1 Vigabitile mazua sita, Yesu kawasola Petelo, na Yakobo na Yohana na ndugu yake, kaita nao waiyeka kulugongo mtali. 2 Uko, Yesu kageluka chihanga hamwao, chihanga chake chibalika kama zua na vivalo vake vikala vizelu chuwee kama bung'hulo. 3 Bahaja waluko wa Yesu wawaona Musa na Elia walawilila wolonga na Yesu. 4 Baho Petulo kamlongela Yesu, "Mndewa vinoga cheye kukala hano! Wahalonda nozenga viheha vidatu, chimwe chako na chimwe cha Musa na chimwenga Elia." 5 Viyakalile kolonga ivo, wingu zelu diwagubika, na dizi dihulikika kulawa mdiwingu yolonga, "Ino iyo mwanangu wa wende, nili na wende nayo, mtegelezeni. 6 Waluko viwahulike dizi iyo wagwa kingubanguba, wadumba ng'hani. 7 Yesu kawawinza, kawamha kalonga, "Imeni, sekemdumbe!" 8 Viwalolile wamuona Yesu yaiyeka, hakala habule munhu imwenga. 9 Baho, viwakalile wotelemka kulawa kulugongo, Yesu kawalalika, "Sekemumlongele munhu mbuli mzionile mbaka Mwana wa Munhu vonda yazilibuligwe." 10 Amala waluko wamuuza, "Habali wafunda ndagizi za Musa wolonga kua yolondeka tanhu Elia yeze?" 11 Yesu kawedika, "Kweli, Elia kokwiza kuzitanda goya mbuli zose. 12 Mbali nowalongeleni, Elia kamala kwiza nao hawammanyile, mbali wamtendela kama viwalondile. Ivo ivo Mwana wa Munhu ivo yatendiligwe mmakono gao." 13 Baho wao waluko wavimanya kua kakala kowalongela mbuli ya Yohana Mbatizi.

14 Viwauvikile kaidi dija bumbila da wanhu munhu imwe kamuwinza Yesu, kamtumbalila mavindi, 15 kalonga, "Mndewa, monele bazi mwanangu kwa vija kana utamu wa kugwa, kaidi kodununzika ng'hani, mala nyingi iyo kogwa mmoto hebu mmazi. 16 Nimgala kwa waluko wako mbali wapotigwa kumhonya." 17 Yesu kedikila, "Mweye ulelo wa ubananzi na ulekile kutogola! Nokala na mweye mbaka lini? Nowafunyila moyo mbaka lini? Ngaleni hano iyo mwana!" 18 Yesu kamkomokela Mwenembago nayo kamlawa, na ija mbwanga kahona saa iija. 19 Amala waluko wamuwinza Yesu waiyeka wamuuza, "Habali cheye chipotigwa kumlava ija chinyamkela?" 20 Yesu kawedika, "Kwa mbuli ya nhogola yenu ndodo. Nowalongeleni, kama tu mwahawa na nhogola ilindodo kama mbeyu ya haladali, modaha kuulongela lugongo uno, ‘Lawa hano uite haja,’ nao woita. Baho hahakalile na chinhu chiwapote. 21 Chinyamkela kama ino havidahika kumlava ila kwa kupula na kufunga!"

22 Waluko viwakalile hamwe uko isi ya Galilaya, Yesu kawalongela, "Mwana wa Munhu womgoga na kugaligwa kwa wanhu 23 na wao womkoma, mbali mdizua da kadatu kozilibuka." Na waluko wake wogwa giogio ng'hani.

24 Viwavikile Kapelenaumu, wagoga kodi wa ng'anda ya Mulungu waita kwa Petulo, wamuuza, "Ivo, Mfundaji wenu koliha kodi ya ng'anda ya Mulungu?" 25 Petulo kedika,"Ena, koliha." Baho, Petulo viyeingile muing'anda, kabula hanalonga mbuli, Yesu kamlongolela kamuuza, "Simoni, gweye koonaze? Wafaume wa mziisi hukunzanya kodi kulawa kwa yelihi? Kulawa kwa wenekae hebu kulawa kwa nyambenyambe?" 26 Petulo kedika, "Kulawa kwa nyambenyambe." Yesu kawalongela,"Ena ivo, wenekae hawaliha. 27 Mbali kwa vija seke chigombe nao, genda kudilamba ukaloe somba, na umsole somba yasongile kwenzeka, mbalule mlomo wake, na mzinda mwake kovika sente ya kwenela kuliha kodi. Isole kwa mbuli yangu na kwa mbuli yako."