1 Hadiswele zua da kuhumula da Wayahudi, Maliamu kulawa Magidala na Maliamu mamiyake Yakobo na Salome wagula mavuta ga kunung'ila waita kuubaka lukuli lwa Yesu. 2 Imitondo lukwili, zua da jumapili, waita kudipanga da Yesu. 3 Viwawile mnzila wakala woiuza, walonga "Yelihi yonda yachibimbilisile dibwe dija kulawa haulwivi lwa panga. 4 Mbali viwawile behi kuvika, wadiona dibwe dija kulu, dimala dibimbilisigwa kulawa haukwingilila hadipanga. 5 Viwakalile wokwingila mja mdipanga, wamuona mbwanga yavalile golole zelu kakala yakalile ubanzi wa kulume, nawo wakanganya ng'hani. 6 Mbwanga ija kawalongela, "Seke mdumbe. Momzahila Yesu, kulawa Nazaleti, yawambigwe. Kazilibuka! Kahabule hano. Loleni hanhu hawamtambalize. 7 Mbali gendeni mkawalongele waluko wake sekemswele Petulo kua ‘Kowalongolela koita Galilaya, uko momuona, kama viyawalongele.’ " 8 Amala walawa mja mdipanga kwakukimbila, wadumba ng'hani kwa gudemo na ng'hanganyo ng'hulu ikala iwamha, nao hawamlongele munhu yoyose mbuli yoyose.

9 Yesu viyazilibuke lukwili ya zua da jumapili, mosi kamlawila Maliamu kulawa Magidala, ija yakalile kamlava vinyamkela saba.* 10 Iyo Maliamu kulawa Magidala kaita kuwalongela waja wakalile woisondelela na Yesu, waja wakalilile wolila na kulombokeza nayo. 11 Mbali viwahulike kua Yesu mgima na kua Maliamu kamuona, hawamtogole.

12 Hamwande Yesu kawalawila waluko waidi mwa waja waluko kumi na waidi woita kumgunda kuno kakala na chihanga tafauti. 13 Nao waluko waja waidi viwammanyile, wabwela na kuwalongela wayao. Mbali wao hawawatogolele ivija.

14 Amala Yesu kawalawila waja waluko wake kumi na moja viwakalile woja ndia. Kawakomhokela kwa udala wa mioyo yao na kuleka kutogola gaja gawalongiligwe na waja wamuonile. 15 Baho Yesu kawalongela, "Gendeni muiisi yose, mkaligule Usenga unogile kwa wanhu wose. 16 Yoyose yonda kutogola na kubatizigwa iyo kohonyigwa. Mbali yoyose ija honda kutogola kohukumigwa. 17 Waja wamtogole Kilisito wosang'hana vilaguso vino, kwa kutumila udaho wa Zina jangu wolava vinyamkela, wolonga kwa ulonzi umwenga, 18 wogoga nyoka kwa makono gao na hata wahang'wa kinhu chochose cha kukoma, hakiwakoma mbee, wowekila watamu makono kuwapulila, nao wohona."

19 Yesu viyamalile kulonga nao, kenuligwa kuita kuchanha kwa Mulungu na kakala ubanzi wa nhogolwa wa Mulungu. 20 Amala waluko wake walawa, waita kila hanhu kuligula Usenga Unogile, nayo Mndewa kawataza kasang'hana sang'hano, na kutenda vilaguso, ivo kuulagusa Usenga wake kua ni kweli.