gao gose, mbali hawalekeseligwa malozo ga kumliga Muhe wa Mulungu. 32 Kaidi yolonga mbuli ya kumbela Mwana Munhu, kolekeseligwa malozo gake, mbali yolonga mbuli ya kumbela Muhe wa Mulungu halekeseligwa malozo gake, hebu muiisi ino hebu muiisi ikwiza.

33 "Mbiki unogile wolela manhunda ganogile, na mbiki wihile wolela manhunda gehile. Mbiki womanyika kwa manhunda goyolela. 34 Mweye mwihihe kama nyoka weli na sumu! Modahaze kuilongela ganogile kuno mweye mwiha? Kwa mulomo munhu hulonga gomemeza mmoyo.

35 Munhu yanogile kolava mbuli zinogile mmoyo wake unogile, munhu yehile kolava vinhu vihile kulawa muumoyo wake wihile.

36 "Ivo, nowalongeleni, mdizua da kulamula wanhu wolondeka kulava hesabu ya chila mbuli iyalongile ihile. 37 Manake kwa mbuli zako kotogoligwa kua kwabule dihile, na kwa mbuli zako kolamuligwa kua kwa mbananzi.

38 Amala wafunda ndagizi za Musa wamwenga na Mafalisayo wamuwinza Yesu wamlongela, "Mfundaji chonda kuona chilaguso kulawa kumwako." 39 Yesu kawedika,"Ulelo wa mchipindi chino, waubananzi na ulibule nhogola! Molonda chilago? Hamwing'higwa chilaguso mbali chija cha Yona mlagusi wa Mulungu. 40 Vija Yona viyakalile mazua madatu mmunda mwa somba nyangumi misi na chilo, ivo Mwana wa Munhu vonda yakale mgati muulongo mazua madatu misi na chilo. 41 Wanhu wa Ninawi wolawila mchipindi cha ulamuzi, nawo wochilamula kua china ubananzi. Manake Waninawi wohinduka na kugaleka malozo gao kwambuli ya kuligula kwa Yona! 42 Malikia wa Sheba kokwima mchipindi cha ulelo uno vonda ulamuligwe, nayo kochilongeleza kua chibananga. Manake iyo kalawa kutali keza kutegeleza mbuli za nzewele za Mfaume Selemani, na nowagangamizila kua hano hana chikulu kubita Mfaume Selemani!

43 Chinyamkela yahalavigwa kwa munhu, huzunguluka zunguluka hanhu hanyalile kozambwila hanhu hakuhumula na kama hapatile, 44 baho koilongela, ‘Nobwele ukae yangu kunilawile.’ Mbali yahabwela nakuivika ng'anda yabule chinhu, ifagiligwa na kuhambigwa. 45 Bahaja koita kuwasola vinyamkela wamwenga saba wehile kubita iyo, na wokwiza kukala umo. Na uzidilwa wake munhu iyo wokwiha ng'hani kubita viyakalile haumosi. Ivo vondaiwe kwa wanhu wano wabananzi.

46 Yesu viyakalile yogendelela kulonga na wanhu, mami yake ndugu zake wavika. Wema kunze walonda walonge nayo. 47 Ivo, munhu imwe kamlongela, "Lola mami yako na ndugu zako wahanze wolonda kulonga na gweye." 48 Yesu kamuuza munhu iyo, "Mami yangu yelihi? Na ndugu zangu welihi?

49 Amala kagolosa mkono kwa waluko wake kalonga, "Wano wao mami yangu na ndugu zangu! 50 Manake yoyose yosang'hana goyolonda Tataangu yeli kuulanga, iyo iyo ndugu yangu na lumbu jangu na mami yangu."