1 Viivikile lukwili, wakulu wa Walava nhambiko wose na vilongozi wa Wayahudi wailongela vija viwalonda wamkome Yesu. 2 Wamgela loda, wamsola, wamgala kuing'anda ya Pilato, mkulu wa isi ya Loma.

3 Baho Yuda, ija yakalile yamhinduke Yesu, viyaonile wamala kumlamula Yesu kumkoma, baho kalumila ng'hani mmoyo, kawabwelezela vija vihande salasini va madini ga feza. 4 Kawalongela, "Nibananga kumlava munhu yelibule ubananzi yakomigwe." Mbali wao walonga, "Ivo cheye chitendeze? Ijo jako mwenyego."

5 Baho Yuda kavasa vija vihande va madini ga feza mui Kae ya Mulungu, kalawa kunze, kaita kuibota. 6 Waja wakulu wa Walava nhambiko wazisola zija sente walonga, "Hazifaya kuzika msigavu wa ng'anda ya Mulungu kwavija ni sente za damu." 7 Ivo waitogolela kugulila mgunda wa mlumba nongo uwe hanhu hakuwandila wanyambenyambe. 8 Lekaavo mbaka lelo mgunda uwo wokemigwa mgunda wa damu. 9 Baho gayalongile mlagusi wa Mulungu Yelemia gavikila, "Wasola vihande salasini va madini ga feza, bei ng'hulu ya ija wanhu wa Izilaeli wamgula, 10 watumila sente izo kugulila mgunda wa mlumba nongo, kama Mndewa viyanilagize."

11 Yesu kemizigwa hamkulu wa isi. Baho mkulu wa isi kamuuza, "Ivo gweye iyo mfaume wa Wayahudi?" Yesu kamlongela, "Gweye kolonga. 12 Mbali wakulu wa nhambiko na wavele viwakalile womlongeleza, hedikile mbuli. 13 Baho Pilato kamuuza, "Ivo, huhulika gago gose gawakulongeleza?" 14 Mbali Yesu hedikile hata mbuli imwe, hata ivo mkulu wa isi ya Loma kakanganya ng'hani.

15 Baho ikala mazoela gake mkulu wa isi kuwalekesela mfungwa imwe ija iwomulonda wanhu muindeng'helelo ya Pasaka.

16 Chipindi icho hakala na mfungwa imwe yamanyike ng'hani kwa gehile gayasang'hane zina jake Balaba. 17 Ivo, wanhu viwaiting'hanile hamwe, Pilato kawauza, "Molonda niwalekesele yelihi mwa wano waidi, Balaba hebu Yesu yokemigwa Kilisito." 18 Pilato kalonga ivo, kwavija kavimanya wamgala kumwake kwa mbuli ya migongo.

19 Pilato viyakalile mchigoda cha ulamuzi, mwehe wake kamgalila usenga, "Sekewingile muulamuzi wa munhu ino mtenda goya, kwavija lelo nigaya ng'hani mzinzozi kwambuli yake." 20 Mbali wakulu wa walava nhambiko na wavele wawaswangiza wanhu wampule Pilato yamlekese Balaba na Yesu yakomigwe. 21 Mkulu wa isi ija kawauza, "Yelihi mwa wano waidi imulonda niwalekesele?" Wamwidika, "Balaba!" 22 Pilato kawauza, "Ivo nimtendeze ino Yesu yokemigwa Kilisito?" Wose walonga, "Yawambigwe!" 23 Pilato kauza, "Habali? Katenda dilihi dihile?" Wao wagendelela kwinula dizi, "Muwambe mumsalaba!" 24 Ivo, Pilato viyamanyile kua hadaha kupata chochose na ndwagi zosonga, kasola mazi na kasunha makono gake haulongozi ha wanhu kalonga, "Nie siona mbuli ihile yoyose iyatendile munhu ino yakumtenda yakomigwe, mmane mweye wenyego." 25 Wanhu wose walonga, "Gehile gano gawe na cheye na wanetu!" 26 Baho Pilato kawalekesela Balaba, na kalagiza wanhu wamlibule Yesu miboko amala kamlava wakamuwambe.

27 Amala wamilizi wa mkulu wa isi ya Loma wamgala Yesu muing'anda iyokala mkulu wa Loma, wamzungulukila bumbila jose da wamilizi. 28 Wamvula vivalo vake na kumvaza valo dung'hu da kifaume. 29 Amala wazinga chigalama cha miwa wamwika mditwi, amala wamwikila dete mumkono wake wakulume. Wamtumbalila mavindi wamzeha wolonga, "Haligani mfaume wa Wayahudi!" 30 Wamtemela mate, wadisola dija dete, wamtoa nao mditwi kusindilila kija chigalama cha miwa. 31 Viwamalile kumzeha, wamvula dija valo da kifaume, wamvaza valo jake amala wamgala kumuwamba mumsalaba.

