1 Mafalisayo na Masadukayo wamuwinza Yesu, na wamgeza, wampula yawalagusile uzonza kulawa Kuulanga. 2 Mbali Yesu kawedika, kawalongela, "Yahavika chigulogulo, mweye molonga, ‘Igolo hokua goya kwa vija wingu dung'hu.’ 3 Na imitondo molonga, "Lelo hokua na chivumbi cha mvula, kwa vija ulanga mdung'hu na wingu dizama." Ivo mweye mdaha ng'hani kusoma misimo na kulola Ulanga, mbali kumanya uzonza wa misimo wa Mulungu hamvimanyile! 4 Ulelo wa ubananzi na wa luhadu! Cholonda uzonza, mbali haching'higwa uzonza wowose ila uja wa Yona." Baho kawaleka, kasegela.

5 Waluko wake viwalokile umwambu wa kaidi mwa lamba, wakala waisemwile kusola migate. 6 Yesu kawalongela, "Muiteganye na amila ya Mafalisayo na Masadukayo." 7 Baho wao wakala woilongela, "Kolonga ivo kwa vija hachisolile migate." 8 Yesu kavimanya viwailongela, kawauza, "Mweye wanhu kutogola kwenu kudodo! Habali molongelela mbuli ya kuleka kusola migate? 9 Ivo, mng'hali kuvimanya? Ivo muisemwa viniimegile ija migate mitano niwalisa wanhu elufu tano? Ivo mmemeza vigelo vingahi kwa ndia ilagale? 10 Hebu ija migate saba iniwalisile wanhu elufu nne? Ivo mmemeza vigelo vingahi va ndia isigale? 11 Habali hamvimanya kua sikalile nolongelela mbuli ya migate? 12 Baho waluko wavimanya kawalongela waitiganye na amila ya migate, mbali kwa mbuli ya mafundo ga Mafalisayo na Masadukayo.

13 Yesu viyavikile ubanzi wa Kaisalia Filipi, kawuza waluko wake, wanhu wolonga Mwana wa Munhu iyo nani?" 14 Wamwidika, "Wamwenga wolonga kua iyo Yohana Mbatizi, wamwenga iyo Elia, na wamwenga Yelemia hebu imwe wa waja walagusi wa Mulungu." 15 Yesu kawauza, "Na mweye vilihi molonga niye iyo nani?" 16 Simoni Petulo kamwidika, "Gweye iyo Kilisito Mlohozi, Mwana wa Mulungu uli na ugima." 17 Yesu kalonga, "Kumweda gweye Simoni mwana Yona, kwa vija habule munhu yoyose yakufunhulile mbuli ino, mbali Tata yangu yeli Kuulanga. 18 Na niye nokulongela, "Gweye Petulo, kumwako gweye nodikunzanya bumbila da wanhu wamtogola Kilisito, hebu udaho wa isi ya wafile haidaha kuwahuma. 19 Nokwing'ha fungulo wa ufaume wa kuulanga kwa Mulungu, chila chuufungile muiisi, chofungigwa ivija Kuulanga kwa Mulungu, chila chuufungula muiisi chofunguligwa kuulanga." 20 Amala kawagoma waluko wake sekewamlongele munhu yoyose kua yeye iyo Kilisito.

21 Kulawila baho Yesu kasonga kuwalongela waluko wake bila chifiso kua kolondeka kuita Yelusalem, na uko kopata kodununzigwa ng'hani na Wavele na Wakulu wa Walava Nhambiko na Wafunda ndagizi za Musa, kua kokomigwa na mdizua da kadatu kozilibuligwa. 22 Baho Petulo kamlava Yesu hamgwazo, kasonga kumkomokeka, "Sekeiwe ivo Mndewa mbuli ino haikuvika!" 23 Mbali Yesu kahinduka, kamlongela Petulo, "Segela hamwangu, Mwenembago! Gweye kong'imila niye. Kotonga ga wanhu hutonga ga Mulungu." 24 Amala Yesu kawalongela waluko wake, "Munhu yoyose yahalonda kua mjalusona wangu, kolondeka yaileme mwenyego, na yatogole msalaba wake amala yaniwinze. 25 Manake munhu yonda yaulohole ugima wake mwenyego, kowagiza, mbali yonda kuwagiza ugima wake kwa kuniwinza, koupata. 26 Mbali munhu yonda kwagiza ugima wake kwa mbuli yangu kouhonya. Ivo munhu kopata choni yahapata uzenzi wa isi zose na kuno kawagiza ugima wake? Hebu munhu kolava choni chiwe badili ya ugima wake? 27 Manake Mwana wa Munhu kokwiza muukulu wa Tata yake hamwe na watumigwa wake wa kwa Mulungu, na baho, baho honda yamlihe chila munhu kwa vija viyasang'hane. 28 Nowalongela kweli, hana wamwenga bahano hawadanganika mbaka wonda wamone Mwana wa Munhu yaheza Muufaume wake."