1 Go mkulu Teofilo,

kwa vija wanhu wengi waiyoha kwandika mbuli zilawilile mmwetu, 2 wazandika kama vichisimuliligwe na waja wazionile mbuli izo, na watumigwa wa mbuli ino. 3 Na niye vinilolile goya chila chinhu kulawila haichanduso, niona vinoga nikwandikile mbuli izo kama viilondeka gweye go mkulu Teofilo. 4 Nosang'hana gano ili udahe kuumanya ukweli kwa gaja gaufundigwe.

5 Muusimo wa Helode mfaume wa Uyahudi hakala na mlava nhambiko imwe zina jake Zakalia, yakalile walukolo wa walava nhambiko wa Abiya. Zina da mwehe wake kokemigwa Elizabeti, iyo nayo kolawa mulukolowa walava nhambiko. 6 Na wose waidi weli na nhogolwa kwa Mulungu, wagendelela kuzigoga ndagizi na malagizo gose ga Mndewa. 7 Mbali wakala bule wana, kwa vija Elizabeti kakala mgumba, kwa vija wose waidi wakala wavele ng'hani.

8 Mdizua dimwe Zakalia kakala yolava nhambiko Muikae ya Mulungu na ikala iyo zamu yake. 9 Kama viikalile jadi yao kwa walava nhambiko, simbi imgwila Zakalia kwingila muikae ya Mndewa Mulungu kuvukiza ubani. 10 Na chipindi cha kuvukiza ubani vichivikile, waja wose waikunzanye hamwe kumfugamila Mulungu wakala hanze wopula. 11 Mtumigwa wa kuulanga kwa Mulungu, kamlawila ubanzi wa kulume wa chilemela cha kuvukizila ubani. 12 Zakalia viyamonile kasinhuka na kagwa kigudemo. 13 Mbali mtumigwa wa kuulanga kwa Mulungu kamlongela, "Sekeudumbe Zakalia, manake Mulungu kahulika pulo jako, mwehe wako Elizabeti kokulelela mwana wa chilume. nagweye komkema zina jake Yohana. 14 Kwa vija kokwing'ha ndeng'helelo na kudeng'ha, nawo wanhu wengi vija vonda wadeng'helele kwa mbuli ya uvumbuka wake. 15 Kwa vija kokua mkulu ha Mndewa. Hong'wa mbe divai hebu upele. Nayo kobokela udaho kwa Muhe wa Mulungu kabula hanavumbuka, 16 nayo kowadahiza wanhu wengi Waizilaeli kubwela kwa Mulungu wao. 17 Nayo kolongola kabula ya Mndewa, muu muhe na udaho wa Eliya. Koihindula mioyo ya watata kuwatonga wana wao, kowatenda waja wadulu wamtogole Mndewa, naivo komtandila Mndewa wanhu wake.’'

18 Zakalia kamuuza mtumigwa wa kwa Mulungu, "Yodahikaze mbuli iyo? Manake niye namvele ng'hani, na mwehe wangu ivija mlala ng'hani."

19 Mtumigwa wa kuulanga kwa Mulungu kedika, "Niye iyo Gabilieli, nikwima ha Mulungu, nitumigwa kumwako kukulongela Usenga uno Unogile." 20 Kwa vija huzitogole mbuli zangu zinikulongele, kulawa sambi, kokua na ludanha mbaka chipindi icho mbuli zino vonda zilawilile."

21 Chipindi icho wanhu wakala wombeta Zakalia kunze kuno wokanganya halopole kulawa Muikae ya Mulungu. 22 Viyapotigwa kulonga, wao wavimanya kua kawona bumbuwazi Muikae ya Mulungu. Mbali kwa vija kakala na ludanha, ivo kakala yolonga nao kwa kuwalagusila kwamakono.