32 Viwakalile woita wamvika munhu imwe yokemigwa Simoni mwenekae wa Kulene, wamswangiza ausole msalaba wa Yesu yaupape. 33 Viwavikile hanhu hokemigwa Goligota, manake, "Hanhu kama vuha da ditwi." 34 Wamwing'ha divai ihanganyigwe na kiliusungu. Mbali viyalanzile kalema kung'wa.

35 Wamuwamba, amala waigolela vivalo vake kwa kutoa simbi. 36 Wakalahasi womwamila. 37 Hachanha ha ditwi jake mumsalaba wandika gaja gawamulonga, "Ino iyo Yesu Mfaume wa Wayahudi."

38 Amala wabavi waidi wawambigwa hamwe nayo, imwe mumsalaba wa kulume imwenga mumsalaba wa kumoso. 39 Wanhu wakalile wobita baho, wamliga Yesu kwa kutigisa magutwi gao wolonga, 40 gweye sikulonga kodaha kubomola ng'anda ya Mulungu na kuizenga mmazua madatu! Haya ilohole mwenyego. Kama gweye Mwana Mulungu, kwaivo hulumuka mumsalaba!" 41 Ivija wakulu wa Walava nhambiko na wafunda ndagizi na vilongozi wa Wayahudi wamzeha Yesu walonga, 42 Kawalohola wamwenga, mbali kuilohola mwenyego hadaha! Ivo iyo si mfaume wa Wayahudi! Kwaivo na yahulumuke mumsalaba, nacheye chomtogola! 43 Kamtumanila Mulungu na kulonga eti iyo Mwana wa Mulungu baho Mulungu nayamulohole kama kweli komlonda. 44 Na ivija waja wabavi waidi wawambigwe hamwe nayo wamuliga.

45 Kulawa saa sita imisi ziza digubika isi yose mbaka saa tisa. 46 Viivikile saa tisa Yesu kalila kwa dizi kulu,"Eloi, Eloi lamasabakitani? Manake, "Mulungu wangu, Mulungu wangu, habali kundeka?"

47 Mbali waja wemile haja viwahulike ivo walonga, "Komkema Elia." 48 Miyao imwe kakimbila kasola dodoki kadizabika muisiki, kaika mdidete, kamwing'ha Yesu yang'we. 49 Wamwenga walonga, "Leka chilole kama Elia kokwiza kumlohola." 50 Baho, Yesu kalila kwa dizi kulu amala kadanganika. 51 Baho golole tali da ng'anda ya Mulungu didegeka vihande vidi kulawila uchanha mbaka hasi, isi itigisika na mabwe gatulika, 52 mapanga gafunhuka na wanhu wadanganike wazilibuligwa. 53 Nayo Yesu viyazilibuke, walawa mmapanga wengila muikae inang'hane na waoneka na wanhu wengi. 54 Ivo, mkulu wa wamilizi na waja wakalile womkimila Yesu viwaonile gudemo da isi na gaja galawilile, wadumba ng'hani walonga, "Ino kweli kakala Mwana wa Mulungu." 55 Hanhu baho hakala wanachike wengi wolola kwa kutali, wao wamsondelele Yesu kulawa Galilaya kuno womhunganikila. 56 Imwe mmwao kakala Malia wa Magdala na Malia mamiyao Yakobo na Yosefu na mami yao wana Zabedayo.

57 Viivikile chigulogulo, keza munhu imwe mnzenzi kulawa Alimataya yokemigwa Yusufu, iyo ivija kakala mwaluko wa Yesu. 58 Kamuwinza Pilato kampula yeng'higwe lukuli lwa Yesu, baho Pilato katogola yeng'higwe. 59 Yusufu kausola lukuli wa Yesu, kauzinga sitili nzelu ya kitani, 60 kawika mdipanga jake dinogile diyasongole mdibwe. Amala kabimbilisa dibwe kulu haulwivi lwa panga na kasegela. 61 Malia wa Magdala na ija Malia imwenga wakala wakalile kudilola panga.

62 Igolo yake, ikalile zua da kaidi kulawa Zua da kuhumula, wakulu wa walava nhambiko na Mafalisayo wamuwinza Pilato, 63 walonga, "Gomkulu, chikumbuka kua ija mvwizi kalonga kabula hanadanganika eti, ‘Mmazua madatu hamwande nozilibuka.’ 64 Kwaivo lagiza wanhu wakimile panga mmazua madatu ili waluko wake seke weze wamwibe na kuwalongela wanhu kua Yesu kazilibuka. Uvwizi uno wachikomelezo wokwiha ng'hani kubita uja ulongole." 65 Pilato kawalongela, "Goya, mnao wamilizi gendeni mkamile vija vumdaha." 66 Ivo waita, wadikimila dija panga, wagela chilaguso mwa dija dibwe na kuleka wamilizi wamile.