1 Yesu viyamalile kuwalagiza waluko wake kumi nawaidi, kalawa baho kaita kuwafunda na kuligula mzikae zili isi ya Galilaya. 2 Nayo Yohana Mbatizi yeli mdigeleza kahulika mbuli ziyasang'hana Yesu Kilisito. Ivo, Yohana kawalagiza waluko wake, 3 wamuuza ivo, "Gweye iyo ija yokwiza hebu chimbete imwenga?" 4 Yesu kawedikila kalonga, "Gendeni mkamlongele Yohana gaja gamuhulika na kugaona, 5 vipofu woona, mbete wogenda, weli na dikulu wonang'hanigwa, mswamagutwi wohulika, wafile wozilibuligwa na vikumbi muyega woliguliligwa Usenga unogile. 6 Wamweda wanhu waja wonhogola nie." 7 Baho, waja watumigwa wa Yohana viwakalile woita, Yesu kasonga kugalongela mabumbila ga wanhu mbuli za Yohana, "Muita kulola choni kuchiwala! Ivo mulonda kulola mbaya itigisigwa na mbeho? 8 Ivo, muita kulola choni? Muita kumlola munhu yavaile vivalo vinang'hane? Wanhu wovala vivalo vinang'hane wokala mzing'anda za wafaume. 9 Nongeleni, muita kulola choni? Ivo, muita kumlola mlagusi? Enaa, chimuonile chibita mlagusi. 10 Yohana Mbatizi iyo mbuli zake zandikigwa mmayandiko ga Mulungu, Mulungu kalonga, ‘Nomlagiza mtumigwa wangu yakulongolele yakutandile nzila.’ 11 Nowagangamizila, Yohana Mbatizi nimkulu kubita wanhu wose wakalile muiisi ino. Mbali yeli mdodo ng'hani muufaume wa kuulanga nimkulu kubita Yohana Mbatizi. 12 Kulawa chipindi cha Yohana Mbatizi mbaka sambi, ufaume wa kuulanga wolemigwa kwa ludabwa, nawo weli na ludabwa wousola.

13 Manake mafundo gose ga walagusi wa Mulungu na ndagizi za Musa galagusa mbuli za ufaume wa Mulungu mbaka chipindi cha Yohana. 14 Kama mwahatogola ivo, Yohana iyo ija Eliya ija walagusi wa Mulungu walongile yalondeke kwiza. 15 Yeli na magutwi gakuhulika na yahulike! 16 "Mbali ulelo uno noulinga na choni? Wailinga na wana wakalile halubuga, kuno wowakema wayao na kuwalongela, 17 ‘Chiwatowela chilongelonge, mbali hamvinile! Chiwembila nyila za ndilo mbali hamlombokeze!’ 18 Yohana viyezile kafunga kuja ndia na kung'wa divai, wao walonga kambula chinyamkela.’ 19 Viyezile Mwana wa Munhu, koja na kung'wa, wao walonga, ‘Mloleni ino, mmelo na mng'waji, mbwiga wa wagoga kodi na weli na malozo!’ Hata ivo nzewele ya Mulungu yooneka kua inoga kuilinga na sang'hano yake."

20 Amala wanhu wa kae zija Yesu ziyasang'hane mizonza mingi, walema kutogola na kugaleka malozo gao, ivo Yesu kawakomhokela vihile wanhu wa kae izo. 21 "Moluona Kolazini! Moluona Betisaida! Manake kama mizonza itendeke kumwenu ihatendeke kuja mzikae za Tilo na Sidoni, wanhu wake wahavalile vivalo va gunia umwaka na kuibaka maivu kulagusa kuwa waleka malozo gao. 22 Mbali nowalongeni, mdizua ijo da kalamula, mweye molamuligwa hakulu kubita wanhu wa kae ya Tilo na Sidoni. 23 Nagweye Kapelinaumu koinula mbaka kuulanga? Habule kohulumusigwa mbaka isi ya wanhu wafile! Manake mizonza isang'hanigwe kumwako, yahasang'hanigwe uko Sodoma, kae iyo ihasigale mbaka sambi. 24 Mbali nowalongeleni, mdizua da kulamula mweye molamuligwa hakulu kubita Sodoma."

25 Msimu uo Yesu kalonga, "Nokwing'ha hewela goo Tata, Mndewa wa kuulanga naisi, kwavija kuwafisa weli nzewele na weli na ilimu mbuli zino, na kuwagubulila wana wadodo. 26 Enaa, Tata ivo vuunogeligwe. 27 "Tata yangu kaning'ha vinhu vose. Habule yammanyile Mwana ila Tata, hebu yammanyile Tata ila Mwana, na yoyose ija Mwana yolonda kumgubulila, 28 "Izoni hamwangu mweye mose mdununzigwa na kuzamilwa na mbahasha za malozo, nanie nowatenda muhumule. 29 Ilumbeni na nie na kunisang'hanila, muifunze hamwangu manake nie na muhole na nabule magoda, namweye mohumula. 30 Kwavija mafundo ganiweng'ha sio madala na mbahasha yangu mbewe."