23 Chipindi viyakomleleze kusang'hana Muikae ya Mulungu, kabwela ukae yake. 24 Vichibitile chipindi chidodo Elizabeti mwehe wake kamela mate, nayo kainega ukae yake kwa miezi mitano. Kalonga, 25 "Dino ijo Mndewa diyanionile na kunitendela unovu wake niiyeka na kunilavila chinyala changu hawanhu!"

26 Muumwezi wa sita wa inda ya Elizabeti, mtumigwa wa kwa Mulungu katumigwa na Mndewa Mulungu kuita mbaka kae ya Galilaya, zina jake Nazaleti, 27 kwa mhambe yafungile pamvu na munhu imwe zina jake Yusufu wa kae ya Daudi. Zina da ino mhambe iyo Malia. 28 Nayo mtumigwa wa kwa Mulungu keza kumwake kamlamsa kamlongela, "Mndewa ka hamwe na gweye, gweye wing'higwe unovu na Mndewa!"

29 Nayo Malia kagazika ng'hani mmoyo kwa mbuli zino, ndamso ino yavilihi. 30 Baho mtumigwa wa kuulanga kwa Mulungu kamlongela, "Malia sekeudumbe, gweye kupata ng'hekewa ya Mulungu." 31 Kwavija kopata inda na kulela mwana wa chilume na komkema zina jake Yesu. 32 Nayo kokuwa na Undewa, ivija kokemigwa Mwana wa yeli Kuchanha ng'hani. Mndewa Mulungu komwing'ha Ufaume kama Tata yake Daudi, 33 koilongoza ulelo wa Yakobo halibule uhelelo, na ufaume wake wabule uhelelo!"

34 Malia kammwidika mtumigwa wa kuulanga kwa Mulungu kamlongela, "Niye na mhambe, mbuli ino yodahikaze?"

35 Mtumigwa wa kuulanga kwa Mulungu kamwidika, "Muhe wa Mulungu kokwizila, na udaho wake yeli kuchanha ng'hani zokugubika kama sisila, kwa ivo iyo yavumbuke kwa mbuli ya Mulungu kokemigwa Mwana wa Mulungu. 36 Lola, walukolo wako Elizabeti iyo yakemigwe mgumba, sambi kamela mate muuvele wake na uno uwo mwezi wake wa sita. 37 Manake kwa Mulungu habule mbuli ipotigwa."

38 Malia kalonga, "Lola, niye iyo mtumigwa wa Mndewa ivo ikale kumwangu kama vuulongile."

39 Mumsimo uwo Malia kalopola kuita kui kae imwe mvigongo va isi ya Uyahudi. 40 Kengila muikae ya Zakalia, na kumlamsa Elizabeti. 41 Nayo Elizabeti viyahulike ndamusi ya Malia, mwana yakalile mmunda mwake kazumha. Elizabeti kabokela udaho wa Muhe wa Mulungu, 42 kenula dizi kulu kalonga, "Kwing'higwa unovu na Mulungu gweye kubita wamwenga mwa wake wose, nayo mwanago yonda umulele kabalikigwa. 43 Habali niye ning'higwe ng'hekewa ng'hulu, mbaka mami ya Mndewa wangu yavike kumwangu? 44 Bahaja vinihulike ndamso yako, mwana yeli mmunda mwangu kazumha na kudeng'helela. 45 Kana unovu wa Mulungu iyo yatogole kua dija Mndewa diyamlongele gosang'hanika!"

46 Nayo Malia kalonga,

"Moyo wangu womtogola Mndewa,

47 nodeng'helela kwambuli ya Mulungu mlohozi wangu,

48 kwa vija hanisemwile mtumigwa wake mtumbala mavindi,

manake kulawa sambi ulelo wose wong'hema ning'higwe unovu na Mulungu.

49 Manake iyo yeli na udaho kanhendela mbuli ya uzonza,

Zina jake yaiyeka dinang'hane ng'hane.

50 Ubazi wa Mulungu wowawinza waja wose wamtogole,

kulawa ulelo mbaka ulelo.

51 Kwa vija katenda mbuli ng'hulu kwa udaho wake, na

kapwililisa nhonga za weli na udulu mmioyo yao.

52 Kawahulumusa wafaume kulawa muulongozi wao,

mbali kawenula waja wotumbala.

53 Kaweng'ha nzama weli na nzala vinhu vinogile,

mbali wazenzi kawasegeza bila chinhu.

54 Kamtaza mtumigwa wake Izilaeli,

viyakumbuke lagano jake da kumonela bazi.

55 Kama viyawalalike Tata zetu,

Ibulahimu na ulelo wake bila uhelelo!"

56 Malia kakala kwa miezi midatu vino na Elizabeti, amala kabwela ukae yake.

57 Elizabeti viyavikize chipindi cha kuibasula, kalela mwana wa chilume. 58 Mbwiga na walukolo wake viwahulika vija Mndewa Mulungu viyamtendele unovu mkulu, nao wadeng'helela hamwe nayo.

59 Mwana viyavikize zua da nane weza kumwingiza kumbi, walonda ija mwana yakemigwe Zakalia, zina da tati yake. 60 Mbali mami yake hatogole, na kalonga, "Habule! Zina jake kokemigwa Yohana."

61 Wayage wamlongela, "Mulukolo lwako habule munhu yoyose yeli na zina kama ijo!" 62 Baho wamwing'ha vilaguso Zakalia tati yake ili wavimanye kua mwenyego kolonda kumwing'ha zina gani.

63 Zakalia kapula wamwing' he chibao chakwandikila, "Kandika zina jake Yohana." Wose wakanganya! 64 Bahaja ludanha umlawa na lulimi lwake ulekesigwa, kandusa kulonga kuno komtogola Mulungu. 65 Wanhu welibehi nayo wamkanganya Mulungu na Muuisi yose na mvigongo vose va isi ya Uyahudi wanhu wandusa kusimulila mbuli zose zilawilile. 66 Chila munhu viyahulike mbuli zino kakanganyika na kauza, "Che, mwana ino kokua munhu wa vilihi?" Manake udaho wa Mndewa Mulungu ukala hamwe nayo.

67 Nayo Zakalia tataake imwana, kabokela udaho wa Muhe wa Mulungu, kalagusa ga Mulungu Usenga ulawa kwa Mulungu, kalonga,

68 "Yatogoligwe Mndewa, Mulungu wa Izilaeli,

kwavija kawezila wanhu wake na kuwalohola.

69 Nayo kaching'ha mlohozi,

muulelo wa Daudi mtumigwa wake.

70 Kama viyalongile kubitila milomo ya walagusi wa Mulungu yawabagule kwa mbuli yake baho umwaka,

71 kua kochihonya kulawa kwa wahasanyi wetu

na kulawa mmakono ga waja wochihila,

72 ili kulagusa unovu kwa tata zetu, na seke yaisemwe Lagano jake dinang'hane ng'hani,

73 laliko kama diyamlalike tata yetu Abulahamu kwa kuilahila,

74 kochihonya kulawa mmakono ga wahasanyi zetu,

kochidahiza kumsang'hanila bila kudumba,

75 kwa kukala ubanzi wake na kutogoligwa kumwake,

mmazua gose ga ugima wetu.

76 Nagweye mwanangu, kokemigwa Mlagusi wa Mulungu yeli hachanha ng'hani,

kwavija komulongolela Mndewa na kumtandila nzila kwa mbuli yake,

77 kuwalongela wanhu wake kua woloholigwa

kubitila kwa kulekeseligwa malozo gao.

78 Kwa mbuli ya uhole na ubazi wa Mulungu wetu, na bung'hulo da ulohozi wake wochibung'hulila kulawa kuchanha.

79 ili uwabung'hulile waja wose wokala mdiziza na wagubikigwe na ziza da ifa,

na kulongoza magulu getu muinzila ya utindiwala."

80 Mwana ija kakula na kongezeka udaho muu muhe. Kakala kuluwala mbaka zua dija diyailaguse kwa wanhu wa Izilaeli.